ໝູນໃຊ້ແນວຄິດ ໄກສອນ ພົມວິຫານ ກ່ຽວກັບການປົດປ່ອຍແມ່ຍິງ

ທ່ານ ນາງ ສິນທະມາລາ ລານາວັນ ຫົວໜ້າກົມໂຄສະນາ-ວັດທະນະທໍາ ສູນກາງສະຫະພັນແມ່ຍິງລາວ ໄດ້ລາຍງານຕໍ່ກອງປະຊຸມເຜີຍແຜ່ບົດຄົ້ນຄວ້າແນວຄິດ ໄກສອນ ພົມວິຫານ ກ່ຽວກັບວຽກງານແມ່ຍິງ ເມື່ອບໍ່ດົນມານີ້ ທີ່ນະຄອນຫຼວງວຽງຈັນວ່າ: ຄະນະພັກ, ອົງການປົກຄອງແຕ່ລະຂັ້ນ, ແຕ່ລະຂະແໜງການ ແລະ ສະຫະພັນແມ່ຍິງ ໄດ້ຫັນເອົາທິດຊີ້ນໍາດັ່ງກ່າວມາເປັນແຜນການຈັດຕັ້ງປະຕິບັດຕົວຈິງ, ຕາມທີ່ປະທານ ໄກສອນ ພົມວິຫານ ໄດ້ຍົກໃຫ້ເຫັນບັນດາຫຼັກການກ່ຽວກັບການຊີ້ນໍາປະຕິບັດແນວທາງນະໂຍບາຍຂອງພັກຕໍ່ບັນຫາປົດປ່ອຍແມ່ຍິງລວມມີ 5 ຫຼັກການຄື: 1) ເພີ່ມທະວີການນໍາຂອງພັກຕໍ່ວຽກງານຂົນຂວາຍແມ່ຍິງ; 2) ເສີມຂະຫຍາຍບົດບາດ, ຄວາມຮັບຜິດຊອບຂອງກົງຈັກລັດ ຊຶ່ງເປັນເຄື່ອງມືຕົ້ນຕໍສໍາລັບປະຕິບັດແນວທາງຂອງພັກກ່ຽວກັບການຂົນຂວາຍແມ່ຍິງ; 3) ເສີມຂະຫຍາຍຄວາມຮັບຜິດຊອບຂອງບັນດາອົງການຈັດຕັ້ງມະຫາຊົນໃນການປະຕິບັດແນວທາງປົດປ່ອຍແມ່ຍິງ; 4) ພາລະບົດບາດຂອງສະຫະພັນແມ່ຍິງໃນໄລຍະໃໝ່ຂອງການປະຕິວັດ; 5) ກ່ຽວກັບໜ້າທີ່ຂອງສະຫະພັນແມ່ຍິງ. ພ້ອມນັ້ນ, ພັກເຮົາໄດ້ວາງແຜນນະໂຍບາຍ, ວິທີການຫຼາຍອັນ ເພື່ອປຸກລະດົມຊຸກຍູ້ແມ່ຍິງເຂົ້າຮ່ວມໃນທຸກຂົງເຂດວຽກງານ ໃນຖານະຜູ້ເປັນເຈົ້າຂອງປະເທດຊາດ, ເປັນເຈົ້າຊາຕາກຳຂອງຕົນ. ແມ່ຍິງບັນດາເຜົ່າ ໄດ້ຮັບການຮໍ່າຮຽນການເມືອງ, ໄດ້ຮັບການລຶບລ້າງຈາກໄພບໍ່ຮູ້ໜັງສື, ໄດ້ຮັບການບຳລຸງວັດທະນະທຳ, ໄດ້ຮໍ່າຮຽນວິຊາສະເພາະຫຼາຍຂະແໜງ, ສຸຂະພາບຂອງແມ່ຍິງ ແລະ ລູກເຕົ້າ ກໍໄດ້ຮັບການເບິ່ງແຍງດູແລ ຈາກພັກ ແລະ ລັດ ມີແມ່ຍິງຫຼາຍຄົນໄດ້ປະກອບສ່ວນເຂົ້າໃນອົງການນໍາຂອງບັນດາຮາກຖານການຜະລິດ, ທຸລະກິດ, ໃນອົງການຂອງພັກ ແລະ ລັດ ແຕ່ສູນກາງລົງເຖິງທ້ອງຖິ່ນ.

ໃນກອງປະຊຸມໃຫຍ່ຂອງພັກແຕ່ລະຄັ້ງ ພັກໄດ້ເອົາໃຈໃສ່ວາງແນວທາງນະໂຍບາຍ ເພື່ອປົດປ່ອຍແມ່ຍິງທາງດ້ານຈິນຕະນາການ, ປົດປ່ອຍອອກຈາກຄວາມທຸກຍາກ, ປົດປ່ອຍອອກຈາກແອກຮີດຄອງປະເພນີ ທີ່ມີຜົນກະທົບຕໍ່ບັນຫາສຸຂະພາບ ແລະ ການພັດທະນາແມ່ຍິງເອງ, ປົດປ່ອຍອອກຈາກຄວາມບໍ່ສະເໝີພາບ ແລະ ສົ່ງເສີມຄວາມກ້າວໜ້າຂອງແມ່ຍິງ “ສະມາຊິກສະຫະພັນແມ່ຍິງຕະ ຫຼອດຮອດແມ່ຍິງລາວບັນດາເຜົ່າໃຫ້ສູ້ຊົນຝຶກຝົນຫຼໍ່ຫຼອມຕົນເອງ ແລະ ບຸກທະລຸໃຫ້ໄດ້ດ້ານຈິນຕະນາ ການດ້ວຍການປ່ຽນແປງໃໝ່, ປົດປ່ອຍ ແລະ ແກ້ໄຂໃຫ້ໄດ້ທັດສະນາແນວຄິດແບບຄໍາພິຕາຍຕົວ, ຮັກສາເດີມ, ໃຈນ້ອຍ, ຄັບແຄບ, ອະຄະຕິ, ແນວຄິດຈໍາແນກເພດຍິງດ້ວຍກັນ, ບໍ່ຍອມຮັບ ແລະ ບໍ່ສະໜັບສະໜູນ ຊຶ່ງກັນ ແລະ ກັນ, ແກ້ແນວຄິດງໍ້ງ່ຽງ, ບໍ່ກ້າຫານ, ຈົ່ງຈຽມ, ບໍ່ກ້າປະເຊີນກັບການທ້າທາຍທົດສອບກັບວຽກງານທີ່ໄດ້ຮັບມອບໝາຍ. ນອກຈາກຄໍາເຫັນສະເພາະແມ່ຍິງແລ້ວທຸກຄົນ, ທຸກພາກສ່ວນໃນສັງຄົມ ກໍຕ້ອງໄດ້ເຂົ້າໃຈ ແລະ ໃຫ້ການຮ່ວມມື ເພື່ອເຮັດໃຫ້ວຽກງານພັດທະນາແມ່ຍິງ ສຳເລັດຜົນຕາມຄາດໝາຍ. ສໍາລັບເພດຊາຍກໍໃຫ້ຕ້ານກັບທັດສະນະອະຄະຕິ, ຄວາມຊິນເຄີຍ ແລະ ຮີດຄອງອັນເກົ່າແກ່ຫຼ້າຫຼັງ ທີ່ມີລັກສະນະຈໍາແນກແມ່ຍິງ, ຖືແມ່ຍິງເປັນເພດອ່ອນແອ, ເປັນຜູ້ຄອຍຮັບໃຊ້ຄອບຄົວ ແລະ ສັງຄົມ. ອັນພາໃຫ້ມີຊ່ອງຫວ່າງເກີດມີການໃຊ້ຄວາມຮຸນແຮງຕໍ່ແມ່ຍິງ ແລະ ເດັກໃນຮູບແບບຕ່າງໆ.