ສຳນັກຂ່າວສານຊິນຮວາລາຍງານໃນວັນທີ 22 ກັນຍາ ຜ່ານມາວ່າ: ຫ້ອງການສະຖິຕິຂອງ ສ ເກົາຫຼີ ລາຍງານວ່າ,ມະເຮັງ, ພະຍາດຫົວໃຈ ແລະ ປອດອັກເສບ ແມ່ນ 3 ສາເຫດຫຼັກຂອງການເສຍຊີວິດໃນ ສ ເກົາຫຼີໃນປີ 2025 ຊຶ່ງກວມເອົາ 42.7% ຂອງການເສຍຊີວິດທັງໝົດ, ໂດຍມະເຮັງຍັງຄົງເປັນສາເຫດຫຼັກ. ອັດຕາການເສຍຊີວິດຍ້ອນມະເຮັງ ຢູ່ທີ່ 177.1 ຄົນຕໍ່ 100,000 ຄົນໃນປີ 2025, ເພີ່ມຂຶ້ນ 1.6% ຈາກປີ 2024.
ມະເຮັງປອດມີອັດຕາການເສຍຊີວິດສູງສຸດໃນບັນດາມະເຮັງທັງໝົດ, ຢູ່ທີ່ 38.9 ຄົນຕໍ່ 100,000 ຄົນ, ຕິດຕາມດ້ວຍມະເຮັງຕັບ 20.4 ຄົນ, ມະເຮັງລຳໄສ້ 19.1 ຄົນ, ມະເຮັງຕັບອ່ອນ 17.0 ຄົນແລະ ມະເຮັງກະເພາະອາຫານ 13.7 ຄົນ.
ໃນຂະນະດຽວກັນ, ອັດຕາການເສຍຊີວິດຍ້ອນພະຍາດຫົວໃຈ ແລະ ປອດອັກເສບແມ່ນ 66.3 ແລະ 60.8 ຕໍ່ປະຊາກອນ 100,000 ຄົນຕາມລຳດັບ, ຕິດຕາມດ້ວຍພະຍາດເສັ້ນເລືອດໃນສະໝອງຕີບ 48.7 ຄົນ, ການຂ້າຕົວຕາຍ 27.8 ຄົນ, ພະຍາດອັນໄຊເມີ 26.8 ຄົນ, ພະຍາດເບົາຫວານ 22.4 ຄົນ, ພະຍາດຕິດເຊື້ອໃນເລືອດ 17.2 ຄົນ, ພະຍາດຄວາມດັນເລືອດສູງ 17.0 ຄົນແລະ ພະຍາດຕັບ 14.9 ຄົນ.
ຈຳນວນຜູ້ເສຍຊີວິດທັງໝົດໃນ ສ ເກົາຫຼີໃນປີ 2025 ຢູ່ທີ່ 362,968 ຄົນ, ເພີ່ມຂຶ້ນ 1.2% ຈາກປີ 2024 ແລະ ແມ່ນໂຕເລກສູງສຸດອັນດັບສອງຫຼັງຈາກປີ 2022 ຊຶ່ງມີຈໍານວນຜູ້ເສຍຊີວິດເພີ່ມຂຶ້ນສູງສຸດແບບບໍ່ເຄີຍມີມາກ່ອນຍ້ອນການລະບາດຂອງພະຍາດໂຄວິດ-19. ອັດຕາການເສຍຊີວິດຢູ່ທີ່ 712.6 ຕໍ່ປະຊາກອນ 100,000 ຄົນ.
ຂໍ້ມູນນີ້ສະທ້ອນໃຫ້ເຫັນເຖິງການເຂົ້າສູ່ສັງຄົມຜູ້ອາຍຸສູງຢ່າງໄວວາຂອງປະຊາກອນ, ໂດຍຜູ້ທີ່ມີອາຍຸ 80 ປີຂຶ້ນໄປຄິດເປັນ 54.7% ຂອງການເສຍຊີວິດທັງໝົດໃນປີ 2025, ເພີ່ມຂຶ້ນ 13.9% ເມື່ອທຽບກັບ 10 ປີກ່ອນ.
ຄໍາເຫັນ