ເມືອງແບງ ປະກາດຮັບຮອງບ້ານໂພໄຊ ເປັນບ້ານວັດທະນະທຳໃໝ່

ພິທີປະກາດຮັບຮອງບ້ານໂພໄຊ ເມືອງແບງ ແຂວງອຸດົມໄຊ ເປັນບ້ານວັດທະນະທໍາໃໝ່ໄດ້ຈັດຂຶ້ນໃນວັນທີ 18 ທັນວາຜ່ານມາ, ທີ່ບ້ານດັ່ງກ່າວ ໂດຍການເຂົ້າຮ່ວມຂອງທ່ານ ຄໍາພອນ ພີມມະລາດ ຮອງເລຂາພັກເມືອງ ປະທານກວດກາພັກ-ລັດເມືອງ, ມີທ່ານ ບຸນທັນ ສຸລິຍະວົງ ຫົວໜ້າພະແນກຖະແຫຼງຂ່າວ, ວັດທະນະ ທຳ ແລະ ທ່ອງທ່ຽວແຂວງອຸດົມໄຊ, ມີຫົວໜ້າຫ້ອງການ ຖວທ ເມືອງພ້ອມດ້ວຍປະຊາຊົນພາຍໃນບ້ານເຂົ້າຮ່ວມ.
     ບ້ານໂພໄຊ ປະກອບມີ 279 ຄອບຄົວ, ມີພົນລະເມືອງ 1.409 ຄົນ, ຍິງ 634 ຄົນ, ເປັນຊົນເຜົ່າມົ້ງ ກວມ 100% ປະຊາຊົນສ່ວນໃຫຍ່ທຳການຜະລິດປູກຝັງ-ລ້ຽງສັດ ແລະ ຄ້າຂາຍ. ບ້ານດັ່ງກ່າວມີການພັດທະນາ ພົ້ນເດັ່ນຫຼາຍດ້ານ ໂດຍສະເພາະວຽກງານການສຶກສາ, ສາທາລະນະສຸກ, ວັດທະນະທຳ ແລະ ທ່ອງທ່ຽວ, ສະ ຫວັດດີການສັງຄົມ, ປກຊ-ປກສ ແລະ ວຽກງານອົງການຈັດຕັ້ງມະຫາຊົນ. 
    ຜ່ານການປະເມີນບ້ານວັດທະນະທຳໃໝ້ຕົວຈິງ ໂດຍລວມແລ້ວເຫັນວ່າ: ບ້ານໂພໄຊ ສາມາດບັນລຸຕາມມາດຖານເງື່ອນໄຂໃນການສ້າງຄອບຄົວ ແລະ ບ້ານວັດທະນະທຳໃໝ່ດັ່ງນັ້ນເຈົ້າແຂວງອຸດົມໄຊ ຈຶ່ງໄດ້ອອກຂໍ້ຕົກລົງວ່າດ້ວຍການຮັບຮອງເອົາບ້ານໂພໄຊ ເມືອງແບງ ເປັນບ້ານວັດທະນະທຳໃໝ່ ເປັນບ້ານທີ 49 ຂອງເມືອງ ໃຫ້ກຽດມອບໃບຢັ້ງຢືນໂດຍທ່ານ ບຸນທັນ ສຸລິຍະວົງ. 
    ໂອກາດນີ້, ທ່ານ ຄໍາພອນ ພີມມະລາດ ໄດ້ໃຫ້ກຽດໂອ້ລົມໂດຍເນັ້ນໜັກໃຫ້ປະຊາຊົນພາຍໃນບ້ານ ອະນຸລັກ, ປົກປັກຮັກສາ ແລະ ສົ່ງເສີມຮີດຄອງປະເພນີ, ວັດທະນະທໍາອັນດີງາມຂອງຊາດ ກໍຄືຂອງເຜົ່າ, ການນຸ່ງຖື, ການປາກເວົ້າເພື່ອສົ່ງເສີມໃຫ້ຢືນຍົງຄຽງຄູ່ກັບຄົນລາວຕະຫຼອດໄປ. ຈາກນັ້ນຄະນະປະທານໄດ້ຕັດແຖບຜ້າ, ລັ່ນຄ້ອງ 9 ບາດ ພ້ອມທັງເປີດປ້າຍເພື່ອປະກາດຮັບຮອງເອົາບ້ານໂພໄຊ ເປັນບ້ານວັດທະນະທຳໃໝ່ຢ່າງເປັນທາງການ.
ຂ່າວ: ກິ່ງມະນີ