ເມືອງຈັນທະບູລີ ກຽມພ້ອມຮອບດ້ານ ບຸນຊ່ວງເຮືອທ່າວັດຈັນປະຈຳປີ 2023

ບຸນອອກພັນສາປະວໍລະນາ ແລະ ບຸນຊ່ວງເຮືອທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ (ນວ) ເປັນໜຶ່ງປາງບຸນໃຫຍ່ປະຈຳຊາດ ທີ່ມີຄວາມໝາຍ-ຄວາມສຳຄັນທາງຮີດຄອງປະເພນີລາວ ທີ່ເຄີຍສືບທອດກັນມາຮອດປັດຈຸບັນ ທັງຈັດຂຶ້ນໃນທຸກໆ. ປີນີ້ແມ່ນກົງກັບວັນທີ 29-30 ຕຸລາ 2023 (ມື້ຂຶ້ນ 15 ຄໍ່າ-ມື້ແຮມ 1 ຄໍ່າ ເດືອນພະຈິກ ພ.ສ 2566). ປັດຈຸບັນ ເມືອງຈັນທະບູລີ ນວ ໄດ້ມີຄວາມພ້ອມຮອບດ້ານ ໄລຍະບຸນຊ່ວງເຮືອທ່າວັດຈັນໃນປີນີ້ ເພື່ອເຮັດໃຫ້ບຸນປະເພນີດັ່ງກ່າວ ມີຄວາມເປັນລະບຽບຮຽບຮ້ອຍ, ຮັກສາໄດ້ຄວາມສະຫງົບ, ຄວາມປອດໄພ. ໃນນັ້ນ, ຍັງເນັ້ນໃສ່ການຮັກສາຄວາມສະອາດ, ເກັບມ້ຽນຂີ້ເຫຍື້ອຢູ່ພາຍໃນຕະຫຼອດງານບຸນໃຫ້ມີຄວາມສະອາດງາມຕາ.
ທ່ານ ແກ້ວປະເສີດ ໄຊປັນຍາ ຮອງເຈົ້າເມືອງຈັນທະບູລີ ໃຫ້ສຳພາດຕໍ່ສື່ມວນຊົນ ເມື່ອບໍ່ດົນມານີ້ວ່າ: ເພື່ອຮັກສາຄວາມສະອາດ ເຮັດໃຫ້ສະຖານທີ່ຈັດບຸນອອກພັນສາປະວໍລະນາ ຫຼື ບຸນຊ່ວງເຮືອທ່າວັນຈັນ ມີຄວາມສະອາດງາມຕາ ເມືອງຈັນທະບູລີ ໄດ້ກຽມພ້ອມຮອບດ້ານ ໂດຍໄດ້ມອບໃຫ້ແຕ່ລະອະນຸກຳມະການ ໂດຍສະເພາະອະນຸກຳມະການຮັກສາຄວາມສະອາດ ແລະ ອະນາໄມຕົວເມືອງ ສົມທົບກັບຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໃຫ້ນຳເອົາຖັງຂີ້ເຫຍື້ອ 15 ຖັງ ໄປວາງໄວ້ແຕ່ລະຈຸດ ເພື່ອເສີມໃສ່ຖັງຂີ້ເຫຍື້ອທີ່ມີຢູ່ແລ້ວຢູ່ພາຍໃນສ່ວນສາທາລະນະເຈົ້າອານຸວົງ ທັງໝົດ 70 ກວ່າຖັງ ແລະ ສະຖານທີ່ຈັດງານຕ້ອງມີຄວາມສະອາດຕະຫຼອດການຈັດງານ.
ທ່ານ ວິໄລສັກ ມະຫາທິລາດ ປະທານບໍລິສັດອະນາໄມ ຈັນທະບູລີ ຈຳກັດ ຍັງໃຫ້ຮູ້ວ່າ: ບໍລິສັດພວກເຮົາໄດ້ນຳໃຊ້ພະນັກງານ 60 ກວ່າຄົນ ເພື່ອກຽມຄວາມພ້ອມການຈັດຕັ້ງປະຕິບັດເກັບມຽ້ນຂີ້ເຫຍື້ອ ໄລຍະບຸນອອກພັນສາປະວໍລະນາຢູ່ທ່າວັດຈັນໃນປີນີ້, ໂດຍໄດ້ແບ່ງພະນັກງານປະຈຳຢູ່ແຕ່ລະຈຸດ ເພື່ອການເກັບມ້ຽນຂີ້ເຫຍື້ອ ໂດຍຈະເລີ່ມເກັບມ້ຽນຂີ້ເຫຍື້ອ ແຕ່ເວລາ 23:00 ໂມງ ເປັນຕົ້ນໄປ ໂດຍຈະຂົນຂີ້ເຫຍື້ອໄປຖິ້ມ 4 ຖ້ຽວຕໍ່ມື້. ພ້ອມນີ້, ຍັງຈະໄດ້ນຳໃຊ້ລົດເກັບຂີ່ເຫຍື້ອໄຟຟ້າຂະໜາດນ້ອຍ 3 ຄັນ ເລາະກັບມ້ຽນຂີ້ເຫຍື້ອໃນຕອນກາງເວັນ ເພື່ອບໍ່ໃຫ້ມີຂີ້ເຫຍື້ອຕົກຄ້າງໃນແຕ່ລະວັນ. 
ຢ່າງໃດກໍຕາມ ຂໍໃຫ້ມວນຊົນທີ່ມາທ່ຽວງານບຸນດັ່ງກ່າວ ຈົ່ງຊ່ວຍກັນຮັກສາຄວາມສະອາດເວລາກິນ ຫຼື ຮັບປະທານອາຫານ, ເຄື່ອງດື່ມ ແລະ ອື່ນໆ ໝົດແລ້ວຕ້ອງຖີ້ມເສດອາຫານ, ຖົງຢາງໃສ່ຖັງຂີ້ເຫຍື້ອຕາມຈຸດຕ່າງໆທີ່ພາກສ່ວນກ່ຽວຂ້ອງນຳມາວາງໄວ້ໃຫ້ເປັນລະບຽບຮຽບຮ້ອຍ ທັງໝົດກໍເພື່ອຄວາມສະອາດງາມຕາພາຍໃນງານບຸນ.
      (ຂ່າວ: ວັນເພັງ, ຂໍ້ມູນ: ຂ່າວສານປະເທດລາວ)