ເມືອງເລົ່າງາມ ສະຫຼອງວັນປ່ອຍປາ ແລະ ວັນອະນຸລັກສັດນໍ້າແຫ່ງຊາດ

ທ່ານ ອະນຸລັກ ຄຳປະພັນ ກຳມະການພັກເມືອງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ຜ່ານປະຫວັດຄວາມເປັນມາຂອງວັນປ່ອຍປາ ຊຶ່ງພັກ-ລັດຖະບານໄດ້ກຳນົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ອະນຸລັກສັດນໍ້າແຫ່ງຊາດ, ຊຶ່ງເລີ່ມແຕ່ປີ 1997ເປັນຕົ້ນມາເຖິງປັດຈຸບັນ ສະແດງເຖິງວັນຄ້າຍວັນເກີດຂອງປະທານ ສຸພານຸວົງ ອະດີດປະທານປະເທດຜູ້ທຳອິດຂອງ ສປປ ລາວ ທີ່ມີຄຸນງາມຄວາມດີຕໍ່ປະເທດຊາດ, ຕໍ່ປະຊາຊົນ ໃນພາລະກິດຕໍ່ສູ້ປົດປ່ອຍຊາດ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ຕະຫຼອດໄລຍະຜ່ານມາພັກ ແລະ ລັດຖະບານຍາມໃດກໍໄດ້ເອົາໃຈໃສ່ປົກປັກຮັກສາ ແລະ ອະນຸລັກສັດນ້ຳ ແລະ ສັດປ່າ ໃຫ້ມີຄວາມອຸດົມສົມບູນ, ອອກກົດໝາຍວ່າດ້ວຍສັດນ້ໍາ ແລະ ສັດປ່າໂດຍການຮັບຮອງຂອງສະພາແຫ່ງຊາດສະບັບເລກທີ 07/ສພຊ, ລົງວັນທີ 24 ທັນວາ 2007, ປຸກລະດົມໃນທົ່ວພັກ, ທົ່ວກອງທັບ ແລະ ທົ່ວປວງຊົນລາວບັນດາເຜົ່າຈັດຕັ້ງປະຕິບັດປ່ອຍສັດນ້ຳ - ສັດປ່າໃນວັນທີ 13 ກໍລະກົດຂອງທຸກໆປີ. ໂດຍການປ່ອຍລົງສູ່ໜ້າເຂື່ອນ, ລົງສູ່ອ່າງເກັບນ້ຳ, ວັງສະຫງວນຂອງລັດ, ຂອງບ້ານ ແລະ ຂອງຊຸມຊົນເປັນຈຳນວນຫຼວງຫຼາຍ. ໃນທົ່ວເມືອງມີວັງສະຫງວນທັງໝົດ 13 ແຫ່ງ. ພິທີໄດ້ຜ່ານກົດລະບຽບຄຸ້ມຄອງວັງສະຫງວນຂອງບ້ານ, ພ້ອມທັງໄດ້ຮັບຟັງການມີຄຳເຫັນ ແລະ ທິດຊີ້ນຳຕໍ່ການຄຸ້ມຄອງສັດນ້ຳ - ສັດປ່າ, ສະກັດກັ້ນບັນດາເຄື່ອງມືຫາປາແບບດັບສູນໃຫ້ໝົດໄປເທື່ອລະກ້າວ.ຈາກນັ້ນ, ຄະນະປະທານ ແລະ ຜູ້ເຂົ້າຮ່ວມທັງໝົດໄດ້ຈັດຕັ້ງປະຕິບັດການປ່ອຍປາລົງສູ່ວັງສະຫງວນ ຊຶ່ງມີປະເພດປາປາກ ແລະ ປານວນຈັນ ມີຈຳນວນ 12,000 ໂຕ.

(ຂ່າວ- ພາບ: ແວວມະນີ ຄຳສິງສະຫວັດ)