ໃນວັນທີ 13 ທັນວາ ນີ້ ທີ່ສະໂມສອນ ເມືອງອຸທຸມພອນແຂວງສະຫວັນນະເຂດ
ທາງຫ້ອງການຊາວໜຸ່ມ ປະຊາຊົນ ປະຕິວັດລາວເມືອງ ໄດ້ຈັດພິທີມອບທຸງໄຊນໍາໜ້າ ແລະ ໃບຢັ້ງຢືນຊາວໜຸ່ມຕົວແບບ 4 ບຸກ ໃຫ້ຮາກຖານ ແລະ ໜ່ວຍທົ່ວເມືອງ,ໂດຍການເປັນປະທານຂອງທ່ານ ທອງໃສ ໄຊຍະວົງຄໍາດີ ເຈົ້າເມືອງອຸທຸມພອນ.
ໃນພິທີ, ທ່ານ ນາງ ສົມພອນ ອິນທິຈັກ ເລຂາຄະນະບໍລິຫານງານຊາວໜຸ່ມເມືອງ ກໍໄດ້ສະຫຼຸບສັງເກດຕີລາຄາຄືນກ່ຽວກັບຜົນງານການເຄື່ອນໄຫວວຽກງານໃນໄລຍະຜ່ານມາວ່າ: ທົ່ວເມືອງມີສະມາຊິກຊາວໜຸ່ມ 2.166ຄົນຍິງ 1.148ຄົນ,ປະກອບມີ 23 ຮາກຖານ, 116 ໜ່ວຍ,ໃນນີ້ຫ້ອງການອ້ອມຂ້າງ 4 ຮາກຖານ, 25 ໜ່ວຍ,ໂຮງຮຽນ 7 ຮາກຖານ, 21 ໜ່ວຍ,ບ້ານມີ 12 ຮາກຖານ,ມີ 70 ໜ່ວຍ,ອອກໃບອະນຸມັດພົ້ນກະສຽນຊາວໜຸ່ມໃຫ້ແຕ່ລະໜ່ວຍຊາວໜຸ່ມຈໍານວນ 22ຄົນຍິງ 10 ຄົນ,ພ້ອມທັງອອກໃບຍົກຍ້າຍໃຫ້ສະມາຊິກຊາວໜຸ່ມເພື່ອໄປສຶກສາຕໍ່ ແລະ ໄປປະຈໍາການບ່ອນໃໝ່ 7 ສະຫາຍຍິງ 4 ສະຫາຍ ແລະ ໄດ້ອະນຸມັດຮັບສະມາຊິກຊາວໜຸ່ມປະຊາຊົນ ປະຕິວັດລາວ ຢູ່ຂັ້ນໂຮງຮຽນ 580ຄົນ ຍິງ 324ຄົນ ຄຽງຄູ່ກັນນີ້ ກໍຍັງມີກອງທຶນຊ່ວຍເຫຼືອຊຶ່ງກັນເວລາເສຍຊີວິດຂອງສະມາຊິກຊາວໜຸ່ມຊຶ່ງມີສະມາຊິກທັງໝົດ 644ຄົນຍິງ 324ຄົນ,ຂະຫຍາຍສະມາຊິກເຂົ້າໃໝ່ໄດ້ເພີ່ມອີກ 6ຄົນຍິງ 1ຄົນ.
ສໍາລັບວຽກງານເຍົາວະຊົນ-ອະນຸຊົນທັນວາ ຊຶ່ງທົ່ວເມືອງມີເກນອາຍຸ 6-8 ປີມີ 3.123 ຄົນຍິງ 1.559 ຄົນ,ເຂົ້າເປັນສະມາຊິກເຍົາວະຊົນ 972ຄົນຍິງ 496ຄົນ, ຂະຫຍາຍໃໝ່ໄດ້ 249ຄົນຍິງ 111ຄົນ, ເກນອາຍຸ 9-14 ປີ ມີ 5.857ຄົນຍິງ 3.097ຄົນ, ເຂົ້າເປັນສະມາຊິກເຍົາວະຊົນທັນວາ 4.453ຄົນຍິງ 2.424ຄົນ, ຂະຫຍາຍໃໝ່ໄດ້ 873ຄົນຍິງ 471ຄົນ, ແບ່ງເປັນ 41 ກອງຮ້ອຍ,ໄດ້ຈັດແບ່ງເປັນໝວດ 109 ໝວດ,ຈັດແບ່ງເປັນໝູ່ໄດ້ 466 ໝູ່,ປະກາດເປັນກອງເຍົາວະຊົນແບບຢ່າງ 3 ດີ 4 ຮູ້ ສໍາເລັດແລ້ວເປັນຄັ້ງທີ VI ແລະ ວຽກງານດ້ານອື່ນໆກໍໄດ້ຮັບການຈັດຕັ້ງປະຕິບັດສໍາເລັດເຊັ່ນດຽວກັນ.
ຈາກນັ້ນ, ທ່ານ ນໍລະດີ ຈັນທະວົງ ຮອງເລຂາຊາວໜຸ່ມເມືອງ ກໍເປັນກຽດຜ່ານມະຕິຕົກລົງຂອງຄະນະບໍລິຫານງານຊາວໜຸ່ມເມືອງ ວ່າດ້ວຍການອະນຸມັດທຸງໄຊນໍາໜ້າ,ຂະບວນການແຂ່ງຂັນ 4 ບຸກ,ມະຕິ ວ່າດ້ວຍການມອບໃບຢັ້ງຢືນຊາວໜຸ່ມຕົວແບບ 4 ບຸກ ໃນຈໍານວນ 23 ຮາກຖານ ແລະ 92 ໜ່ວຍ,ໃຫ້ກຽດກ່າວມອບໂດຍແມ່ນທ່ານ ນາງ ສົມພອນ ອິນທິຈັກ ເລຂາຄະນະບໍລິຫານງານຊາວໜຸ່ມເມືອງ ມອບໃຫ້ແຕ່ລະຮາກຖານ ແລະ ແຕ່ລະໜ່ວຍຢ່າງສົມກຽດ.
ໂອກາດເຂົ້າຮ່ວມ, ທ່ານ ທອງໃສ ໄຊຍະວົງຄໍາດີ ກໍເນັ້ນວ່າ: ຈາກຜົນງານທີ່ຍາດມາໄດ້ກໍຂໍໃຫ້ພວກສະຫາຍສືບຕໍ່ຮັກສາແຊັມໄປເລື້ອຍໆ,ນອກຈາກນີ້ ກໍຂໍໃຫ້ບັນດາສະຫາຍສະມາຊິກຊາວໜຸ່ມແຕ່ລະຮາກຖານຈົ່ງພ້ອມກັນເອົາໃຈໃສ່ໃນການປູກ-ການລ້ຽງ ບໍ່ປະໃຫ້ພື້ນທີ່ເປົ່າວ່າງ ສິ່ງໃດທີ່ບໍ່ຈໍາເປັນ ບໍ່ວ່າຈະເປັນຜັກຫຍ້າ,ຂ່າຂິງ,ຜັກບົ່ວ ແລະ ພືດຜັກຕ່າງໆພວກເຮົາກໍບໍ່ຄວນຊື້ ເພື່ອຫຼຸດຜ່ອນການໃຊ້ຈ່າຍຂອງພວກເຮົາ,ສິ່ງສໍາຄັນອັນໜຶ່ງກໍຄື ການອະນາໄມຕາມສະຖານທີ່ຕ່າງໆ ເປັນຕົ້ນສໍານັກງານ,ຫ້ອງການ,ເດີ່ນຫ້ອງວ່າການ,ຕາມສາຍທາງ ຕ້ອງໃຫ້ມັນມີຄວາມສະອາດຈົບງາມຢູ່ເລື້ອຍໆ.
ຂ່າວ-ພາບ:ບຸນຊູ ພົມມະເທບ
ຄໍາເຫັນ