ເມືອງແກ່ນທ້າວ ສະຫຼອງວັນຊາດ ຄົບຮອບ 48 ປີ

ເມືອງແກ່ນທ້າວ ແຂວງໄຊຍະບູລີ ສະເຫຼີມສະຫຼອງວັນຊາດ ຄົບຮອບ 48 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ໃນວັນທີ 1 ທັນວາ ຜ່ານມາ ໂດຍການເຂົ້າຮ່ວມຂອງທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ພ້ອມດ້ວຍກອງບັນຊາການ ປກຊ-ປກສ ເມືອງ, ລັດວິສາຫະກິດ, ພະນັກງານອາວຸໂສບໍານານເຂົ້າຮ່ວມ.
ທ່ານ ອໍາຄາ ລັດສະໝີ ໄດ້ປາຖະກະຖາ 2 ວັນສໍາຄັນດັ່ງກ່າວ ວ່າ: ວັນທີ 2 ທັນວາ 1975 ແມ່ນວັນທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີ ຂອງຊາດລາວເຮົາ, ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ. ປະທານ ໄກສອນ ພົມວິຫານ ໄດ້ຕີລາຄາ ວັນທີ 2 ທັນວາ ປີ 1975 ວ່າ: ບໍ່ທັນມີເວລາໃດທີ່ປະຊາຊົນເຮົາ ຊຶ່ງເປັນຜູ້ສ້າງປະຫວັດສາດ ຂອງຊາດນັ້ນ ໄດ້ຍາດເອົາໄຊຊະນະສົມບູນ, ເຖິງຖອງ ແລະ ບໍລິບູນໄດ້ຢ່າງສະຫງ່າລາສີຄືແນວນີ້ຈັກເທື່ອ. ໄຊຊະນະນັ້ນ ບໍ່ສະເພາະແຕ່ໄດ້ຟື້ນຟູຄວາມເປັນເອກະລາດ ຂອງປະເທດເຮົາ, ຫາກຍັງເປັນຄັ້ງທຳອິດທີ່ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງແທ້ຈິງ ຂອງຊາດໜຶ່ງ ທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສູ່ສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າ ຂອງປວງຊົນລາວ ກໍຄືຂອງມວນມະນຸດປະກົດເປັນຈິງ ຢູ່ບົນຜືນແຜ່ນດິນອັນແສນຮັກ ຂອງພວກເຮົາ. ພາຍຫຼັງ ສປປ ລາວ ໄດ້ຮັບການສະຖາປະນາຂຶ້ນແລ້ວ, ພັກເຮົາອັນມີ ປະທານ ໄກສອນ ພົມວິຫານ ເປັນຜູ້ນໍາໜ້າ ໄດ້ນໍາພາທົ່ວປວງຊົນລາວທັງຊາດ ກໍ່ສ້າງລະບອບໃໝ່ ໂດຍປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ ຊຶ່ງເພິ່ນໄດ້ຊີ້ບອກວ່າ: ການກໍ່ສ້າງລະບອບໃໝ່ ແມ່ນພາລະກິດອັນຍິ່ງໃຫຍ່ ສະຫງ່າງາມທີ່ສຸດ ຂອງຊາດເຮົາ, ແຕ່ກໍເປັນພາລະກິດທີ່ຫຍຸ້ງຍາກ, ໜັກໜ່ວງທີ່ສຸດ ເພາະພວກເຮົາບໍ່ມີພື້ນຖານວັດຖຸເຕັກນິກອັນຈໍາເປັນ ຍ້ອນເປັນປະເທດດ້ອຍພັດທະນາ ທັງຖືກສົງຄາມທໍາລາຍ ເຜົາຜານ ເປັນເວລາຫຼາຍສິບປີ ອີກດ້ານໜຶ່ງ ອິດທິກໍາລັງປໍລະປັກ ຍັງດໍາເນີນການປິດລ້ອມ ແລະ ຫວັງມ້າງເພທໍາລາຍ ລະບອບໃໝ່ ຂອງພວກເຮົາ ດ້ວຍກົນອຸບາຍອັນເລິກແລບ. ບົນພື້ນຖານນັ້ນ ປະທານ ໄກສອນ ເພິ່ນມີຄວາມສະດຸ້ງໄວ ແລະ ຕັດສິນໃຈປັບປຸງແນວທາງແຜນນະໂຍບາຍ ແຫ່ງການກໍ່ສ້າງລະບອບໃໝ່ໃຫ້ສອດຄ່ອງ. ອັນພົ້ນເດັ່ນທີ່ສຸດ ແມ່ນການນໍາພາລິເລີ່ມຄົ້ນຄວ້າວາງແນວທາງປ່ຽນແປງໃໝ່ຮອບດ້ານ ແລະ ມີຫລັກການ ຂອງພັກ, ເພິ່ນໄດ້ຮ່ວມກັບໝູ່ຄະນະ ນໍາພາການຈັດຕັ້ງຜັນຂະຫຍາຍແນວທາງປ່ຽນແປງໃໝ່ ຢ່າງມີບາດກ້າວ ແລະ ມີຂັ້ນຕອນທີ່ເໝາະສົມ ຊຶ່ງເລີ່ມຈັດຕັ້ງປະຕິບັດ ແນວທາງປ່ຽນແປງໃໝ່ນັບແຕ່ກອງປະຊຸມໃຫຍ່ ຄັ້ງທີ IV ຂອງພັກ ເປັນຕົ້ນມາ ແລະ ມີໝາກຜົນເທົ່າປັດຈຸບັນ.
ໂອກາດດຽວກັນນີ່ ຍັງໄດ້ມອບໃບຢັ້ງຢືນກົມກອງວັດທະນະທໍາ ໃຫ້ 12 ຫ້ອງການ ແລະ 1 ກອງບັນຊາການ ແລະ ມອບຂອງຂວັນໃຫ້ພະນັກງານອາວຸໂສບໍານານຕື່ມອີກ. ຈາກນັ້ນ, ທ່ານ ອໍາຄາ ລັດສະໝີ ພ້ອມດ້ວຍຄະນະ ຍັງໄດ້ໄປຢ້ຽມຢາມຄົນເຈັບຢູ່ໂຮງໝໍຊຸມຊົນເມືອງຕື່ມອີກ. 
(ຂ່າວ-ພາບ: ແກ່ນທ້າວ)