 |
ທ່ານ ແສງສາທິດ ພິມເມືອງ ໄດ້ກ່າວວ່າ: ຈຸດປະສົງຫຼັກຂອງກິດ ຈະກຳຄັ້ງນີ້ ແມ່ນເພື່ອສຸມໃສ່ການເກັບມ້ຽນຂີ້ເຫຍື້ອທີ່ຕົກຄ້າງຕາມຮ່ອມ ແລະ ຊຸມຊົນຕ່າງໆ ເຖິງວ່າຈະມີການຂົນສົ່ງຂີ້ເຫຍື້ອເປັນປະຈຳ ແຕ່ຍັງມີປະຊາຊົນບາງສ່ວນທີ່ຖິ້ມຂີ້ເຫຍື້ອຊະຊາຍ ເຮັດໃຫ້ເກີດຄວາມບໍ່ສະອາດ ແລະ ເປັນສາເຫດຫຼັກທີ່ເຮັດໃຫ້ການລະບາຍນ້ຳບໍ່ສະດວກ ພ້ອມນີ້ທ່ານຍັງໄດ້ເນັ້ນໜັກເຖິງຄວາມສຳຄັນຂອງການກຽມພ້ອມຮັບມືກັບລະດູຝົນວ່າ: ບັນຫາຂີ້ເຫຍື້ອແມ່ນສາເຫດສຳຄັນທີ່ເຮັດໃຫ້ຕັນທໍ່ລະບາຍນ້ຳ ເວລາຝົນຕົກໜັກ ຈະມີນ້ຳຖ້ວມຂັງຕາມເສັ້ນທາງປະມານ 20-30 ນາທີ ຍ້ອນຂີ້ເຫຍື້ອໄຫຼໄປປົກປິດປາກທໍ່ ແລະ ຮ່ອງລະບາຍນໍ້າ ຫຼັກ.
 |
ສຳລັບແຜນການໃນຕໍ່ໜ້າທາງເມືອງຈະສືບຕໍ່ປະສານງານກັບພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງ ແລະ ຫ້ອງການຄຸ້ມຄອງ ແລະ ບໍລິການຕົວເມືອງ (ຄບຕ) ເພື່ອລ່ວງຜັກຕົບ ແລະ ອະນາໄມຮ່ອງລະບາຍນ້ຳສາຍຫຼັກໂດຍສະເພາະຮ່ອງແຊງກ່ອນທີ່ລະດູຝົນຈະມາເຖິງ.
 |
ນອກຈາກການອະນາໄມແລ້ວ ທາງອົງການປົກຄອງເມືອງ ຍັງໄດ້ໃຫ້ຄວາມສຳຄັນກັບການປູກຈິດສຳນຶກໃຫ້ແກ່ເຍົາວະຊົນ ແລະ ນັກຮຽນ ເພື່ອໃຫ້ເຂົາເຈົ້າເຂົ້າໃຈວ່າບັນຫາຂີ້ເຫຍື້ອແມ່ນຄວາມ ຮັບຜິດຊອບຂອງທຸກຄົນໃນສັງຄົມ ພ້ອມທັງຊຸກຍູ້ໃຫ້ແຕ່ລະຄົວເຮືອນມີການຄັດແຍກຂີ້ເຫຍື້ອ ແລະ ນຳອອກມາຕາມກຳນົດເວລາ ເພື່ອຄວາມສະດວກໃນການຂົນສົ່ງໄປກຳຈັດຢູ່ສະໜາມຂີ້ເຫຍື້ອຫຼັກ 32 ແລະ ຮຽກຮ້ອງໃຫ້ມວນຊົນທຸກພາກສ່ວນ ເປັນຫູເປັນຕາຊ່ວຍກັນເຝົ້າລະວັງການຖິ້ມຂີ້ເຫຍື້ອຊະຊາຍ ແລະ ໃຫ້ຄວາມຮ່ວມມືກັບພາກລັດ ເພື່ອເຮັດໃຫ້ເມືອງຈັນທະບູລີ ມີຄວາມ ສະອາດ ແລະ ປາສະຈາກບັນຫານ້ຳຖ້ວມຂັງຢ່າງຍືນຍົງ. (ແຫຼງຂ່າວ ວຽງຈັນໃໝ່. ຂ່າວ:ຕຸໄລເພັດ)
ຄໍາເຫັນ