 |
ທ່ານ ຄຳພັນ ຈັນປະເສີດ ຮັກສາການ ຫົວໜ້າຫ້ອງການພາຍໃນເມືອງ ໄດ້ຜ່ານບົດລາຍງານກ່ຽວກັບການຈັດຕັ້ງປະຕິບັດວຽກງານຄຸ້ມຄອງພົນລະເມືອງ ຂອງຫ້ອງການພາຍໃນ ທີ່ຈະມອບ-ໂອນ ໄປຍັງກອງບັນຊາການປ້ອງການຄວາມສະຫງົບເມືອງ ໄລຍະຜ່ານມາ. ຈາກນັ້ນ, ທ່ານ ບຸນສາລີ ແສງດາວົງ ກຳມະການໃນຄະນະປະຈຳພັກຫົວໜ້າຄະນະຈັດຕັ້ງເມືອງໄດ້ຜ່ານຂໍ້ຕົກລົງສະບັບເລກທີ 85/ພນມ, ລົງວັນທີ 16 ກັນຍາ 2025 ແລະ ຂໍ້ຕົກລົງ ສະບັບເລກທີ 378/ມບຕ, ລົງວັນທີ 11 ກັນຍາ 2025. ວ່າດ້ວຍການມອບ-ໂອນວຽກຄຸ້ມຄອງພົນລະເມືອງ, ພ້ອມດ້ວຍພະນັກງານ-ລັດຖະກອນ ແລະ ວັດຖຸອຸປະກອນຮັບໃຊ້ວຽກງານວິຊາສະເພາະທັງໝົດ ໄປຂຶ້ນກັບກອງບັນຊາການປ້ອງກັນຄວາມສະຫງົບເມືອງບຸນໃຕ້. ພ້ອມດຽວກັນນັ້ນຜູ້ເຂົ້າຮ່ວມ ຍັງໄດ້ປະກອບຄຳຄິດຄຳເຫັນຢ່າງກົງໄປກົງມາ. ຈາກນັ້ນ, ກໍໄດ້ເຊັນບົດບັນທຶກການ ມອບ-ໂອນ ວຽກງານດັ່ງກ່າວ ລະຫວ່າງ ທ່ານ ຄຳພັນ ຈັນປະເສີດ ຮັກສາການຫົວໜ້າຫ້ອງການພາຍໃນເມືອງ ແລະ ທ່ານ ພັທ ຄຳເຫຼັກ ພະລັງຈັນ ກຳມະການໃນຄະນະປະຈຳພັກເລຂາຄະນະພັກຮາກຖານຫົວໜ້າກອງບັນຊາການປ້ອງກັນຄວາມສະຫງົບເມືອງ.
ຕອນທ້າຍ, ທ່ານ ອຸ່ນແປງ ທຳມະໂນໄຊ ໄດ້ເນັ້ນໜັກຄືນກ່ຽວກັບຄວາມຈຳເປັນໃນການປັບປຸງກົງຈັກໃນຄັ້ງນີ້ ຊຶ່ງເປັນໜ້າທີ່ການເມືອງອັນຮີບດ່ວນ ແລະ ຈະຕ້ອງໄດ້ປັບປຸງໄປຕາມແນວທາງຂອງພັກ. ພ້ອມທັງມອບໃຫ້ຄະນະພັກ, ຄະນະບັນຊາ ໃຫ້ສືບຕໍ່ເອົາໃຈໃສ່ວຽກງານການເມືອງແນວຄິດ ໃຫ້ແກ່ສະມາຊິກພັກ-ພະນັກງານ ເຂົ້າໃຈຕໍ່ການປັບປຸງກົງຈັກການຈັດຕັ້ງໃນຄັ້ງນີ້ ແນໃສ່ໃຫ້ມີຄວາມສະຫງົບແລະ ມີຜົນສຳເລັດໃນໜ້າທີ່ວຽກງານ. ພາຍຫຼັງທີ່ໂຮມເຂົ້າກັນແລ້ວໃຫ້ສືບຕໍ່ເຕົ້າໂຮມຄວາມສາມັກຄີ. ຄຽງຄູ່ກັນນັ້ນ, ໃຫ້ຂຸ້ນຂ້ຽວປັບປຸງພາລະບົດບາດ, ຄົ້ນຄວ້າປັບປຸງຊັບຊ້ອນບຸກຄະລາກອນ ໃຫ້ສອດຄ່ອງກັບພາລະບົດບາດອີງໃສ່ບຸກຄະລາກອນທີ່ມີຕົວຈິງ; ສຳລັບພະນັກງານທີ່ຍ້າຍໄປເຮັດວຽກຢູ່ບ່ອນໃໝ່ ແມ່ນໃຫ້ມີແນວຄິດຫຼັກໝັ້ນ, ອຸ່ນອຽນ, ທຸ່ນທ່ຽງ ຕໍ່ການນຳພາ ກໍຄືການປະຕິບັດໜ້າທີ່ວຽກງານ ໃຫ້ມີຜົນສຳເລັດເປັນກ້າວໆ.
(ແຫຼ່ງຂ່າວ: ແຂວງຜົ້ງສາລີ)
ຄໍາເຫັນ