ເມືອງຄອບ ປະຖະກະຖາວັນສ້າງຕັ້ງກໍາມະບານລາວ 

ວັນທີ 6 ກຸມພາ 2024 ນີ້ ເມືອງຄອບ ແຂວງໄຊຍະບູລີ ໄດ້ຈັດຕັ້ງປະຖະກະຖາວັນສ້າງຕັ້ງກໍາມະບານລາວ ຄົບຮອບ 68 ປີ (1 ກຸມພາ 1956–1 ກຸມພາ 2024) ຂຶ້ນຢູ່ທີ່ສະໂມສອນຂອງເມືອງ ໂດຍໃຫ້ກຽດເຂົ້າຮ່ວມຂອງ ສະຫາຍ ສະໝັກ ລິດສະຖານ ກໍາມະການພັກເມືອງ ຮອງເຈົ້າເມືອງໆຄອບ, ມີສະຫາຍ ສີສຸພັນ ເພັດເມືອງເໜຶອ ປະທານສະຫະພັນກໍາມະບານເມືອງ, ມີການນໍາເມືອງ ຕະຫຼອດຮອດສະມາຊິກກໍາມະບານພາຍໃນເມືອງເຂົ້າຮ່ວມ.
ໃນພິທີ, ສະຫາຍ ສະໝັກ ລິດສະຖານ ໄດ້ຫວນຄືນມູນເຊື້ອຂອງວັນດັ່ງກ່າວ ຊຶ່ງສະຫາຍໄດ້ຍົກໃຫ້ເຫັນຄວາມເປັນມາ ຂອງວັນສ້າງຕັ້ງກໍາມະບານລາວ ໂດຍສະເພາະແມ່ນສະພາບການກໍາເນີດຊົນຊັ້ນກໍາມະກອນລາວ ແລະ ສະຫະພັນກໍາມະບານລາວ, ຂະບວນວິວັດປະຫວັດສາດແຫ່ງການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກໍາມະບານລາວທີ່ນັບມື້ເຕີບໃຫຍ່ເຂັ້ມແຂງ ໄດ້ມີຜົນສໍາເລັດອັນພົ້ນເດັ່ນໃນຫຼາຍດ້ານ ແລະ ລວມທັງຂໍ້ຄົງຂ້າງ ບົດຮຽນທີ່ຖອດຖອນໄດ້ອີກຈໍານວນໜຶ່ງ. ນັບແຕ່ປີ 1956 ຮອດປີ 2024 ສະຫະພັນກໍາມະບານລາວໄດ້ມີບາດກ້າວປ່ຽນແປງໃໝ່ໃນຫຼາຍດ້ານ ເປັນຕົ້ນ ໄດ້ເອົາໃຈໃສ່ປະຕິບັດພາລະບົດບາດຂອງຕົນ, ປັບປຸງການຈັດຕັ້ງໃຫ້ມີຄວາມເຂັ້ມແຂງໜັກແໜ້ນ ຊຶ່ງສະແດງອອກໃນກອງປະຊຸມໃຫຍ່ຄັ້ງທີ I ຂອງສະຫະພັນກໍາມະບານລາວ ມີສະມາຊິກກໍາມະບານທົ່ວປະເທດທັງໝົດ 50.000 ກວ່າສະຫາຍ, ມີ 1.424 ຮາກຖານ ແລະ ມາຮອດສະໄຫມກອງປະຊຸມໃຫຍ່ຜູ້ແທນສະຫະພັນກໍາມະບານທົ່ວປະເທດຄັ້ງທີ VIII ໃນປີ 2020 ໄດ້ມີສະມາຊິກກໍາມະບານທົ່ວປະເທດທັງໝົດ 227,718 ສະຫາຍ, ມີ 5.259 ຮາກຖານ. 
ທັງນີ້, ກໍ່ເພື່ອເປັນການປະກອບສ່ວນອັນສໍາຄັນເຂົ້າໃນການສ້າງຂະບວນການຂອງສະຫະພັນກໍາມະບານເມືອງຄອບ ເພື່ອສ້າງຄວາມຮັບຮູ້-ເຂົ້າໃຈຕໍ່ຂະບວນການວິວັດ, ຜົນງານ, ຂໍ້ຄົງຄ້າງ ແລະ ທິດທາງແຜນການແກ້ໄຂບັນຫາໃນຕໍ່ໜ້າ ຂອງສະຫະພັນກໍາມະບານລາວ ເພື່ອເຮັດໃຫ້ຖັນແຖວພະນັກງານ ກໍຄືສະມາຊິກກໍາມະບານຮັບຮູ້, ເຂົ້າໃຈແຈ້ງຢ່າງຖືກຕ້ອງຕໍ່ຂະບວນວິວັດປະຫວັດສາດ ແລະ ມູນເຊື້ອຂອງວັນດັ່ງກ່າວໃຫ້ເປັນຮູບປະທໍາ.
(ພາບ-ຂ່າວ: ທອງແກ້ວ ພອນມະລີ)