ທ່ານ ອູເຍມິນອອງ ປະທານສະຫະພັນເຂົ້າ ກ່າວວ່າ: ມຽນມາໄດ້ສົ່ງອອກເຂົ້າສານປະມານ 200.000 ໂຕນຕໍ່ເດືອນໃນເຄິ່ງປີທຳອິດຂອງປີງົບປະມານ 2025-2026 (ເດືອນເມສາ ຫາ ເດືອນກັນຍາ 2025) ລວມທັງໝົດ 1.2 ລ້ານໂຕນ. ເຄິ່ງປີຫຼັງຂອງງົບປະມານປີນີ້ມີແຜນຈະເພີ່ມການສົ່ງອອກໃຫ້ໄດ້ປະມານ 300.000 ໂຕນຕໍ່ເດືອນ.
ທ່ານ ອູເຍມິນອອງ ເນັ້ນໜັກວ່າ: ສະຫະພັນເຂົ້າມຽນມາ ຍັງສືບຕໍ່ໃຫ້ບຸລິມະສິດການເຕີບໂຕທີ່ຂັບເຄື່ອນດ້ວຍການສົ່ງອອກເພື່ອຮັບປະກັນການພັດທະນາຂະແໜງເຂົ້າຂອງມຽນມາຢ່າງຮອບດ້ານ. ຄວາມພະຍາຍາມນີ້ແມ່ນສອດຄ່ອງກັບການປະຕິບັດແຫ່ງຊາດ ແລະ ນະໂຍບາຍຂອງລັດຖະບານໃນການສົ່ງເສີມການສົ່ງອອກ.
ປັດຈຸບັນ, ຕະຫຼາດສົ່ງອອກຕົ້ນຕໍຂອງມຽນມາລວມມີເອີຣົບ, ຈີນ, ບັນດາປະເທດອາຊຽນ ໂດຍສະເພາະຟີລິບປິນ, ອິນໂດເນເຊຍ ແລະ ອາຟຣິກາ.
ເຄິ່ງປີຫຼັງຂອງງົບປະມານແມ່ນກົງກັນກັບໄລຍະການເກັບກ່ຽວເຂົ້ານາປີ ແລະ ຍັງກົງກັບໄລຍະເກັບກ່ຽວເຂົ້ານາແຊງດ້ວຍ. ໂດຍໃນໄລຍະນີ້, ລະດັບເຂົ້າໃນທ້ອງຕະຫຼາດຈະມີປະລິມານຫຼາຍທີ່ສຸດ, ສົ່ງຜົນໃຫ້ລາຄາເຂົ້າປະເຊີນກັບຄວາມກົດດັນຫຼຸດລົງ, ໃນຂະນະທີ່ລາຄາເຂົ້າໃນຕະຫຼາດທົ່ວໂລກຢູ່ໃນລະດັບຂ້ອນຂ້າງຕໍ່າເຊັ່ນດຽວກັນ.
ສະນັ້ນ, ທ່ານ ອູເຍມິນອອງ ເຊື່ອໝັ້ນວ່າ ມຽນມາ ຈຳເປັນຕ້ອງສົ່ງເສີມການສົ່ງອອກເຂົ້າສານຢ່າງຈິງຈັງໃນໄລຍະທີ່ລາຄາຫຼຸດລົງ ເພື່ອປົກປັກຮັກສາລາຍຮັບຂອງຊາວກະສິກອນ ແລະ ບັນດາພາກສ່ວນກ່ຽວຂ້ອງ.
ຄໍາເຫັນ