ມາດຕະຖານເລືອກຕັ້ງເປັນສະມາຊິກສະພາຜູ້ພິພາກສາຂອງ ສປສສ

ທ່ານນາງ ທຸມມາລີ ວົງພະຈັນ ກ່າວວ່າ: ເພື່ອຮັບປະກັນໃຫ້ການພິຈາລະນາ, ຮັບຮອງເອົາການສະເໜີແຕ່ງຕັ້ງສະມາຊິກສະພາຜູ້ພິພາກສາຂອງ ສປສສ ຕາມການສະເໜີຂອງປະທານ ສປສສ ດໍາເນີນສອດຄ່ອງກັບກົດໝາຍຕໍ່ກອງປະຊຸມ ຄື: 1. ແມ່ນຜູ້ທີ່ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ລະບອບປະຊາທິປະໄຕປະຊາຊົນ, ມີທັດສະນະຫຼັກໝັ້ນການເມືອງໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບ ໝາຍ, ເປັນແບບຢ່າງໃນການເຄົາລົບ ແລະ ປະຕິບັດລັດຖະທຳມະນູນ, ກົດໝາຍຢ່າງເຂັ້ມງວດ ແລະ ຮັບປະກັນຄວາມຍຸຕິທໍາ ໃນການປະຕິບັດໜ້າທີ່; 2. ມີຄຸນສົມບັດສິນທຳປະຕິວັດ, ມີຄວາມບໍລິສຸດສັດຊື່, ທ່ຽງທຳ, ມີຈັນຍາບັນ, ຈັນຍາທໍາ, ບໍ່ສວຍໃຊ້ໜ້າທີ່ຕຳແໜ່ງ, ບໍ່ຮັບ ແລະ ບໍ່ໃຫ້ສິນບົນ, ມີແບບແຜນການດໍາລົງຊີວິດທີ່ປອດໃສ, ມີການປະພຶດທີ່ດີ, ບໍ່ລຳອຽງ, ບໍ່ອັກຄະຕິ, ມີຄວາມອົດທົນ ແລະ ໄດ້ຮັບຄວາມເຊື່ອຖືໄວ້ໃຈ ຈາກການຈັດຕັ້ງ ແລະ ສັງຄົມ; 3. ໄດ້ຜ່ານການຍົກລະດັບທິດສະດີການເມືອງ-ການປົກຄອງລະດັບຂັ້ນສູງ, ມີຄວາມຮູ້ທາງດ້ານກົດໝາຍຢ່າງເລິກເຊິ່ງ, ກຳແໜ້ນ ແລະ ສາມາດຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງຂອງພັກ, ລັດຖະທຳມະນູນ, ກົດໝາຍ ແລະ ນິຕິກຳອື່ນໆທີ່ກ່ຽວຂ້ອງ, ຮູ້ວິເຄາະ ວິໄຈ ໄຈ້ແຍກຂໍ້ມູນຫຼັກຖານຢ່າງຖືກຕ້ອງຊັດເຈນ ແລະ ທັນສະພາບການ, ສອດຄ່ອງກັບຄວາມເປັນຈິງ, ມີຄວາມຍຸຕິທຳ ແລະ ໂປ່ງໃສ; 4. ເປັນເຈົ້າການປະຕິບັດຕາມສິດ ແລະ ໜ້າທີ່ຂອງຜູ້ພິພາກສາ, ມີຄວາມຮັບຜິດຊອບສູງ, ມີຄວາມສະດຸ້ງໄວ, ກ້າຄິດ, ກ້າເຮັດ, ກ້າຮັບ ຜິດຊອບຕໍ່ຜົນໄດ້, ຜົນເສຍ ໃນການປະຕິບັດໜ້າທີ່ການເມືອງຂອງຕົນ, ຮູ້ເສີມຂະຫຍາຍດ້ານດີ ແລະ ປ່ຽນແປງຈຸດອ່ອນຂອງຕົນ; 5. ເປັນຜູ້ທີ່ພວມດຳລົງຕຳແໜ່ງປະທານ, ຮອງປະທານ ສປສສ, ຫົວໜ້າຄະນະສານໃດໜຶ່ງຂອງ ສປສສ, ຜູ້ພິພາກສາຊຶ່ງມີບົດຮຽນ-ປະສົບການສູງໃນການດໍາເນີນຄະດີ ແລະ ມີຄວາມຮູ້, ຄວາມສາມາດນໍາພາວຽກງານທີ່ໄດ້ຮັບມອບໝາຍມີຜົນສໍາເລັດ; 6. ມີອາຍຸກະສຽນ 45 ປີຂຶ້ນໄປ, ມີສຸຂະພາບແຂງແຮງ ເພື່ອຮັບປະກັນ ການປະຕິບັດໜ້າທີ່ວຽກງານທີ່ຖືກມອບໝາຍ.
ເປົ້າໝາຍ ທີ່ຈະສະເໜີແຕ່ງຕັ້ງເປັນສະມາຊິກສະພາຜູ້ພິພາກສາຂອງ ສປສສ ຕາມໜັງສະເໜີຂອງທ່ານປະທານ ສປສສ ສະບັບເລກທີ 356/ສປສສ, ລົງວັນທີ 23 ມີນາ 2026 ຊຶ່ງປະກອບມີບັນດາທ່ານ ຄື: 1. ທ່ານ ໄພວີ ສີບົວລິພາ ປະທານ ສປສສ; 2. ທ່ານ ບຸນຂວາງ ທະວີສັກ ຮອງປະທານ ສປສສ; 3. ທ່ານ ອານົງ ຍອຍສາຍຄໍາ ຮອງປະທານ ສປສສ; 4. ທ່ານ ຂຸນສຸວັນ ສຸທຳມະວົງ ຮອງປະທານ ສປສສ; 5. ທ່ານ ພັອ ວັນສີເຟືອງ ຜູ້ພິພາກສາຊັ້ນສີ່ ຮອງປະທານ ສປສສ; 6. ທ່ານ ສົມຈິດ ແກ້ວມະນີໄລ ຜູ້ພິພາກສາຊັ້ນສີ່ ຫົວໜ້າຄະນະສານອາຍາ; 7. ທ່ານ ນາງ ທັນສະໄໝ ຊາມຸນຕີ ຜູ້ພິພາກສາຊັ້ນສີ່ ຫົວໜ້າຄະນະສານຄອບຄົວ; 8. ທ່ານ ນາງ ຈັນຖະໜອມ ສີລິວັດ ຜູ້ພິພາກສາຊັ້ນສີ່ ຫົວໜ້າຄະນະສານການຄ້າ; 9. ທ່ານ ແສງສຸວັນ ຈັນທະລຸນນະວົງຜູ້ພິພາກສາຊັ້ນສີ່ ຫົວໜ້າກົມຄຸ້ມຄອງວິຊາການ ແລະ ສະຖິຕິສານ; 10. ທ່ານ ໄຊສົມພອນ ເພັດຊົມພູ ຜູ້ພິພາກສາຊັ້ນສີ່ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ; 11. ທ່ານ ຈິດຕາວັນ ວົງໄຊ ຜູ້ພິພາກສາຊັ້ນສີ່ ຮັກສາການຫົວໜ້າຄະນະສານແຮງງານ; 12. ທ່ານ ນາລິສວນ ສາຍສຸລິຍາ ຜູ້ພິພາກສາຊັ້ນສີ່ ຮັກສາການຫົວ ໜ້າຄະນະສານແພ່ງ; 13. ທ່ານ ສັກກຸນາ ຍະພິຈິດ ຜູ້ພິພາກສາຊັ້ນສີ່ ຮັກສາການຫົວໜ້າຄະນະສານປົກຄອງ; 14. ທ່ານ ນາງ ຈອມພັນ ຈັນທະວີ ຜູ້ພິພາກສາຊັ້ນສີ່ ຮອງຫົວໜ້າຄະນະສານອາຍາ; 15. ທ່ານ ສີວັນ ບຸນທະລາ ຜູ້ພິພາກສາຊັ້ນສີ່ ຮອງຫົວໜ້າຄະນະສານການຄ້າ. (ຂ່າວ: ແສງຈັນ)