ເມືອງແບງ ສະຫຼອງວັນແມ່ຍິງສາກົນຄົບຮອບ 114 ປີ.

ສະຫະພັນແມ່ຍິງ ເມືອງແບງ ແຂວງອຸດົມໄຊ ໄດ້ຈັດພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 114 ປີ (8 ມີນາ 1910-8 ມີນາ 2024) ຂຶ້ນເມື່ອບໍ່ດົນມານີ້ ທີ່ສະໂມສອນຂອງເມືອງແບງ, ພາຍໃຕ້ການເປັນປະທານຂອງທ່ານ ນາງ ແພງພັນ ອານຸວົງ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ, ມີຄະນະບໍລິຫານງານສະຫະພັນແມ່ຍິງເມືອງ, ປະທານ, ຮອງປະທານສະຫະພັນແມ່ຍິງບ້ານເທດສະບານ ເຂົ້າຮ່ວມຮັງ.
ທ່ານ ນາງ ແພງພັນ ອານຸວົງ ໄດ້ຍົກໃຫ້ເຫັນປະຫວັດການເຄື່ອນໄຫວຂອງແມ່ຍິງໃນທົ່ວໂລກ ໃນການຍາດເອົາສິດທິ ແລະ ຜົນປະໂຫຍດອັນຊອບທໍາມາສູ່ແມ່ຍິງ ທັງເປັນການເຊີດຊູບົດບາດ ແລະ ຄວາມອາດສາມາດຂອງເອື້ອຍນ້ອງແມ່ຍິງ ເຮັດໃຫ້ເອື້ອຍນ້ອງແມ່ຍິງຮັບຮູ້, ເຂົ້າໃຈເຖິງປະຫວັດຄວາມເປັນມາໃນການຕໍ່ສູ້ຂອງແມ່ຍິງໃນທົ່ວໂລກ ເພື່ອທວງໃຫ້ພວກສັກດີນາ ແລະ ພວກນາຍທຶນ ຊຶ່ງເປັນເຈົ້າຂອງໂຮງຈັກ, ໂຮງງານ ແກ້ໄຂຊີວິດການເປັນຢູ່ ຂອງແມ່ຍິງ ດ້ວຍການຫຼຸດຜ່ອນຊົ່ວໂມງການເຮັດວຽກ ໃຫ້ເຫຼືອ 8 ຊົ່ວໂມງຕໍ່ມື້, ໄດ້ຮັບຄ່າແຮງງານທຽບເທົ່າກັບເພດຊາຍ, ໄດ້ຮັບສະຫວັດດີການທີ່ດີ, ຢຸດເຊົາການກົດຂີ່ຂຸດຮີດແຮງງານເດັກນ້ອຍ ແລະ ແມ່ຍິງ, ໃຫ້ມີສິດສະເໝີພາບເທົ່າທຽມກັບເພດຊາຍ ແລະ ມີສິດໃນການອອກສຽງ ໃນການຮັບສະໝັກເລືອກຕັ້ງ ແລະ ອື່ນໆ, ຮັບຮູ້, ເຂົ້າໃຈກ່ຽວກັບບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆ ກ່ຽວກັບແມ່ຍິງ ໃນລະດັບສາກົນ, ອາຊຽນ ແລະ ພາກພື້ນ, ນະໂຍບາຍ ແລະ ກົນໄກ ສົ່ງເສີມຄວາມກ້າວໜ້າຂອງແມ່ຍິງໃນ ສປປ ລາວ ແລະ ການພົວພັນຮ່ວມມື ກັບຕ່າງປະເທດຕື່ມອີກ. 
(ຂ່າວ: ສະຫະພັນແມ່ຍິງ ເມືອງແບງ)