 |
ທ່ານ ຄໍາຫຼ້າ ແຫຼງ່ໄຊຍະທໍາ ຮອງເລຂາພັກເມືອງ ຮັກສາການເຈົ້າເມືອງຫຼວງນໍ້າທາ ໃຫ້ຮູ້ວ່າ: ເນື່ອງໃນໂອກາດລະນຶກ ວັນສາກົນເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງ ປີນີ້ ຄົບຮອບ 65 ປີ ທີ່ ສປປ ລາວ ແລະ ທົ່ວໂລກພ້ອມກັນລະນຶກເຖິງວັນສາກົນເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງ ຊຶ່ງເປັນວັນທີ່ປະຊາຄົມໂລກສະແດງຄວາມໝາຍໝັ້ນຂອງຕົນໃນການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນທົ່ວໂລກ ແມ່ຍິງໄດ້ປະສົບກັບຄວາມຮຸນແຮງເພີ່ມຂຶ້ນເລື້ອຍໆ ໃນສະພາບແວດລ້ອມຕ່າງໆໃນສະຖານທີ່ເຮັດວຽກ ແລະ ຢູ່ໄກ ຊຶ່ງການໃຊ້ຄວາມຮຸນແຮງແມ່ນມີຫຼາຍປັດໄຈ, ທີ່ຕິດພັນກັບບັນຫາເຊື້ອຊາດ, ຊົນເຜົ່າ, ສາສະໜາ, ຊົນຊັ້ນ, ອາຍຸ, ຄວາມພິການ ແລະ ຄວາມນິຍົມທາງເພດ ເປັນຕົ້ນແມ່ນ ການທຸບຕີ, ການກັກຂັງ, ການດູຖູູກໝິ່ນປະໝາດກຽດສັກສີ, ການປ້ອຍດ່າ, ການເມີນເສີຍ, ການປ່ອຍປະລະເລີຍ, ການນອກໃຈ ແລະ ການທໍລະມານໃນຮູບການຕ່າງໆ. ນອກຈາກນີ້, ຍັງມີບັນຫາທາງດ້ານວັດທະນະທໍາ, ຮີດຄອງປະເພນີ, ຄວາມເຊື່ອຖືງົມງວາຍທີ່ຫຼ້າຫຼັງ, ການໃຊ້ຄວາມຮຸນແຮງຕໍ່ແມ່ຍິງ ຍັງສົ່ງຜົນສະທ້ອນທາງດ້ານເສດຖະກິດ - ສັງຄົມ ຢ່າງກວ້າງຂວາງ ຕໍ່ບຸກຄົນ, ຄອບຄົວ, ຊຸມຊົນ ແລະ ສັງຄົມ ທັງກີດຂວາງການບັນລຸເປົ້າໝາຍການພັດທະນາແບບຍືນຍົງ. ດັ່ງນັ້ນ, ສະມັດຊາໃຫຍ່ສະຫະປະຊາຊາດໄດ້ສະ ເໜີ ແລະ ຮັບຮອງເອົາວັນທີ 25 ພະຈິກ ຂອງທຸກໆປີເປັນວັນສາກົນເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ໄດ້ຍົກໃຫ້ເຫັນ ວັນຜູ້ອາຍຸສູງສາກົນ ຄົບຮອບ 43 ປີ ວັນທີ 1 ຕຸລາ 1982 –ວັນທີ 1 ຕຸລາ 2025 ແລະ ວັນຄົນພິການແຫ່ງຊາດ ຈຸດປະສົງເພື່ອຂະບວນການຊ່ວຍເຫຼືອ, ຟື້ນຟູ, ບຳບັດ, ພັດທະນາຄົນພິການ ກໍ່ຄືຜູ້ສູງອາຍຸຢູ່ ສປປ ລາວ ໄດ້ມີການດຳເນີນການຊ່ວຍເຫຼືອ ແລະ ພັດທະນາ.
ໃນສະໄໝການຕໍ່ສູ້ປົດປ່ອຍຊາດ, ພັກ-ລັດຖະບານລາວ ຍາມໃດກໍໄດ້ເປັນຫ່ວງເປັນໄຍຊີວິດການເປັນຢູ່ຂອງປະຊາຊົນບັນດາເຜົ່າເວົ້າລວມ, ເວົ້າສະເພາະແມ່ນຜູ້ເສຍອົງຄະ ແລະ ພິການ, ເດັກນ້ອຍ, ແມ່ຍິງ ແລະ ຜູ້ອາຍຸສູງ. ເພື່ອເຮັດໃຫ້ຊີວິດການເປັນຢູ່ຂອງເຂົາເຈົ້າ ໄດ້ຮັບການປົວແປງນັບມື້ນັບດີຂື້ນ. ລັດຖະບານຈິ່ງໄດ້ອອກດຳລັດເລກທີ 232/ນຍ ລົງວັນທີ 6 ກັນຍາ 2013 ວ່າດ້ວຍການແຕ່ງຕັ້ງ ແລະ ເຄື່ອນໄຫວຂອງຄະນະກຳມະການ ເພື່ອຄົນພິການ ແລະ ຜູ້ອາຍຸສູງ. ຊຶ່ງເປັນຕົວແທນໃຫ້ແກ່ລັດຖະບານ ໃນການຄົ້ນຄວ້າ, ກຳນົດນະໂຍບາຍ ແລະ ລະບຽບກົດໝາຍຕ່າງໆ ເພື່ອແນ່ໃສ່ປົກປ້ອງ ແລະ ສົ່ງເສີມສິດທິຂອງຄົນພິການ ແລະ ຜູ້ອາຍຸສູງ ໃຫ້ກາຍເປັນໜ້າທີ່ ແລະ ຄວາມຮັບຜິດຊອບຂອງສັງຄົມ, ດ້ານສະຫວັດດີການ ແລະ ການພັດທະນາໃນໄລຍະຍາວ. ຈາກນັ້ນ, ຜູ້ເຂົ້າຮ່ວມພິທີກໍໄດ້ພາກັນຍ່າງເພື່ອສຸຂະພາບຈາກຫ້ອງວ່າການເມືອງຫຼວງນໍ້າທາ-ຫາຫ້ອງການບ້ານວຽງເໜືອ ເມືອງຫຼວງນໍ້າທາ ແລ້ວຍ່າງກັບຄືນຫ້ອງວ່າການເມືອງ ໄລຍະທາງປະມານ ເກືອບ 1 ກິໂລແມັດ.
(ຂ່າວ: ຄໍາຕັນ ອຸ່ນຄໍາ)
ຄໍາເຫັນ