ທ່ານ ເຄເລຊິ ເອຄຸມາ ຜູ້ຂຽນຫຼັກຂອງການສຶກສາຈາກສະຖາບັນການພັດທະນາໂລກຂອງມະຫາວິທະຍາໄລແມນເຊສເຕີ ກ່າວວ່າ: AI ກຳລັງປ່ຽນແປງວິທີການສ້າງຄວາມຮູ້, ວິທີການຕັດສິນໃຈ, ແລະ ວິທີການເຮັດວຽກໃນຫຼາຍສາຂາອາຊີບ. ມະຫາວິທະຍາໄລຕ່າງໆຈຳເປັນຕ້ອງພິຈາລະນາຢ່າງລະມັດລະວັງກ່ຽວກັບວິທີການກະກຽມນັກສຶກສາໃຫ້ພ້ອມສຳລັບອະນາຄົດແນວໃດ.
ການສຶກສາຊີ້ໃຫ້ເຫັນວ່າ: ໃນຂະນະທີ່ເຄື່ອງມື AI ກຳລັງປ່ຽນແປງວິທີການຮຽນຮູ້ ແລະ ການເຮັດວຽກຂອງຄົນຢ່າງໄວວາ, ຫຼາຍມະຫາວິທະຍາໄລຍັງອີງໃສ່ຮູບແບບການສອນ ແລະ ການປະເມີນຜົນທີ່ອອກແບບມາສຳລັບຍຸກກ່ອນ AI ຊຶ່ງອາດຈະສ້າງຊ່ອງວ່າງລະຫວ່າງທັກສະຂອງຜູ້ຮຽນຈົບ ແລະ ຄວາມຄາດຫວັງຂອງນາຍຈ້າງໄດ້.
ດັ່ງນັ້ນ, ມະຫາວິທະຍາໄລຄວນກ້າວໄປໄກກວ່າການລວມເອົາ AI ເຂົ້າໃນຫຼັກສູດການຮຽນການສອນ ມາສູ່ການທົບທວນເປົ້າໝາຍການສຶກສາຊັ້ນສູງເພື່ອກຽມຄວາມພ້ອມໃຫ້ນັກສຶກສາສາມາດເຮັດວຽກຮ່ວມກັບລະບົບ AI ທີ່ມີຄວາມສາມາດເພີ່ມຂຶ້ນໄດ້ຢ່າງຕໍ່ເນື່ອງ, ແທນທີ່ຈະແຂ່ງຂັນກັບ AI.
ການສຶກສາລະບຸວ່າ: ນັກຮຽນຈົບໃໝ່ຈະຕ້ອງມີທັກສະການວິເຄາະ ແລະ ການສື່ສານທີ່ເຂັ້ມແຂງກວ່າເກົ່າ, ມີຄວາມຮັບຮູ້ກ່ຽວກັບດ້ານຈັນຍາບັນ ແລະ ຄວາມສາມາດເຂົ້າໃຈສະຖານະການທີ່ສັບສົນ. ພ້ອມກັບຄວາມເຂົ້າໃຈກ່ຽວກັບວິທີການເຮັດວຽກຂອງ AI,
ທັງນີ້, ການສຶກສາຍັງໄດ້ກະຕຸ້ນໃຫ້ມີການປ່ຽນແປງທີ່ສຳຄັນໃນວິທີການປະເມີນຜົນ, ໂດຍໃຫ້ເຫດຜົນວ່າການສອບເສັງ ແລະ ການສອນແບບດັ້ງເດີມຄວນເປີດທາງໃຫ້ການປະເມີນຜົນຕົວຈິງຫຼາຍຂຶ້ນເພື່ອວັດແທກຄວາມສາມາດຂອງນັກຮຽນໃນການແກ້ໄຂບັນຫາທີ່ສັບສົນ, ໃຊ້ການຄິດຢ່າງມີວິຈາລະນະ ຍານແລະ ນຳໃຊ້ຄວາມຮູ້ໃນສະຖານະການຕົວຈິງ.
ຢ່າງໃດກໍຕາມ, ທ່ານ ອາຄຸມາກ່າວວ່າ: ສະຖາບັນການສຶກສາຄວນເບິ່ງ AI ເປັນ "ຜູ້ຊ່ວຍດ້ານການສຶກສາ" ແທນທີ່ຈະເປັນໄພຂົ່ມຂູ່ແລະ ຊຸກຍູ້ໃຫ້ນັກຮຽນພັດທະນາຄວາມຮູ້ ແລະ ທັກສະດ້ານ AI ຄຽງຄູ່ກັບຄວາມຊ່ຽວຊານສະເພາະທາງຂອງເຂົາເຈົ້າ.
ຄໍາເຫັນ