 |
ທ່ານ ອານຸສິດ ມະໂນສິນ ປະທານການຈັດງານບຸນແຂ່ງຂັນຊ່ວງເຮືອກໍໄດ້ກ່າວວ່າ: ຈຸດປະສົງກໍເພື່ອເປັນການສືບຕໍ່ອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງຊາດ, ຂອງທ້ອງຖິ່ນ ແລະ ບັນດາເຜົ່າ ຕິດພັນກັບການກະຕຸກຊຸກຍູ້ທາງດ້ານເສດຖະກິດ-ສັງຄົມ ທັງເປັນການສົ່ງເສີມການທ່ອງທ່ຽວຂອງເມືອງ ໃຫ້ເປີດກວ້າງອອກສູ່ສາຍຕາຂອງມວນຊົນທັງພາຍໃນ ແລະ ຕ່າງປະເທດ. ການຈັດງານຄັ້ງນີ້, ມີກິດຈະກໍາຫຼາຍຢ່າງເຊັ່ນ: ໃນຕອນແລງຂອງວັນທີ 6 ຕຸລາ 2025 ໄດ້ມີການແຫ່ ຜາສາດເຜິ້ງຢູ່ວັດແຫ່ງຕ່າງໆໃນທົ່ວເມືອງ ແລະ ຕອນຄ່ຳໄດ້ຊົມການສະແດງສິລະປະວັນນະຄະດີຂອງນ້ອງນັກຮຽນ ແລະ ທ່ຽວຊົມຕະຫຼາດນັດ.
ສຳລັບການແຂ່ງຂັນຊ່ວງເຮືອປີນີ້, ມີເຮືອຊ່ວງເຂົ້າຮ່ວມແຂ່ງຂັນ ທັງໝົດ 17 ທິມ. ໃນນີ້, ມີເຮືອຊ່ວງພາຍໃນເມືອງເພດຊາຍເຂົ້າຮ່ວມ 6 ທີມ, ເພດຍິງ 4 ທີມ ແລະ ມີເຮືອຊ່ວງຂອງນັກທຸລະກິດຕ່າງເມືອງ ເຂົ້າຮ່ວມ 7 ທິມ. ຜົນການແຂ່ງຂັນມີດັ່ງນີ້: ເຮືອຊ່ວງເພດຊາຍ: ທີ 1 ແມ່ນເຮືອຂອງບ້ານນາສ້ານ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 7 ລ້ານກີບ, ທີ 2 ເຮືອບ້ານ ຕາລິ່ງ ໄດ້ຮັບເງິນສົດ 6 ລ້ານກີບ ແລະ ທີ 3 ເຮືອບ້ານ ນ້ຳພຸ ໄດ້ຮັບເງິນສົດ 5 ລ້ານກີບ, ເຮືອຊ່ວງເພດຍິງ: ທີ 1 ເຮືອບ້ານຕາລິ່ງ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 7 ລ້ານກີບ, ທີ 2 ເຮືອບ້ານ ນາກອກ ໄດ້ຮັບເງິນສົດ 6 ລ້ານກີບ ແລະ ທີ 3 ເຮືອບ້ານເມືອງຮຳ ໄດ້ເງິນສົດ 5 ລ້ານກີບ, ເຮືອນັກທຸລະກິດ ຕ່າງເມືອງ: ທີ 1 ເຮືອບໍລິສັດ ຈັນທະວົງກໍ່ສ້າງຂົວທາງ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 7 ລ້ານກີບ, ທີ 2 ເຮືອພອນທິດານາວາ ໄດ້ຮັບເງິນສົດ 6 ລ້ານກີບ ແລະ ທີ 3 ເຮືອພອນພະເຈົ້າຊຽງຍືນ-ຜູ້ບ່າວໄທບ້ານ ໄດ້ຮັບເງິນສົດ 5 ກີບ
ໂອກາດນີ້, ທ່ານ ບຸນພະລັງ ວິໄລສັກ ເລຂາພັກເມືອງ ຕາງໜ້າຄະນະພັກ-ອົງການປົກຄອງເມືອງ ໄດ້ກ່າວສະແດງຄວາມຂອບໃຈຢ່າງສູງຕໍ່ອົງການຈັດຕັ້ງພັກ-ລັດ, ບໍລິສັດ, ຫ້າງຮ້ານ, ນັກທຸລະກິດ, ພໍ່ຄ້າ-ຊາວຂາຍ ແລະ ປະຊາຊົນໃນທົ່ວເມືອງທີ່ໄດ້ໃຫ້ການອຸປະຖຳທາງດ້ານວັດຖຸປັດໃຈ ແລະ ພ້ອມກັນຈັດງານປະເພນີ ບຸນຊ່ວງເຮືອປະຈຳປີນີ້ ສຳເລັດລົງດ້ວຍບັນຍາກາດຄຶກຄື້ນມ່ວນຊື່ນ ແລະ ມີຄວາມສະຫງົບປອດໄພ.
(ຂ່າວ-ພາບ: ສາຍຄຳ ບຸນຍາວົງລາຍງານ)
ຄໍາເຫັນ