ມອບອຸປະກອນສ້ອມແປງລົດ ແລະ ເຮືອໃຫ້ກອງບັນຊາການທະຫານແຂວງສະຫວັນນະເຂດ

ກົມໃຫຍ່ເຕັກນິກກອງທັບ ນຳໂດຍສະຫາຍ ພົນຈັດຕະວາ ຄຳແປງ ບົວລະບັດ ຄະນະກຳມະການພັກກົມໃຫຍ່ເຕັກນິກ ຫົວໜ້າກົມຄຸ້ມຄອງລົດ ແລະ ເຮືອກອງທັບ ພ້ອມຄະນະວິຊາການ ໄດ້ມອບເຄື່ອງອຸປະກອນສ້ອມແປງລົດ ແລະ ເຮືອຈຳນວນ 40 ລາຍການ ລວມມູນຄ່າ 108 ລ້ານກວ່າກີບ ພ້ອມທັງໄດ້ມອບເງິນສົດຈຳນວນ 40 ລ້ານກີບ ເພື່ອປະກອບສ່ວນໃນວຽກງານເຕັກນິກຂອງກອງບັນຊາການທະຫານແຂວງສະຫວັນນະເຂດ. 
ພິທີມອບ-ຮັບ ໄດ້ຈັດຂຶ້ນເມື່ອບໍ່ດົນມານີ້ ທີ່ກອງຮ້ອຍສ້ອມແປງ ກອງບັນຊາການທະຫານແຂວງ, ກ່າວຮັບໂດຍ ສະຫາຍ ພັນເອກ ຄໍາເພັດ ສຸລິຍະວົງ ຮອງເລຂາຄະນະພັກ ກອງບັນຊາການ ຫົວໜ້າການທະຫານກອງບັນຊາການທະຫານແຂວງສະຫວັນນະເຂດ ພ້ອມຄະນະນຳຫ້ອງເຕັກນິກ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ຫົວໜ້າການທະຫານ ກອງບັນຊາການທະຫານແຂວງ ໄດ້ກ່າວສະແດງຄວາມຂອບໃຈເປັນຢ່າງສູງຕໍ່ການນໍາກົມໃຫຍ່ເຕັກນິກ ກໍຄືກົມຄຸ້ມຄອງລົດ ແລະ ເຮືອ ໂດຍສະເພາະກະຊວງປ້ອງກັນປະເທດ ທີ່ໄດ້ເປັນຫ່ວງເປັນໃຍຕໍ່ກຳລັງປະກອບອາວຸດທ້ອງຖິ່ນທະຫານແຂວງສະຫວັນນະເຂດ ພ້ອມທັງໃຫ້ຄໍາໝັ້ນສັນຍາວ່າຈະນໍາເອົາເຄື່ອງອຸປະກອນດັ່ງກ່າວ ໄປນໍາໃຊ້ເຂົ້າໃນໜ້າທີ່ວຽກງານຢູ່ກົມກອງໃຫ້ເກີດຜົນປະໂຫຍດຢ່າງສູງສຸດ.
ຂ່າວ-ພາບ: ສະຫວັນນະເຂດ