ມອບ-ຮັບ ໂຄງການປັບປຸງເສັ້ນທາງໃນຕົວເມືອງວັງວຽງ

ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ ຕາງໜ້າຄະນະຮັບຜິດຊອບໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງໄລຍະ 2 ກ່າວວ່າ: ໂຄງການນີ້ແມ່ນໜຶ່ງໃນຈໍານວນ 4 ໂຄງການຍ່ອຍ ທີ່ຈັດຕັ້ງປະຕິບັດຢູ່ແຂວງວຽງຈັນ ແລະ ແມ່ນໜຶ່ງໃນຈໍານວນ 5 ໂຄງການຍ່ອຍທີ່ໄດ້ສໍາເລັດການກໍ່ສ້າງ ພາຍໃຕ້ການສະໜັບສະໜູນຈາກໂຄງການພັດທະນາພື້ນຖານໂຄງລ່າງ ເພື່ອສົ່ງເສີມການທ່ອງທ່ຽວ ອະນຸພາກພື້ນແມ່ນໍ້າຂອງໄລຍະ 2 ໂດຍໄດ້ຮັບການຊ່ວຍເຫຼືອຈາກທະນາຄານພັດ ທະນາອາຊີ (ADB) ຊຶ່ງໄດ້ເຊັນສັນຍາໃນວັນທີ 17 ຕຸລາ 2024 ລະຫວ່າງກະຊວງ ວທ (ເຈົ້າຂອງໂຄງການ) ແລະ ລັດວິສາຫະກິດກໍ່ສ້າງທາງເລກ 8 ແລະ ບໍລິສັດ ແອວບີດີ ກໍ່ສ້າງເຄຫາສະຖານ ແລະ ຂົວທາງ ຈອຍເວັນເຈີ (ຜູ້ຮັບເໝົາກໍ່ສ້າງ) ໃນມູນຄ່າສັນຍາ 2,761,132,85 ໂດລາ ແລະ ໄດ້ສໍາເລັດ 100% ໃນວັນທີ 30 ກໍລະ ກົດ 2026 ທີ່ຜ່ານມາ.

ເສັ້ນທາງທີ່ໄດ້ປັບປຸງໃນຄັ້ງນີ້ມີທັງໝົດ 13 ເສັ້ນ, ຍາວທັງໝົດ 5,445 ແມັດ. ໃນນັ້ນ, ໄດ້ປັບປຸງໜ້າທາງຄືນໃໝ່ ເພື່ອຍົກລະດັບຄຸນນະພາບຂອງທາງ ໂດຍການປູຢາງອັດສະຟານ, ພ້ອມທັງປັບປຸງລະບົບລະ ບາຍນໍ້າໜ້າທາງ ແລະ ແຄມທາງ ເພື່ອແກ້ໄຂບັນຫານໍ້າຂັງຕາມເສັ້ນທາງ ແລະ ເພີ່ມປະສິດທິພາບການລະ ບາຍນໍ້າ ໂດຍໄດ້ກໍ່ສ້າງຮ່ອງລະບາຍນໍ້າໃໝ່ຢູ່ 6 ເສັ້ນທາງ, ຍາວ 2,863,92 ແມັດ, ປັບປຸງລະບົບຮ່ອງລະ ບາຍນໍ້າເກົ່າຢູ່ 8 ເສັ້ນທາງ, ຍາວ 7,966 ແມັດ, ພ້ອມທັງປັບປຸງທາງຍ່າງ ແລະ ຕິດຕັ້ງຫຼັກເສົາກັ້ນທາງຢ່າງ ທັງໝົດ 8 ເສັ້ນທາງ, ປັບປຸງສະພາບແວດລ້ອມ ແລະ ໄຟຟ້າເຍືອງທາງ ເພື່ອຍົກລະດັບຄວາມເປັນລະບຽບ, ສວຍງາມ, ສີຂຽວ, ສະອາດ ແລະ ປອດໄພ ໂດຍໄດ້ປູກຕົ້ນໄມ້ຕາມເສັ້ນທາງ, ຕິດຕັ້ງໄຟເຍືອງທາງ. ນອກຈາກນີ້, ຍັງໄດ້ຕິດຕັ້ງເຄື່ອງໝາຍຈະລາຈອນ ເພື່ອຈັດລະບຽບການຈະລາຈອນ ແລະ ຫຼຸດຜ່ອນອຸບັດເຫດ ໂດຍມີການແຕ້ມເຄື່ອງໝາຍຈາລາຈອນຕາມໜ້າທາງ ແລະ ຕິດຕັ້ງປ້າຍສັນຍານຈະລາຈອນຕ່າງໆ.

ໂອກາດນີ້, ທ່ານ ແສງເພັດ ອະນັນທະວົງ ຮອງຜູ້ອໍານວຍການລັດວິສາຫະກິດກໍ່ສ້າງທາງເລກ 8 ແລະ ບໍລິສັດ ແອວບີດີ ກໍ່ສ້າງເຄຫາສະຖານ ແລະ ຂົວທາງ ຈອຍເວັນເຈີ ໄດ້ກ່າວມອບໂຄງການດັ່ງກ່າວ. ຈາກນັ້ນ ທ່ານ ນາງ ສວນສະຫວັນ ວິຍະເກດ ໄດ້ມີຄໍາເຫັນກ່າວຮັບ ໂດຍໄດ້ຕີລາຄາສູງ ແລະ ຊົມເຊີຍຕໍ່ຜົນສໍາເລັດຂອງ ໂຄງການປັບປຸງເສັ້ນທາງພາຍໃນເທສະບານເມືອງວັງວຽງ ຊຶ່ງໂຄງການນີ້ມີຄວາມສໍາຄັນຕໍ່ການຍົກລະດັບໂຄງລ່າງຄົມມະນາຄົມ ແລະ ສິ່ງອໍານວຍຄວາມສະດວກດ້ານການທ່ອງທ່ຽວຂອງເມືອງວັງວຽງ, ເຮັດໃຫ້ການເດີນທາງມີຄວາມສະດວກ ປອດໄພ, ເພີ່ມຄວາມສາມາດໃນການດຶງດູດນັກທ່ອງທ່ຽວ ແລະ ການລົງທຶນ, ສ້າງລາຍຮັບ ແລະ ວຽກເຮັດງານທໍາ ພ້ອມຍົກລະດັບຊີວິດການເປັນຢູ່ຂອງປະຊາຊົນ ຕາມທິດທາງການພັດທະນາສີຂຽວ ແລະ ຍືນຍົງ. ພ້ອມນີ້, ທ່ານຍັງຮຽກຮ້ອງໃຫ້ອົງການປົກຄອງເມືອງວັງວຽງ, ພະແນກການ, ພາກທຸລະກິດ ແລະ ປະ ຊາຊົນພາຍໃນເມືອງ ຮ່ວມກັນບົວລະບັດຮັກສາເສັ້ນທາງໃຫ້ສະອາດ, ສວຍງາມ ແລະ ມີລະບຽບ, ຮ່ວມກັນສ້າງຕົວເມືອງວັງວຽງ ໃຫ້ເປັນເມືອງທ່ອງທ່ຽວສີຂຽວ, ສະອາດ, ສວຍງາມ, ປອດໄພໜ້າທ່ຽວຊົມ, ພ້ອມທັງເປັນເຈົ້າ ພາບທີ່ດີ ເພື່ອສ້າງຄວາມປະທັບໃຈໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ.

ພ້ອມນີ້, ທ່ານ ນາງ ສວນສະຫວັນ ວິຍະເກດ ກໍໄດ້ສົ່ງມອບໂຄງການດັ່ງກ່າວໃຫ້ອົງການປົກຄອງແຂວງວຽງຈັນ ກໍຄື ເມືອງວັງວຽງ, ທັງໄດ້ຝາກຄວາມຫວັງໃຫ້ທຸກພາກສ່ວນຮ່ວມກັນນໍາໃຊ້ ແລະ ຮັກສາເສັ້ນທາງດັ່ງກ່າວໃຫ້ຍືນຍົງ ແລະ ສືບຕໍ່ພັດທະນາເມືອງວັງວຽງ ໃຫ້ເປັນເມືອງທ່ອງທ່ຽວຕາມແຜນແມ່ບົດພັດທະນາເມືອງວັງວຽງ 2026-2036 (ສີຂຽວ, ສະອາດ, ສວຍງາມ, ປອດໄພ ແລະ ມີຄວາມເປັນລະບຽບຮຽບຮ້ອຍ) ເພື່ອສ້າງຄວາມປະທັບໃຈ ແລະ ດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມເມືອງວັງວຽງ ກໍຄື ສປປ ລາວ ໃຫ້ນັບມື້ນັບຫຼາຍຂຶ້ນ. ຂ່າວ-ພາບ: ທະນູທອງ