 |
ທ່ານ ແສນສັກ ສຸລິສັກ ໄດ້ກ່າວເປີດພິທີວ່າ: ອ່າງຮັບນໍ້າເຊບັ້ງຫຽງ ເປັນອ່າງຮັບນໍ້າທີ່ມີຄວາມສຳຄັນຫຼາຍຂອງປະຊາຊົນແຂວງສະຫວັນນະເຂດ ແລະ ແຂວງສາລະວັນ, ເປັນເຂດທຳການຜະລິດກະສິກຳທີ່ກວ້າງໃຫຍ່ທີ່ສຸດໃນ ສປປ ລາວ ແຕ່ເຂດດັ່ງກ່າວ ແມ່ນໄດ້ຮັບຜົນກະທົບຈາກໄພພິບັດທາງທຳມະຊາດໃນທຸກໆປີ, ຍ້ອນການປ່ຽນແປງສະພາບພູມອາກາດ ຊຶ່ງໄດ້ສ້າງຜົນເສຍຫາຍຕໍ່ຊີວິດ ແລະ ຊັບສິນຂອງປະຊາຊົນ, ຂອງລັດ ເປັນຈຳນວນຫຼວງຫຼາຍເຊັ່ນ: ໂຄງລ່າງພື້ນຖານ, ເສດຖະກິດ-ສັງຄົມ ພ້ອມດຽວກັນນີ້, ເຂດດັ່ງກ່າວ ຍັງບໍ່ທັນມີລະບົບເຕືອນໄພທີ່ໄດ້ມາດຕະຖານເທົ່າທີ່ຄວນ. ສະນັ້ນ, ດ້ວຍຄວາມເປັນຫ່ວງເປັນໃຍຂອງລັດຖະບານຂອງ ສ. ເກົາຫຼີ ຈຶ່ງໄດ້ຊ່ວຍເຫຼືອສະໜັບສະໜູນໂຄງການຊ່ວຍເຫຼືອທາງການໃນການພັດທະນາ ຫຼື ໂຄງການໂອດີເອໃຫ້ແກ່ ສປປ ລາວ ເຊັ່ນ: ໂຄງການສ້າງຕັ້ງລະບົບພະຍາກອນ ແລະ ເຕືອນໄພນໍ້າຖ້ວມເຂົ້າໃນການປັບຕົວຕໍ່ກັບການປ່ຽນແປງສະພາບພູມອາກາດຢູ່ເຂດອ່າງນໍ້າເຊບັ້ງຫຽງ ແຂວງສະຫວັນນະເຂດ. ເປົ້າໜາຍຫຼັກໂຄງການນີ້, ແມ່ນເພື່ອພັດທະນາລະບົບພະຍາກອນ ແລະ ເຕືອນໄພນໍ້າຖ້ວມຢູ່ເຂດອ່າງນໍ້າເຊບັ້ງຫຽງ ແຂວງສະຫວັນນະເຂດ, ແນໃສ່ຫຼຸດຜ່ອນຄວາມເສຍຫາຍຈາກໄພພິບັດທາງທຳມະຊາດ ແລະ ເສີມສ້າງຄວາມທົນທານຕໍ່ການປ່ຽນແປງດິນຟ້າອາກາດ. ສະນັ້ນ, ໃນກອງປະຊຸມມື້ນີ້ ພວກເຮົາຈະໄດ້ຮັບຟັງການງານການຈັດຕັ້ງປະຕິບັດບັນດາກິດຈະກຳຕ່າງໆຂອງໂຄງການ ໂດຍສະເພາະຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ ແລະຄຳສະເໜີແນະຕ່າງໆ, ຫຼັງຈາກນັ້ນ ກໍ່ຈະໄດ້ເຊັນມອບ-ຮັບໂຄງການດັ່ງກ່າວໃຫ້ແກ່ພະແນກຊັບພະຍາກອນທຳມະຊາດ ແລະສິ່ງແວດລ້ອມ ແຂວງ ສະຫວັນນະເຂດ ແລະສາລະວັນ ເປັນຜູ້ຄຸ້ມຄອງ ແລະນຳໃຊ້ໃຫ້ມີປະສິດທິຜົນ.
ໃນວາລະດັ່ງກ່າວ, ຜູ້ເຂົ້າຮ່ວມຍັງໄດ້ຮັບຟັງການລາຍງານກ່ຽວກັບຜົນສຳເລັດໃນການຈັດຕັ້ງປະຕິບັດໂຄງການຊ່ວຍເຫຼືອທາງການເພື່ອການພັດທະນາ ຫຼື ໂຄງການ ODA ກ່ຽວກັບການສ້າງຕັ້ງລະບົບພະຍາກອນ ແລະ ເຕືອນໄພນໍ້າຖ້ວມເຂົ້າໃນການປັບຕົວຕໍ່ກັບການປ່ຽນແປງສະພາບພູມອາກາດ ຢູ່ເຂດອ່າງນໍ້າເຊບັ້ງຫຽງ ແຂວງສະຫວັນນະເຂດ. ຈາກນັ້ນ, ໃນພິທີ ກໍໄດ້ລົງນາມມອບ-ຮັບສະຖານີອຸທົກກະສາດຢູ່ເຂດອ່າງນໍ້າເຊບັ້ງຫຽງໃຫ້ພະແນກ ຊສ ແຂວງສະຫວັນນະເຂດ ແລະ ແຂວງສາລະວັນ ເປັນຜູ້ຄຸ້ມຄອງ ແລະ ນຳໃຊ້ຕໍ່ໄປ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ