 |
ພິທີສະຫຼຸບບັ້ນແຂ່ງຂັນກວດສອບບົດປະພັນວັນນະຄະດີທົ່ວປະເທດ ເພື່ອສະເຫຼີມສະຫຼອງ 3 ວັນປະຫວັດສາດປີ 2025 ຈັດຂຶ້ນໃນວັນທີ 16 ມັງກອນນີ້ ທີ່ສູນກາງແນວລາວສ້າງຊາດໂດຍການເປັນປະທານຂອງ ທ່ານ ນາງ ສວນສະຫວັນ ວິຍະເກດ ກຳມະການສູນກາງພັກ ລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ (ວທ), ມີແຂກຖກເຊີນ, ສິລະປິນແຫ່ງຊາດ, ສິລະປິນດີເດັ່ນ, ນັກປະພັນ ແລະ ນັກກະວີເຂົ້າຮ່ວມ.
 |
ທ່ານ ທອງໃບ ໂພທິສານ ປະທານສະມາຄົມນັກປະພັນລາວ ໄດ້ກ່າວວ່າ: ເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງ 3 ວັນບຸນໃຫຍ່ປະຫວັດສາດຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສ້າງຕັ້ງ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ, ສະມາຄົມນັກປະພັນລາວ ໄດ້ຮັບມອບໝາຍຈາກກະຊວງ ວທ ຮ່ວມກັບກົມວັນນະຄະດີ ແລະ ພິມຈຳໜ່າຍຈັດແຂ່ງຂັນກວດສອບບົດປະພັນວັນນະຄະດີທົ່ວປະເທດຂຶ້ນ ເພື່ອໂຄສະນາເຜີຍແຜ່ ຊຸກຍູ້ປຸກລະດົມໃຫ້ບັນດານັກປະພັນ, ນັກກະວີທົ່ວປະເທດສົ່ງບົດຂຽນປະເພດເລື່ອງສັ້ນ, ເລື່ອງຍາວ, ບົດບັນທຶກ, ບົດຫວນຄືນ, ບົດກາບກອນກະວີເຂົ້າແຂ່ງຂັນກວດສອບເພື່ອຊີງລາງວັນ. ການແຂ່ງຂັນຄັ້ງນີ້, ມີນັກປະພັນ, ນັກກະວີສົ່ງບົດປະເພດຕ່າງໆເຂົ້າຮ່ວມ 258 ບົດฏ ໃນນັ້ນ, ປະເພດບົດຮ້ອຍແກ້ວ 130 ບົດ, ບົດຮ້ອຍກອງ 128 ບົດ. ຜ່ານການແຂ່ງຂັນເຂົ້າສູ່ຮອບຕັດສິນຂອງຄະນະກຳມະການກວດສອບມີ 176 ບົດເຂົ້າຊີງເອົາລາງວັນ 42 ລາງວັນ.
ຜ່ານການຄັດເລືອກລາງວັນທີ 1 ມີ 2 ລາງວັນ, ໄດ້ຮັບເງິນສົດລາງວັນລະ 10 ລ້ານກີບ, ທີ 2 ມີ 4 ລາງວັນໄດ້ຮັບເງິນສົດລາງວັນລະ 5 ລ້ານກີບ, ທີ 3 ມີ 6 ລາງວັນໄດ້ຮັບເງິນສົດລາງວັນລະ 3 ລ້ານກີບ ແລະ ລາງວັນຊົມເຊີຍມີ 30 ລາງວັນ ໄດ້ຮັບເງິນສົດລາງວັນລະ 1 ລ້ານກີບໃຫ້ກຽດມອບລາງວັນຂອງທ່ານ ນາງ ສວນສະຫວັນ ວິຍະເກດ.
ຂ່າວ: ບຸນຕອມ;ຮູບ: ບຸນອຸ້ມ
ຄໍາເຫັນ