ໃນພິທີ, ທ່ານ ສຸກທະວົງ ທໍາມະວົງ ຫົວໜ້າຫ້ອງການບໍລິຫານດ່ານສາກົນນາເພົ້າ ໄດ້ຜ່ານບົດສະຫຼຸບລາຍງານຜົນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍສະເພາະ ວຽກພັກ-ພະນັກງານ, ວຽກບໍລິຫານ, ວຽກການເງິນ ແລະ ບັນດາວຽກງານທີ່ຍັງຄົງຄ້າງ ທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າ.
ຈາກນັ້ນ, ຕາງໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງເລກທີ 148/ຄປຂ ວ່າດ້ວຍການຍົກຍ້າຍລັດຖະ ກອນຈາກພະແນກກະສິກຳ ແລະ ສິ່ງແວດລ້ອມແຂວງ ໄປປະຈໍາການຢູ່ຄະນະຄຸ້ມຄອງດ່ານສາກົນນາເພົ້າ ແລະ ຂໍ້ຕົກລົງແຕ່ງຕັ້ງ ສະບັບເລກທີ 168/ຄປຂ, ໂດຍແຕ່ງຕັ້ງທ່ານ ບົວສອນ ເຮືອງວິສອນ ເປັນຫົວໜ້າຫ້ອງການບໍລິຫານ ຄະນະຄຸ້ມຄອງດ່ານສາກົນນາເພົ້າແຂວງຄໍາມ່ວນ.
ໂອກາດນີ້, ທ່ານ ສາຍຄໍາ ພະໄຊສິດທິເດດ ໄດ້ມອບຂໍ້ຕົກລົງແຕ່ງຕັ້ງ, ພ້ອມທັງມີການລົງນາມເຊັນບົດບັນທຶກມອບ-ຮັບໜ້າທີ່ ລະຫວ່າງຫົວໜ້າຫ້ອງການບໍລິຫານດ່ານຜູ້ເກົ່າ ແລະ ຜູ້ໃໝ່ ເພື່ອເປັນທິດທາງສືບຕໍ່ນໍາພາ-ຊີ້ນໍາວຽກງານໃນຕໍ່ໜ້າ. ພ້ອມນີ້, ທ່ານ ສາຍຄໍາ ພະໄຊສິດທິເດດ ໄດ້ມີຄໍາເຫັນຊີ້ນໍາ ເນັ້ນໃຫ້ຄະນະພັກ-ຄະນະຄຸ້ມຄອງດ່ານ ສືບຕໍ່ເອົາໃຈໃສ່ວຽກງານການເມືອງ-ແນວຄິດ ໃຫ້ສະມາຊິກພັກ-ພະນັກງານພາຍໃນດ່ານເປັນປະຈໍາ; ຊຸກຍູ້ການຈັດຕັ້ງປະຕິບັດໜ້າທີ່ວຽກງານວິຊາສະເພາະຢ່າງເຂັ້ມງວດ, ປ້ອງກັນ ແລະ ສະກັດກັ້ນການລັກລອບຂົນສົ່ງຢາເສບຕິດປະເພດຕ່າງໆ ຜ່ານຊາຍແດນລາວ-ຫວຽດນາມ ພ້ອມທັງພັດທະນາວຽກງານບໍລິຫານຂອງດ່ານໃຫ້ທັນສະໄໝ, ມີລະບົບ ແລະ ຖືກຕ້ອງຕາມລະບຽບກົດໝາຍ, ມີການສະຫຼຸບຖອດຖອນບົດຮຽນ, ລາຍງານເປັນແຕ່ລະໄລຍະ ແລະ ວາງແຜນການເຄື່ອນໄຫວວຽກງານໃຫ້ລະອຽດ ມີການປະສານງານຢ່າງກົມກຽວ, ມີຄວາມສາມັກຄີເຮັດວຽກເປັນໝູ່ຄະນະ ເພື່ອຮັບປະກັນໃຫ້ການຈັດຕັ້ງປະຕິບັດວຽກງານຂອງດ່ານສາກົນນາເພົ້າບັນລຸຜົນສໍາເລັດຕາມແຜນການທີ່ວາງໄວ້. ຂ່າວ: ມະນີວັນ, ພາບ: ກອງຄໍາ
ຄໍາເຫັນ