ມອນຊູນ ວິນ ພາວເວີ ມອບເບ້ຍກາເຟ ໃຫ້ປະຊາຊົນ ເມືອງດາກຈຶງ ແລະ ຊານໄຊ

ທ່ານ ເຊົາວະລິດ ຂັນໄຊຍະພູມ ກ່າວວ່າ: ມອນຊູນ ວິນ ພາວເວີ ເປັນໂຄງການພະລັງງານລົມ ຜະລິດກະແສໄຟຟ້າ ພະລັງງານສະອາດ ຕັ້ງຢູ່ລະຫວ່າງ ເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງອັດຕະປື. ໂຄງການນີ້, ມີເປົ້າໝາຍຢາກໃຫ້ປະຊາຊົນ ມີລາຍຮັບທີ່ໝັ້ນຄົງໃຊ້ເນື້ອທີ່ຈໍາກັດ ໃຊ້ແຮງງານນ້ອຍລົງ ແລະ ຫຼຸດຜ່ອນການຖາງປ່າເຮັດໄຮ່ເລື່ອນລອຍ ມາທຳການຜະລິດແບບຄົງທີ່ ຄຽງຄູ່ກັບການອະນຸລັກຮັກສາສິ່ງແວ້ນລ້ອມ ດ້ວຍການສົ່ງເສີມໃຫ້ປະຊາຊົນປູກກາເຟ ພ້ອມທັງຊ່ວຍຍົກລະດັບທາງດ້ານເຕັກນິກການປູກ, ການແປຮູບ, ການຜະລິດກາເຟ ເພື່ອເພີ່ມມູນຄ່າໃຫ້ສູງຂຶ້ນ ຊຶ່ງກາເຟ ທີ່ຈະມອບໃຫ້ທັງໝົດ 1 ລ້ານເບ້ຍ ມອບໃຫ້ປະຊາຊົນ 9 ບ້ານ. ໃນນີ້, ເມືອງດາກຈຶງ ມີ 6 ບ້ານຄື: ບ້ານດາກຕຽມ, ຊຽງຫຼວງ, ດາກຢາງ, ດາກນົງ, ດາກເຕຼິບ, ແລະດາກຊຽງເອ. ສ່ວນເມືອງຊານໄຊ ແຂວງອັດຕະປື ມີ: ບ້ານດາກແຢນ, ດາກຍົກ ແລະ ດາກສະມໍ. ແຕ່ມອບໃນເທື່ອນີ້, ແມ່ນ 6 ແສນ ເບ້ຍ ແລະ ສ່ວນທີ່ເຫຼືອ ຈະນໍາມາມອບໃນປີຕໍ່ມາ ເພາະໃຫ້ເວລາປະຊາຊົນ ກະກຽມພື້ນທີ່ຈະປູກຢ່າງພຽງພໍ.

ທ່ານ ສົມພອນ ສາຍສຸວັນ ກໍໄດ້ມີຄຳເຫັນວ່າ: ໃນນາມຕ່າງໜ້າການນຳພັກ-ລັດ ກໍຄືປະຊາຊົນ ທັງສອງເມືອງ ຂໍສະແດງຄວາມຂອບໃຈ ມາຍັງບໍລິສັດມອນຊູນ ວິນ ພາວເວີ ທີ່ເອົາໃຈໃສ່ໃນການປະກອບສ່ວນ, ການປັບປຸງຊິວິດການເປັນຢູ່ຂອງປະຊາຊົນ ໄລຍະຜ່ານມາ, ທັງດ້ານສາທາລະນະສຸກ ກໍໄດ້ມີການຈັດກິດຈະກຳກວດສຸຂະພາບ ແລະ ປີ່ນປົວພະຍາດ, ໃຫ້ການຊ່ວຍເຫຼືອໃນດ້ານການສຶກສາ ມູນຄ່າ 5.8 ຕື້ກີບ, ດ້ານການຟື້ນຟູຊິວິດການເປັນຢູ່ ກໍໄດ້ສະໜອງແນວພັນພືດຜັກ, ໃນດ້ານພື້ນຖານໂຄງລ່າງ ກໍໄດ້ຊ່ວຍບຸກເບີກເສັ້ນທາງ, ປັບປຸງອາຄານສຳນັກງານອົງການ ລວມມູນຄ່າ 1.2 ຕື້ກີບ, ດ້ານວັດທະນະທຳ-ສັງຄົມ, ການທ່ອງທ່ຽວ ກໍໄດ້ມີການຊ່ວຍເຫຼືອ ລວມມູນຄ່າ 1.2 ຕື້ກີບ ແລະ ຍັງໄດ້ສ້າງຄວາມເຂັ້ມແຂງ ໃຫ້ຊຸມຊົນໃນດ້ານຕ່າງໆນໍາອີກ ແລະ ຫວັງວ່າ: ເບ້ຍກາເຟ ທີ່ທາງໂຄງການ ມອບໃຫ້ໃນຊຸດນີ້, ປະຊາຊົນ ທັງ 9 ບ້ານ ທີ່ໄດ້ຮັບ ຈະພ້ອມກັນນໍາໄປປູກ ແລະ ບົວລະບັດຮັກສາ ໃຫ້ເກີດດອກອອກຜົນ ຈົນສາມາດໄດ້ຮັບຜົນຜະລິດ ແລະ ຂາຍເປັນສິນຄ້າ.

(ຂ່າວ: ອັດສະວິນ)