ແມ່ຍິງແຂວງຈຳປະສັກ ມີຜົນງານພົ້ນເດັ່ນຫຼາຍດ້ານ

ໂດຍ: ວັນເພັງ
    ຕະຫຼອດໄລຍະຜ່ານມາ ສະຫະພັນແມ່ຍິງແຂວງຈຳປາສັກແຕ່ລະຂັ້ນໄດ້ຖືສໍາຄັນວຽກງານສຶກສາອົບຮົມການເມືອງ-ແນວຄິດໃຫ້ແກ່ສະມາຊິກສະຫະພັນແມ່ຍິງ, ແມ່ຍິງບັນດາເຜົ່າໂດຍນຳເອົາແນວທາງນະໂຍບາຍ, ມະຕິ, ຄຳສັ່ງຂອງພັກ, ລັດຖະທຳມະນູນ, ກົດໝາຍເຜີຍແຜ່ດ້ວຍຫຼາຍຮູບແບບ, ຫຼາຍວິທີການຕາມເງື່ອນໄຂຈຸດພິເສດຂອງແຕ່ລະພາກສ່ວນໄດ້ຢ່າງກວ້າງຂວາງ ເຮັດໃຫ້ແມ່ຍິງແຂວງຈຳປາສັກຈັດຕັ້ງປະຕິບັດວຽກງານທີ່ຕົນຮັບຜິດຊອບມີຜົນສຳເລັດແລະມີຜົນງານພົ້ນເດັ່ນຫຼາຍດ້ານ.
    ທ່ານນາງ ສຸກສົມພອນ ພົນອາສາ ຮອງປະທານສະຫະພັນແມ່ຍິງແຂວງຈຳປາສັກ ໄດ້ລາຍງານຕໍ່ກອງປະຊຸມແລກປ່ຽນບົດຮຽນລະຫວ່າງຄະນະໂຄສະນາອົບຮົມສູນກາງພັກຮ່ວມກັບ3 ອົງການຈັດຕັ້ງແຂວງຈຳປາສັກທີ່ຫ້ອງວ່າການແຂວງດັ່ງກ່າວເມື່ອບໍ່ດົນມານີ້ວ່າ: ຄະນະສະຫະພັນແມ່ຍິງຈຳປາສັກແຕ່ລະຂັ້ນ ໄດ້ຖືສຳຄັນວຽກງານສຶກສາອົບຮົມການເມືອງ-ແນວຄິດໃຫ້ແກ່ສະມາຊິກສະຫະພັນແມ່ຍິງ, ແມ່ຍິງບັນດາເຜົ່າໂດຍນຳເອົາແນວທາງນະໂຍບາຍ, ມະຕິ, ຄຳສັ່ງຂອງພັກ, ລັດຖະທຳມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ ຂອງລັດ ແລະ ເອກະສານສຳຄັນຕ່າງໆຂອງພັກ, ຂອງຊາດ, ຂອງສະຫະພັນແມ່ຍິງລາວໄປຈັດຕັ້ງເຊື່ອມຊຶມ, ເຜີຍແຜ່ດ້ວຍຫຼາຍຮູບແບບ, ຫຼາຍວິທີການຕາມເງື່ອນໄຂຈຸດພິເສດຂອງແຕ່ລະພາກສ່ວນໄດ້ຢ່າງກວ້າງຂວາງ ແລະ ສາມາດບັນລຸໄດ້ຕາມຄາດໝາຍທຽບໃສ່ຈຳນວນແມ່ຍິງໃນເກນອາຍຸ ເຮັດໃຫ້ສະຫະພັນແມ່ຍິງແຂວງຈຳປາສັກຈັດຕັ້ງປະຕິບັດວຽກງານທີ່ຕົນຮັບຜິດຊອບມີຜົນສຳເລັດແລະມີຜົນງານພົ້ນເດັ່ນຫຼາຍດ້ານເປັນຕົ້ນ ໄດ້ປັັບປຸງການຈັດຕັ້ງສະຫະພັນແມ່ຍິງຂັ້ນຮາກຖານ ແລະ ບ້ານສຳເລັດ 100%, ສໍາເລັດການນໍາພາດໍາເນີນກອງປະຊຸມໃຫຍ່ສະຫະພັນແມ່ຍິງເມືອງ 9 ເມືອງ 1ນະຄອນ, ໄດ້ເປັນເຈົ້າການໃນການຜັນຂະຫຍາຍບັນດາກົດໝາຍທີ່ກ່ຽວພັນກັບການປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ, ສົນທິສັນຍາສາກົນທີ່ລັດຖະບານໄດ້ເປັນພາຄີ, ແຜນດຳເນີນງານແຫ່ງຊາດແນໃສ່ເພື່ອປ້ອງກັນ ແລະ ປົກປ້ອງຊ່ວຍເຫຼືອແມ່ຍິງ ແລະ ເດັກ ທີ່ຖືກໃຊ້ຄວາມຮຸນແຮງທຸກຮູບແບບ. ໃນນັ້ນ, ຍັງສາມາດຍາດແຍ່ງໄດ້ການຊ່ວຍເຫຼືອດ້ານງົບປະມານ, ດ້ານວິຊາການມາສ້າງຄວາມເຂັ້ມແຂງໃຫ້ແກ່ສະຫະພັນແມ່ຍິງແຂວງ, ເຮັດໜ້າທີ່ປົກປ້ອງ, ຊ່ວຍເຫຼືອແມ່ຍິງຜູ້ຖືກເຄາະຮ້າຍໃຫ້ໄດ້ເຂົ້າເຖິງຂະບວນການຍຸຕິທຳຕາມກົດໝາຍ, ຍາດແຍ່ງໄດ້ການຊ່ວຍເຫຼືອທຶນໃນການສ້າງສູນໃຫ້ຄຳປຶກສາແລະ ຊ່ວຍເຫຼືອແມ່ຍິງຜູ້ຖືກເຄາະຮ້າຍຈາກການໃຊ້ຄວາມຮຸນແຮງຈາກອົງການ UNFPA ມູນຄ່າ 88.000ໂດລາ, ປັດຈຸບັນສະຫະພັນແມ່ຍິງແຂວງມີສູນໃຫ້ຄໍາປຶກສາ ແລະ ຊ່ວຍເຫຼືອແບບຄົບວົງຈອນໃຫ້ແມ່ຍິງທີ່ຖືກເຄາະຮ້າຍຈາກການໃຊ້ຄວາມຮຸນແຮງໃນທຸກຮູບແບບ.ໃນນັ້ນ, ຍັງໄດ້ພັດທະນາຊີວິດການເປັນຢູ່, ແກ້ໄຂຄວາມທຸກຍາກຂອງແມ່ຍິງ ແລະ ຄອບຄົວ ໂດຍໄດ້ລົງຊຸກຍູ້ສົ່ງເສີມກຸ່ມຜະລິດຫັດຖະກໍາ, ກະສິກໍາ, ການປຸງແຕ່ງທີ່ເປັນສິນຄ້າຂອງສະມາຊິກສະຫະພັນແມ່ຍິງເປັນຕົ້ນ 1)ກຸ່ມຜະລິດເສັ້ນເຝີ ແລະ ແຜ່ນແໜມນ້ອຍບ້ານສະພັງເໜືອ ເມືອງມຸນລະປາໂມກຈຳນວນ 21 ຄອບຄົວ ເປັນເງິນ 111.107.000ກີບ; 2) ກຸ່ມຜະລິດຟອຍແຂມບ້ານໂນນຊັບ ເມືອງໂພນທອງຈຳນວນ 70 ຄອບຄົວ ເປັນເງິນ110.000.000 ກີບ ແລະ ບ້ານໝື່ນຫຼວງ ເມືອງບາຈຽງຈໍານວນ 16 ຄອບຄົວ ເປັນເງິນ 50.000.000 ກີບ; 3) ກຸ່ມຜະລິດເຂົ້າບ້ານໜອງບົວທອງ ເມືອງມຸນລະປາໂມກມີ 5 ຄອບຄົວເປັນເງິນ50.000.000 ກີບ; 4)ກຸ່ມປູກຜັກ ບ້ານໜອງບົວເມືອງໂພນທອງມີ10 ຄອບຄົວ ເປັນເງິນ 50.000.000ກີບ; 5)ກຸ່ມຫັດຖະກໍາໂຮງສ່ຽນໄມ້ ບ້ານທາງຄົບເມືອງຈໍາປາສັກມີ 5 ຄອບຄົວເປັນເງິນ100.000.000 ກີບ; 6)ກຸ່ມຫັດຖະກຳຕໍ່າແຜ່ນຂອງສະຫະພັນແມ່ຍິງໂຮງຮຽນວຽງໄຊ (ຜ້າຝ້າຍຕັດເສື້ອ) ຈໍານວນ 50.000.000 ກີບ(ລວມທຶນທັງໝົດທີ່ໄດ້ຊຸກຍູ້ສົ່ງເສີມຈຳນວນ521.107.000ກີບ) ທຶນດັ່ງກ່າວໄດ້ມາຈາກການປະກອບສ່ວນ, ການສະໜັບສະໜູນຂອງແຂວງ, ສະມາຊິກສະຫະພັນແມ່ຍິງໃນການເຄື່ອນໄຫວກິດຈະກຳຕ່າງໆ. ນອກນັ້ນ, ສະຫະພັນແມ່ຍິງແຂວງຍັງມີສູນຝຶກອົບຮົມວິຊາຊີບ ແລະ ໄດ້ມີການຈັດຝຶກອົບຮົມວິຊາຊີບຕັດຫຍິບ, ເສີມສວຍໄລຍະສັ້ນ 3 ເດືອນໃຫ້ແກ່ແມ່ຍິງຜູ້ດ້ອຍໂອກາດ, ທຸກຍາກ ແລະ ແມ່ຍິງທົ່ວໄປທີ່ມີຄວາມມັກ, ມີຄວາມສົນໃຈໃນອາຊີບໄດ້ 2 ຫາ3 ຊຸດຕໍ່ປີ ຊຶ່ງມີຜູ້ເຂົ້າຮ່ວມຝຶກ 30 ຫາ 35 ເທື່ອຄົນຕໍ່ຊຸດ ພ້ອມທັງມອບໃບຢັ້ງຢືນໃຫ້ຜູ້ເຂົ້າຮ່ວມເພື່ອເປັນຫຼັກຖານໃນການປະກອບອາຊີບ.
ອົງການຈັດຕັ້ງສະຫະພັນແມ່ຍິງແຂວງຈຳປາສັກປະກອບມີຄະນະບໍລິຫານງານສະຫະພັນແມ່ຍິງແຂວງສະໄໝທີVII ຈຳນວນ35 ທ່ານ (ປະຈໍາການ3 ທ່ານຄື: ປະທານ, ຮອງປະທານ2 ທ່ານ) ປະກອບມີ3.362 ໜ່ວຍ (ໜ່ວຍເອກະລາດແລະໜ່ວຍທີ່ຂຶ້ນກັບຮາກຖານ383 ໜ່ວຍ, ໜ່ວຍທີ່ຂຶ້ນກັບຮາກຖານບ້ານ2.979 ໜ່ວຍ), 885 ຮາກຖານ (ຮາກຖານບ້ານ642 ບ້ານ, ອ້ອມຂ້າງແຂວງ, ເມືອງ243 ຮາກຖານ). ປັດຈຸບັນມີແມ່ຍິງທັງໝົດ426.654 ຄົນ, ເປັນສະມາຊິກສະຫະພັນແມ່ຍິງ115.195 ຄົນ.ສຳລັບຫ້ອງການສະຫະພັນແມ່ຍິງແຂວງປະກອບມີ5ຂະແໜງວຽກຄື: ຂະແໜງຫ້ອງການ, ຂະແໜງຈັດຕັ້ງ-ກວດກາ, ຂະແໜງໂຄສະນາອົບຮົມ-ວັດທະນະທຳ-ຂ່າວສານ, ຂະແໜງພັດທະນາແມ່ຍິງແລະຝຶກອົບຮົມວິຊາຊີບ, ສົ່ງເສີມບົດບາດຍິງ-ຊາຍ, ຂະແໜງສົ່ງເສີມຄວາມກ້າວໜ້າແລະປົກປ້ອງແມ່ຍິງ-ເດັກມີພະນັກງານທັງໝົດ31 ຄົນ, ຊາຍ1 ຄົນ.