 |
ທ່ານ ສາຍຄໍາ ແກ້ວບຸນປານ ກໍາມະການພັກແຂວງເລຂາພັກເມືອງປະທານຄະນະກໍາມະການເລືອກຕັ້ງເມືອງກະລຶມ ໄດ້ລາຍງານວ່າ: ການຫ້າງຫາກະກຽມໃຫ້ແກ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໃນແຕ່ລະໄລຍະ, ແຕ່ລະຂັ້ນຕອນ ແມ່ນມີຜົນສໍາເລັດ ແລະ ມີຄວາມພ້ອມ. ໃນນີ້, ໄດ້ສໍາເລັດການຈັດກອງປະຊຸມຝຶກອົບຮົມ-ເຜີຍແຜ່ນິຕິກໍາຕ່າງໆ ທີ່ກ່ຽວຂ້ອງກັບວຽກງານການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໃຫ້ພະນັກງານຫຼັກແຫຼ່ງ ກໍຄື ຄະນະກໍາມະການເລືອກຕັ້ງຂັ້ນເມືອງ, ອະນຸກໍາມະການ ແລະ ຫົວໜ້າອະນຸຮັບຜິດຊອບໜ່ວຍປ່ອນບັດເລືອກຕັ້ງ; ສໍາເລັດການກໍານົດ ແລະ ຕິດຕັ້ງປ້າຍໂຄສະນາ (ຜ້າໄວນິວ) ຕາມສະຖານທີ່ຕ່າງໆພາຍໃນເມືອງ; ສໍາເລັດການກໍານົດໜ່ວຍປ່ອນບັດເລືອກຕັ້ງ ແລະ ເກັບກໍາຂໍ້ມູນຜູ້ມີສິດປ່ອນບັດເລືອກຕັ້ງ ໂດຍທົ່ວເມືອງມີໜ່ວຍປ່ອນບັດເລືອກຕັ້ງທັງໝົດ 20 ໜ່ວຍ (ບໍ່ນັບສອງກໍາລັງປະກອບອາວຸດ) ແລະ ມີຜູ້ມີສິດປ່ອນບັດເລືອກຕັ້ງທັງໝົດ 11,691 ຄົນຍິງ 5,383 ຄົນ.
ໃນໂອກາດນີ້, ຄະນະກໍາມະການເລືອກຕັ້ງຂັ້ນເມືອງ ໄດ້ຊີ້ນໍາໃຫ້ອະນຸກໍາມະການຕ່າງໆ ແລະ ຄະນະຮັບຜິດຊອບໜ່ວຍປ່ອນບັດ ສຸມໃສ່ປະຕິບັດບັນດາວຽກງານຕ່າງໆ ຕາມພາລະບົດບາດຄວາມຮັບຜິດຊອບຂອງຕົນໃຫ້ມີຜົນສໍາເລັດ ໂດຍຖືເອົາການໂຄສະນາສຶກສາອົບຮົມປະຊາຊົນບັນດາເຜົ່າ ກໍຄື ຜູ້ມີສິດປ່ອນບັດເລືອກຕັ້ງໃຫ້ຮັບຮູ້, ເຂົ້າໃຈ ແລະ ພ້ອມກັນໄປໃຊ້ສິດປ່ອນບັດເລືອກຕັ້ງໃຫ້ຄົບຖ້ວນ 100% ແລະ ວຽກງານອື່ນໆ ເພື່ອແນໃສ່ເຮັດໃຫ້ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ຈະມີຂຶ້ນໃນມໍ່ໆນີ້ ໃຫ້ມີຜົນສໍາເລັດ ຕາມຈຸດປະສົງ ລະດັບຄາດໝາຍທີ່ວາງໄວ້.
(ຂ່າວ: ສັນຍາ, ພາບ: ນາລີວັນ)
ຄໍາເຫັນ