ເມືອງເງິນ ຫວນຄືນມູນເຊື້ອ ວັນສ້າງຕັ້ງກອງທັບ ປະຊາຊົນລາວ

ທ່ານ ທອງພັນ ສຸກສະຫວັດ ໄດ້ຫວນຄືນມູນເຊື້ອ ວັນສ້າງຕັ້ງກອງທັບປະຊາຊົນລາວ ຄົບຮອບ 77 ປີ (ວັນທີ 20 ມັງກອນ 1949-20 ມັງກອນ 2026). ໂດຍຍົກໃຫ້ເຫັນການກຳເນີດ, ເຕີບໃຫຍ່ ຂະຫຍາຍຕົວ, ທາດແທ້ ແລະ ບັນດາຜົນງານອັນໃຫຍ່ຫຼວງຂອງກອງທັບນັບແຕ່ມື້ສ້າງຕັ້ງຈົນຮອດປັດຈຸບັນ. ເພື່ອເປັນການຫວນຄືນມູນເຊື້ອອັນດີງາມ ມູນເຊື້ອພິລະອາດຫານທີ່ກອງທັບ ແລະ ປະຊາຊົນລາວ ບັນດາເຜົ່າຍາດມາໄດ້ ຕະຫຼອດໄລຍະ 77 ປີ ເພື່ອເປັນການສືກສາອົບຮົມ ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈ ເຖິງຄວາມເກັ່ງກ້າປີຊາສາມາດ, ບໍ່ຍອມຈໍານົນ ຂອງກອງທັບປະຊາຊົນລາວ ກໍຄື: ວິລະບູລຸດ, ວິລະສະຕີ ທີ່ໄດ້ເສຍສະຫຼະເລືອດເນື້ອ, ຊີວິດ, ເຫື່ອແຮງ ແລະ ສະຕິປັນຍາ ເພື່ອກອບກູ້ເອົາປະເທດຊາດທີ່ແສນຮັກ, ມາສູ່ປວງຊົນລາວທັງຊາດ ຈົນສາມາດປະກາດເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນທຸກວັນນີ້.

ເນື່ອງໃນໂອກາດວັນສ້າງຕັ້ງ ກອງທັບປະຊາຊົນລາວ ຄົບຮອບ 77 ປີ, ຄະນະການນໍາຂັ້ນເມືອງ ນໍາໂດຍທ່ານ ທອງພັນ ສຸກສະຫວັດ ກໍາມະການພັກແຂວງ ເລຂາຄະນະບໍລິຫານງານພັກເມືອງເງິນ ໄດ້ນຳເອົາກະຕ່າດອກໄມ້ ແລະ ຂອງຂວັນ ໄປມອບໃຫ້ກົມກອງທີປະຈຳຢູ່ ບັນດາຄ້າຍ, ປ້ອມຕ່າງໆທີປະຕິບັດໜ້າທີ່ການເມືອງຢູ່ເມືອງເງິນ ເພື່ອອວຍພອນອັນປະເສີດ ມາຍັງນາຍ ແລະ ພົນທະຫານ ພະນັກງານນັກຮົບເຂດທຸລະກັນດານ ບັນດາປ້ອມແນວໜ້າຂອງເມືອງຈົ່ງໃຫ້ມີສຸຂະພາບແຂງແຮງ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ພ້ອມກັນສືບຕໍ່ເຮັດໜ້າທີ່ການເມືອງທີ່ການຈັດຕັ້ງມອບໝາຍ ໃຫ້ມີຜົນສຳເລັດ ທັງຮັບປະກັນໃຫ້ເມືອງເງິນມີສະຖຽນລະພາບທາງດ້ານການເມືອງ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ສັງຄົມມີຄວາມສະຫງົບເປັນລະບຽບຮຽບຮ້ອຍ.

(ຂ່າວ: ອິນແປງ ແຫວນຄຳ)