 |
ໃນພິທີ, ທ່ານ ສີຈັນ ຫານເສີກ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ລາຍງານໃຫ້ຮູ້ວ່າ: ໂດຍປະຕິບັດຕາມຄຳສັ່ງແນະນຳເລກທີ 03/ກມສພ, ປະຕິບັດຕາມດຳລັດເລກທີ 348/ນຍ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາໄລຍະແຕ່ປີ 2021 ເປັນຕົ້ນມາ ໃນການຈັດຕັ້ງປະຕິບັດນັ້ນໄດ້ຄົ້ນຄ້ວາເຊື່ອມຊຶມ ສ້າງຄວາມເປັນເອກະພາບສູງ ຕໍ່ບັນດາເນື້ອໃນຂອງມະຕິ, ຄຳສັ່ງ ໃຫ້ເຂົ້າໃຈຢ່າງເລິກຊຶ່ງ ແລ້ວນຳມາຜັນຂະຫຍາຍ ເປັນແຜນການອັນລະອຽດ ໃນແຕ່ລະໄລຍະ. ຈາກນັ້ນ, ກໍເຜີຍແຜ່ເຊື່ອມຊຶມໃຫ້ສະມາຊິກພັກ, ປະຊາຊົນບັນດາເຜົ່າໃຫ້ເຂົ້າໃຈ ແລະ ພ້ອມກັນຈັດຕັ້ງປະຕິບັດ ໂດຍເລີ່ມຈາກບຸກຄົນ, ຄອບຄົວ, ຂະແໜງການຕ່າງໆຂອງບ້ານ ຊຶ່ງພວກເຮົາໄດ້ແບ່ງຄວາມຮັບຜິດຊອບໃຫ້ຄະນະໜ່ວຍພັກ, ສະມາຊິກພັກ ແຕ່ລະສະຫາຍ ເປັນຜູ້ຊີ້ນຳ-ນຳພາ ໃນແຕ່ລະຂົງເຂດ ໂດຍສະເພາະແມ່ນຂະແໜງການທີ່ກ່ຽວຂ້ອງ. ຜ່ານການຈັດຕັ້ງປະຕິບັດຕົວຈິງ ກໍຄືຜ່ານການກວດກາ ຂອງຄະນະກຳມະການຂັ້ນເມືອງ ຕາມດຳລັດ 348/ນຍ ພວກເຮົາສາມາດຮັບຮອງເອົາບ້ານ ພົ້ນທຸກໄດ້ 38 ບ້ານ ແລະ ບ້ານພັດທະນາໄດ້ 18 ບ້ານ; ການປະເມີນມາດຕະຖານພົ້ນທຸກ ແລະ ພັດທະນາ ຕາມດໍາລັດ 348/ລບ ແຕ່ໄລຍະປີ 2021-2024 ຜ່ານມາ ໄດ້ປະເມີນຕາມ 6 ມາດຕະຖານບ້ານພົ້ນທຸກຂອງຄອບຄົວ, ຄອບຄົວພັດທະນາ ມີ 8 ກຸ່ມມາດຕະຖານ 11 ເນື້ອໃນ 19 ຕົວຊີ້ບອກ, 8 ມາດຕະຖານບ້ານພົ້ນທຸກ ແລະ ບ້ານພັດທະນາ ຕາມ 6 ກຸ່ມມາດຕະຖານ 19 ເນື້ອໃນ ແລະ 88 ຕົວຊີ້ບອກ. ຊຶ່ງຂັ້ນຕອນການຈັດຕັ້ງປະຕິບັດປະກອບມີ 5 ຂັ້ນຕອນ. ຜ່ານການຈັດຕັ້ງປະຕິບັດບ້ານທີ່ບັນລຸມາດຕະຖານພົ້ນທຸກແລ້ວ ທົ່ວເມືອງ ມີ 38 ບ້ານ ກວມເອົາ 48.72%; ບ້ານທີ່ຍັງບໍ່ບັນລຸມາດຕະຖານພົ້ນທຸກ ທົ່ວເມືອງ ມີ 40 ບ້ານ ກວມເອົາ 51.28%; ບ້ານທີ່ບັນລຸມາດຕະຖານພັດທະນາແລ້ວ ທົ່ວເມືອງ ມີ 18 ບ້ານ ກວມເອົາ 23.08%. ບ້ານທີ່ຍັງບໍ່ບັນລຸມາດຖານພັດທະນາ ທົ່ວເມືອງ ມີ 60 ບ້ານ ກວມເອົາ 76.92%. ຜ່ານການກວດກາ ຂອງຄະນະຮັບຜິດຊອບຂອງເມືອງ ສາມາດຮັບຮອງ ເປັນບ້ານພັດທະນາຕາມ ມາດຕະຖານເງື່ອນໄຂ. ຈາກນັ້ນ, ທ່ານ ນາຍບ້ານ 38 ບ້ານພົ້ນທຸກ ແລະ ທ່ານນາຍບ້ານ 18 ບ້ານບ້ານພັດທະນາຂຶ້ນຮັບໃບຢັ້ງຢືນ, ເປັນກຽດມອບໂດຍ ທ່ານ ເສນ ພັນລັກ.
(ຂ່າວ-ພາບ: ລັດາວອນ ແກ້ວໄພທູນ)
ຄໍາເຫັນ