ເມືອງແກ່ນທ້າວ ປຶກສາຫາລືກ່ຽວກັບວຽກງານຄຸ້ມຄອງເງິນຕາຕ່າງປະເທດ

ເມືອງແກ່ນທ້າວ ແຂວງໄຊຍະບູລີ ໄດ້ຈັດກອງປະຊຸມປຶກສາຫາລືກ່ຽວກັບວຽກງານຄຸ້ມຄອງເງິນຕາຕ່າງປະເທດ ຂຶ້ນໃນວັນທີ 14 ພະຈິກ ນີ້ທີ່ຫ້ອງປະຊຸມຫ້ອງວ່າການເມືອງ, ໂດຍການເປັນປະທານຂອງ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ, ທ່ານ ວາລະສິນ ດາລາພອນ ຮອງຫົວໜ້າສາຂາ ທະນາຄານແຫ່ງ ສປປ ລາວ ພາກເໜືອ ແຂວງຫຼວງພະບາງ, ມີບັນດາ ນັກທຸລະກິດ-ຜູ້ປະກອບການພາຍໃນເມືອງເຂົ້າຮ່ວມ.
ທ່ານ ອໍາຄາ ລັດສະໝີ  ໄດ້ກ່າວວ່າ: ວຽກງານຄຸ້ມຄອງເງິນຕາຕ່າງປະເທດ ເປັນວຽກງານທີ່ສໍາຄັນ ຊຶ່ງພັກ ແລະ ລັດຖະບານ ໄດ້ເອົາໃຈໃສ່ເປັນພິເສດ ຊຶ່ງໄດ້ສຸມໃສ່ເພີ່ມທະວີ ສຶກສາອົບຮົມວຽກງານການເມືອງ-ແນວຄິດໃຫ້ພະນັກງານ, ທະຫານ, ຕຳຫຼວດ, ບຸກຄົນ, ນິຕິບຸກຄົນ, ຜູ້ປະກອບການ ແລະ ປະຊາຊົນບັນດາເຜົ່າ ຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ, ໃຫ້ເຂົ້າໃຈເລິກເຊິ່ງຕໍ່ແນວທາງນະໂຍບາຍຂອງພັກ-ລັດ ໃນການຄຸ້ມຄອງເງິນຕາຕ່າງປະເທດ, ໂດຍສຸມໃສ່ປຸກລະດົມທົ່ວສັງຄົມ ເຂົ້າຮ່ວມໃນຂະບວນການແກ້ໄຂບັນຫາທີ່ເຄັ່ງຮ້ອນທາງດ້ານເສດຖະກິດ-ການເງິນ ແລະ ຖືສໍາຄັນວຽກງານດັ່ງກ່າວ ຊຶ່ງໃນໄລຍະຜ່ານມາ ເມືອງແກ່ນທ້າວ ໄດ້ສົມທົບກັບທະນາຄານແຫ່ງ ສປປ ລາວ ພາກເໜືອ ແຂວງຫຼວງພະບາງ ເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແລະ ນິຕິກຳທີ່ກ່ຽວຂ້ອງຫຼາຍຄັ້ງ. ນອກຈາກນັ້ນ, ຍັງໄດ້ລົງເກັບກຳຂໍ້ມູນ ແລະ ຊຸກຍູ້ໃຫ້ບັນດາ ບໍລິສັດນໍາເຂົ້າ-ສົ່ງອອກສິນຄ້າ ໃນການຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງຕາມລະບຽບກົດໝາຍ. 
ກອງປະຊຸມ ຍັງໄດ້ຮັບຟັງການລາຍງານສະພາບການຈັດຕັ້ງການເຄື່ອນໄຫວວຽກງານຄຸ້ມຄອງເງິນຕາຕ່າງປະເທດ ຕິດພັນກັບວຽກງານວິຊາສະເພາະ ຂອງຫ້ອງການທີ່ກ່ຽວຂ້ອງຂອງເມືອງ ໄລຍະຜ່ານມາໂດຍຫຍໍ້, ເຜີຍແຜ່ນິຕິກຳ ຄຸ້ມຄອງເງິນຕາຕ່າງປະເທດ, ປຶກສາຫາລືແລກປ່ຽນຄໍາຄິດຄໍາເຫັນ ແລະ ເປັນເອກະພາບຫຼາຍບັນຫາ ໂດຍສະເພາະແມ່ນການຕິດປະກາດ, ໂຄສະນາ ແລະ ເກັບຊື້ຜົນຜະລິດນໍາປະຊາຊົນໃຫ້ເປັນເງິນກີບ, ນໍາລາຍຮັບຈາກການສົ່ງອອກສິນຄ້າໄປຕ່າງປະເທດ ເຂົ້າ ສປປ ລາວ ຜ່ານລະບົບທະນາຄານໃຫ້ຄົບຖ້ວນ ແລະ ໃຫ້ຮີບຮ້ອນໄປລົງທະບຽນ ຜູ້ນຳເຂົ້າ-ສົ່ງອອກສິນຄ້າ ໃຫ້ທັນຕາມກຳນົດເວລາ. ພ້ອມທັງເຮັດບົດບັນທຶກຮ່ວມກັນ ລະຫວ່າງພາກລັດ ແລະ ພາກທຸລະກິດ ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ຖືກຕ້ອງໃນຕໍ່ໜ້າ.
ຂ່າວ-ພາບ: ແກ່ນທ້າວ.