 |
ທ່ານ ຄໍາໄລ ສຸທິພອນ ປະທານຄະນະກໍາມະການປົກຄອງເມືອງຂວາ ໄດ້ລາຍງານປະຫວັດຄວາມເປັນມາຂອງໜໍ່ໄມ້ວ່າ: ເມືອງຂວາເປັນເມືອງໜຶ່ງ ທີ່ມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດ ແລະ ສິ່ງແວດລ້ອມປະກອບໄປດ້ວຍພູຜ່າປ່າດົງ, ຫ້ວຍນໍ້າລໍາເຊໃຫຍ່, ນ້ອຍຫຼາຍສາຍ, ຊຶ່ງເປັນທ່າແຮງເໝາະຕໍ່ການພັດທະນາດ້ານກະສິກໍາ, ຕິດພັນກັບອຸດສາຫະກຳປຸງແຕ່ງ, ເປັນຕົ້ນແມ່ນການປູກ-ການລ້ຽງ, ການບໍລິການ. ນອກນັ້ນ, ຍັງມີເຄື່ອງປ່າຂອງດົງ ແລະ ຊີວະນາໆພັນຫຼາຍຊະນິດເວົ້າລວມ, ເວົ້າສະເພາະແມ່ນປະເພດໄມ້ປ່ອງ. ດັ່ງນັ້ນ, ຄະນະນໍາຂອງເມືອງຈຶ່ງໄດ້ເປັນເອກະພາບກັນສ້າງຮູບໜໍ່ໄມ້ຈໍາລອງຂຶ້ນ ເພື່ອເປັນສັນຍາລັກຂອງເມືອງຂວາ.
ທ່ານ ອຸເດດ ມະນີວົງ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ໄດ້ຂຶ້ນຜ່ານບົດລາຍງານໂຄງການກໍ່ສ້າງສວນສາທາລະນະ ແລະ ການປັ້ນຮູບໜໍ່ໄມ້ຈໍາລອງ. ຊຶ່ງໄດ້ເລີມຕົ້ນກໍ່ສ້າງແຕ່ວັນທີ 17 ມິຖຸນາ 2025 ແລະ ສໍາເລັດ 100% ໃນວັນທີ 12 ກັນຍາ 2025, ລວມມູນຄ່າການກໍ່ສ້າງ 288,000,000 ກີບ ອຸປະຖໍາໂດຍ ຄອບຄົວ ທ່ານ ວິສອນ ລາວເມົາ, ຄອບຄົວ ທ່ານ ບຸນທະວີ ສໍສຸກັນ, ຄອບຄົວ ທ່ານ ສອນສະໜຸກ ສີສຸລາດ, ຄອບຄົວ ທ່ານ ບົວຫົງ ຄໍາຫາ, ຄອບຄົວ ທ່ານ ບຸນພະນິດ ແກ້ວຮຸ່ງ ແລະ ຄອບຄົວ ທ່ານ ຄໍາໄລ ສຸທິພອນ, ພ້ອມທັງມອບໃບຍ້ອງຍໍຂອງເຈົ້າແຂວງໃຫ້ແກ່ຄອບຄົວທີ່ອຸປະຖໍາໃນການກໍ່ສ້າງສວນສາທາລະນະ ແລະ ປັ້ນຮູບໜໍ່ໄມ້ຈໍາລອງຄັ້ງນີ້ຢ່າງສົມກຽດ.
ໂອກາດນິ້, ທ່ານ ເຈົ້່າແຂວງຜົ້ງສາລີ ໄດ້ຮຽກຮ້ອງມາຍັງບັນດາທ່ານທີ່ກ່ຽວຂ້ອງເອົາໃຈໃສ່ ຊີ້ນໍາ-ນໍາໃຊ້ໃຫ້ເກີດຜົນປະໂຫຍດສູງສຸດ ແລະ ເອົາໃຈໃສ່ປົກປັກຮັກສາເພື່ອໃຫ້ນໍາໃຊ້ໄດ້ຢ່າງຍາວນານມີປະສິດທິຜົນສູງສຸດ, ມອບໃຫ້ອົງການປົກຄອງເມືອງຊີ້ນໍາແຕ່ງຕັ້ງຄະນະຮັບຜິດຊອບໃນການປົກປັກຮັກສາ ເອົາໃຈຕິດຕາມການກວດກາໃຫ້ເປັນປົກກະຕິ. ມອບໃຫ້ເລຂາພັກ - ນາຍບ້ານທີ່ໂຄງການຕັ້ງຢູ່ ລວມທັງປະຊາຊົນພາຍໃນບ້ານ ແລະ ຊາວເມືອງຂວາເອົາໃຈໃສ່ປົກປັກຮັກສາຄວາມສະອາດງາມຕາຊ່ວຍກັນ ເພື່ອເຮັດໃຫ້ເປັນບ່ອນທີໜ້າຜັກຜ່ອນ, ກໍາລັງກາຍ ແລະ ຊົມໃຊ້ຕະຫຼອດໄປ. ຈາກນັ້ນ, ຄະນະປະທານພິທີຂຶ້ນຕັດແທບຜ້າ, ເປີດປ້າຍ ແລະ ລັ່ນຄອງ 9 ບາດ ເພື່ອເປີດສວນສາທາລະນະຢ່າງເປັນທາງການ.
(ຂ່າວ: ສອນໄຊ ແສງມະນີ)
ຄໍາເຫັນ