ແມ່ຍິງແຂວງໄຊຍະບູລີ ລົງຊຸກຍູ້ຕິດຕາມວຽກງານຮອບດ້ານຂອງສະຫະພັນແມ່ຍິງເມືອງໄຊຍະບູລີ

ທ່ານ ນາງ ວັນນະພອນ ທໍ່ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ ໄດ້ຂຶ້ນລາຍງານການຈັດຕັ້ງປະຕິບັດວຽກງານຮອບດ້ານຂອງສະຫະພັນແມ່ຍິງເມືອງໃນໄລຍະຜ່ານມາ ໃຫ້ຮູ້ວ່າ: ທົ່ວເມືອງໄຊຍະບູລີ ມີສະມາຊິກສະຫະພັນແມ່ຍິງທັງໜົດ 9,093 ທ່ານ, ມີ 112 ຮາກຖານ. ໃນນີ້ຮາກຖານບ້ານ 81 ຮາກຖານ, ຮາກຖານຫ້ອງການ 7 ຮາກຖານ, ຮາກຖານໂຮງຮຽນ 24 ຮາກຖານ, ມີໜ່ວຍສະຫະພັນທັງໝົດ 28 ໜ່ວຍ, ຄະນະບໍລິຫານງານສະຫະພັນແມ່ຍິງເມືອງ 23 ທ່ານ, ຄະນະຮາກຖານ 384 ທ່ານ ແລະ ຄະນະໜ່ວຍສະຫະພັນແມ່ຍິງ 58 ທ່ານ.

ໃນພິທີ, ໄດ້ເຜີຍແຜ່ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະຫະພັນແມ່ຍິງເມືອງ, ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາສະຫະພັນແມ່ຍິງ.

ຕອນທ້າຍກອງປະຊຸມທ່ານ ນາງ ບົວຈັນ ພັນທະວົງ ໄດ້ໂອ້ລົມເນັ້ນໜັກໃຫ້ສະຫະພັນແມ່ຍິງເອົາໃຈໃສ່ຕໍ່ປະກົດການຫຍໍ້ທໍ້ດ້ານຕ່າງໆ ທີ່ເກີດຂຶ້ນກັບແມ່ຍິງ ເພື່ອຊອກຫາວິທີການປັບປຸງແກ້ໄຂໃນຕໍ່ໜ້າໃຫ້ດີຂຶ້ນເປັນກ້າວໆຊີ້ນຳໃຫ້ສະຫະພັນແມ່ຍິງແຕ່ລະຂັ້ນ ຈັດຕັ້ງປະຕິບັດຕາມແຜນດໍາເນີນງານ, ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ຖືກຕ້ອງສອດຄ່ອງຕາມກົດລະບຽບ, ກົດໝາຍວ່າດ້ວຍສະຫະພັນແມ່ຍິງລາວ; ເພື່ອກວດກາຄືນດ້ານກົງຈັກການຈັດຕັ້ງ, ບຸກຄະລາກອນສະຫະພັນແມ່ຍິງເມືອງ, ຮາກຖານບ້ານ; ເຜີຍແຜ່ພາລະບົດບາດ, ສິດ ແລະ ໜ້າທີ່ຂອງສະຫະພັນແມ່ຍິງແຕ່ລະຂັ້ນ ແລະ ພາລະບົດບາດຂອງຄະນະກວດກາສະຫະພັນແມ່ຍິງ; ກວດກາຄືນການຈັດຕັ້ງປະຕິບັດວຽກງານຮອບດ້ານຂອງສະຫະພັນແມ່ຍິງເມືອງຕື່ມອີກ. ຂ່າວ: ກະບອກສຽງແມ່ຍິງ