 |
ທ່ານ ນາງ ໄພວັນ ສີບຸນເຮືອງ ຮອງຄະນະສະມາຊິກສະພາເຂດເລືອກຕັ້ງເມືອງໂຂງ ທັງເປັນຫົວໜ້າຫ້ອງວ່າການສະພາປະຈຳເມືອງ ໄດ້ກ່າວວ່າ: ການລວບລວມເອົາຄຳສະເໜີຂອງປະຊາຊົນຜູ້ມີສິດເລືອກຕັ້ງມາຈາກການລົງເຄື່ອນໄຫວຂອງ ສສຊ ແລະ ສສຂ ທັງໝົດ 9 ຈຸດ, ສາມາດເຄື່ອນໄຫວໄດ້ 20 ບ້ານ ແລະ 1 ສຳນັກງານ. ກອງປະຊຸມ ຄັ້ງນີ້ ແມ່ນການຮັບຟັງລາຍງານ ແລະ ຊີ້ແຈງຈາກຕາງໜ້າຂະແໜງການຕ່າງໆ ເຊິ່ງມີຫຼາຍປະເດັນຮີບດ່ວນທີ່ຕ້ອງໄດ້ຮັບການແກ້ໄຂຢູ່ຂັ້ນເມືອງເປັນຕົ້ນແມ່ນ ຂະແໜງກະສິກຳ ແລະ ສິ່ງແວດລ້ອມ: ບັນຫາບໍລິສັດເອກະຊົນສຳປະທານທີ່ດິນທັບຊ້ອນກັບດິນທຳການຜະລິດຂອງປະຊາຊົນ ຢູ່ບ້ານຄອນ (ເນື້ອທີ່ປະມານ 12 ເຮັກຕາ), ການອອກໃບຕາດິນຖາວອນໃຫ້ປະຊາຊົນບ້ານຮີທາດ ທີ່ຍັງຄ້າງຄາຫຼາຍຕອນ ແລະ ບັນຫາການຄຸ້ມຄອງທີ່ດິນຈັດສັນຢູ່ບ້ານພຽງດີ; ຂະແໜງໂຍທາທິການ ແລະ ຂົນສົ່ງ: ຂໍໃຫ້ຊ່ວຍສ້ອມແປງ ຫຼື ກໍ່ສ້າງທໍ່ລະບາຍນ້ຳ ແລະ ຝາຍນ້ຳລົ້ນ ເພື່ອແກ້ໄຂບັນຫານ້ຳຖ້ວມຂັງ ແລະ ຮອງຮັບການຜະລິດລະດູແລ້ງຂອງປະຊາຊົນຢູ່ບ້ານເສັດນ້ຳອ້ອມ ແລະ ບ້ານສົງເປືອຍ; ຂະແໜງໄຟຟ້າ: ປະຊາຊົນຫຼາຍບ້ານ (ເຊັ່ນ: ບ້ານຄອນ ແລະ ດອນເດດ, ບ້ານສາລາ, ບ້ານຫໍ່ເຂົ້າ ແລະ ອື່ນໆ) ສະເໜີໃຫ້ກວດກາຄືນລະບົບຕາຂ່າຍໄຟຟ້າທີ່ບໍ່ທົ່ວເຖິງ, ບັນຫາໄຟຟ້າຕົກເປັນປະຈຳ ແລະ ຄ່າຊົມໃຊ້ໄຟຟ້າເຂົ້າໃນການຜະລິດນາແຊງທີ່ສູງຜິດປົກກະຕິ; ຂະແໜງສາທາລະນະສຸກ: ສະເໜີຂໍງົບປະມານສ້ອມແປງສຸກສາລາບ້ານຮີທາດ ທີ່ຊຸດໂຊມ ແລະ ບັນຫາຂາດຄູສອນ.
ນອກຈາກນີ້, ກອງປະຊຸມຍັງໄດ້ປຶກສາຫາລືກ່ຽວກັບຄຳສະເໜີທີ່ຕ້ອງໄດ້ນຳສະເໜີຕໍ່ຂັ້ນແຂວງເພື່ອພິຈາລະນາເຊັ່ນ: ການຂໍງົບປະມານກໍ່ສ້າງເສັ້ນທາງເບຕົງ, ການແກ້ໄຂລາຄາເຂົ້າເປືອກຕໍ່າ, ການຂໍທຶນສ້ອມແປງໂຮງຮຽນ.
ທ່ານ ປະທານກອງປະຊຸມ ໄດ້ຮຽກຮ້ອງໃຫ້ບັນດາຂະແໜງການທີ່ກ່ຽວຂ້ອງ ຈົ່ງເພີ່ມທະວີຄວາມຮັບຜິດຊອບ, ຮີບຮ້ອນລົງກວດກາຕົວຈິງ ແລະ ວາງແຜນແກ້ໄຂບັນຫາທີ່ຍັງຄ້າງຄາໃຫ້ປະກົດຜົນເປັນຈິງໂດຍໄວ ເພື່ອຕອບສະໜອງຄວາມມຸ່ງມາດປາດຖະໜາ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເລື້ອຍໆ.
ຂ່າວ: ເມືອງໂຂງ
ຄໍາເຫັນ