ເມືອງຍົມມະລາດຖືສໍາຄັນວຽກງານກວດກາລາຄາສິນຄ້າ

ໂດຍ: ແດງສະຫວັດ ແສນພານິດ
ທ່ານ ຄໍາຫວາ ແກ້ວມາລາ ຮອງຫົວໜ້າຫ້ອງການອຸດສາຫະກໍາ ແລະ ການຄ້າປະຈໍາເມືອງຍົມມະລາດ ແຂວງຄໍາມ່ວນໄດ້ລາຍງານການກ່ຽວກັບສະພາບການຈັດຕັ້ງປະຕິບັດວຽກງານວິຊາສະເພາະໃນໄລຍະເກືອບໜຶ່ງປີຜ່ານມາຕໍ່ຜູ້ສື່ຂ່າວທ້ອງຖິ່ນໃຫ້ຮູ້ວ່າ:ໃນໄລຍະຜ່ານມາທາງຄະນະນໍາຂອງຫ້ອງການກໍໄດ້ມີການຊີ້ນໍາພະນັກງານວິຊາການໂດຍມີຈໍານວນທັງໝົດ 63 ທ່ານ, ປະກອບມີ 4 ໜ່ວຍງານທີ່ໄດ້ປະຕິບັດຕາມພາລະໜ້າທີ່ໂດຍສະເພາະແມ່ນເຈົ້າໜ້າທີ່ກວດກາການຄ້າທັງນີ້ແມ່ນອີງໃສ່ແຜນພັດທະນາເສດຖະກິດ-ສັງຄົມ ຊຶ່ງທາງເຈົ້າເມືອງ ແລະ ຄະນະຊີ້ນໍາຂັ້ນເມືອງທີ່ໄດ້ເລັ່ງໃສ່ເຂດບ້ານຈຸດສຸມທີ່ມີຕະຫຼາດຊຸມຊົນຈາກບ້ານໃຫຍ່ໃຫ້ກາຍເປັນຕົວເມືອງນ້ອຍກໍຄືບ້ານຫາງການໂດຍທາງຫ້ອງການອຸດສາຫະກໍາ ແລະ ການຄ້າກໍໄດ້ລົງໄປປັບປຸງກໍ່ສ້າງຕະຫຼາດຊຸມຊົນດັ່ງກ່າວ ແລະ ໄດ້ເປີດໃຊ້ຢ່າງບໍລິການເປັນທາງການສໍາລັບຕະຫຼາດເຂດດັ່ງກ່າວ. ທ່ານໃຫ້ຮູ້ຕື່ມວ່າ: ໃນການລົງຕິດຕາມກວດກາທາງພະນັກງານພາຍໃນຫ້ອງການໄດ້ກໍານົດລາຄາສະເພາະຊີ້ນງົວ-ຄວາຍລາຄາປັດຈຸບັນຢູ່ຕາມທ້ອງຕະຫຼາດກິໂລລະ 100.000 ກີບ, ຊີ້ນໝູກິໂລລະ 70 ພັນກີບທັງນີ້ແມ່ນອີງໃສ່ໂຄງປະກອບທາງດ້ານລາຄາຢູ່ທ້ອງຖິ່ນທີ່ເຂົາເຈົ້າຂາຍສັດລວມເຖິງຄ່າສິ້ນເປືອງອື່ນໆຂອງຜູ້ປະກອບການໜ່ວຍຂ້າສັດຂອງເມືອງໂດຍສົມທົບກັບຂະແໜງການທີ່ກ່ຽວຂ້ອງຢູ່ຂັ້ນເມືອງເພື່ອຕົກລົງເປັນເອກະພາບກັນດ້ານການກໍານົດລາຄາ. ພ້ອມກັນນັ້ນກໍໄດ້ເອົາໃຈໃສ່ຕິດຕາມການຊື້-ຂາຍມັນຕົ້ນຢູ່ພາຍໃນເມືອງແຕ່ບໍ່ໄດ້ເປັນຜູ້ກໍານົດດ້ານລາຄາເນື່ອງຈາກວ່າລາຄາມີການຂຶ້ນ-ລົງຕາມທ້ອງຕະຫຼາດ (ໄປຕາມກົນໄກຕະຫຼາດ) ແຕ່ເປັນມັນຕົ້ນແຫ້ງຕາມການແຈ້ງການຂອງກະຊວງກະສິກໍາ ຊຶ່ງໃນປັດຈຸບັນມັນຕົ້ນແຫ້ງລາຄາຊື້ຢູ່ໂຮງງານ 4.600 ກີບ/ກິໂລ, ມັນຕົ້ນດິບ 2.000 ກີບ/ ກິໂລ. ລາຄາເຂົ້າ 80 ພັນກີບ/ໝື່ນ ພ້ອມກັນນັ້ນຍັງໄດ້ມີການຕິດຕາມດ້ານຄາລານໍ້າມັນທີ່ທາງກະຊວງແຈ້ງມາກ່ຽວກັບການຂຶ້ນ-ລົງຂອງລາຄານໍ້າມັນຕ້ອງໄດ້ມີການລົງກວດກາຖ້າຫາກຜູ້ປະກອບການບໍ່ປະຕິບັດຕາມລະບຽບການແມ່ນຈະໄດ້ມີການເຮັດບົດບັນທຶກສຶກສາອົບຮົມຕາມແຕ່ລະກໍລະນີ. ດ້ານການເໜັງຕີງຂອງລາຄາສິນຄ້າເຄື່ອງອຸປະໂພກ-ບໍລິໂພກ,ສິນຄ້າປອມແປງ,ລອກຮຽນແບບ ແລະ ເຊື່ອມຄຸນນະພາບຕາມຫ້າງຮ້ານຢູ່ທ້ອງຕະຫຼາດພາຍໃນເມືອງທີ່ເປັນຂອງຄົນລາວ ແລະ ຕ່າງດ້າວກໍໄດ້ມີການລົງກວດກາຕາມແຜນການປີນີ້ແມ່ນໄດ້ 3 ຄັ້ງພ້ອມທັງອາຍັດ, ເຮັດບົດບັນທຶກ ແລະ ຈັດປະຊຸມປຶກສາຫາລືເພື່ອທໍາລາຍສິນຄ້າດັ່ງກ່າວ. 
ດ້ານຂໍ້ສະດວກແມ່ນອີງໃສ່ທິດຊີ້ນໍາ,ມີການປຶກສາຫາລືກັບພາກສ່ວນກ່ຽວຂ້ອງໂດຍສະເພາະແມ່ນທາງພະແນກອຸດສາຫະກໍາ ແລະ ການຄ້າແຂວງກໍໄດ້ໃຫ້ທິດຊີ້ນໍາໃນການລົງປຸກລະດົມ,ຊຸກຍູ້ພໍ່ແມ່ປະຊາຊົນເປັນຕົ້ນກຸ່ມຜະລິດເປັນສິນຄ້າ(ODOP)ມາຮອດປັດຈຸບັນປະຊາຊົນແມ່ນຮູ້ຜະລິດ,ຮູ້ຊື້,ຮູ້ຂາຍສະເພາະແມ່ນການຜະລິດແຜ່ນແພທໍາມະຊາດດ້ວຍສີມືແຮງງານພ້ອມນັ້ນທາງເມືອງກໍໄດ້ມີແຜນໃຫ້ພະນັກງານຕາມຫ້ອງການສໍານັກງານຂອງເມືອງໄດ້ນໍາໃຊ້ຜະລິດຕະພັນໂອດັອບຂອງເມືອງເພື່ອເປັນການສົ່ງເສີມການຜະລິດພາຍໃນໃຫ້ຫຼາຍຂຶ້ນ. ດ້ານຂໍ້ຫຍຸ້ງຍາກພາລະບົດບາດຂອງຫ້ອງການອຸດສາຫະກໍາ ແລະ ການຄ້າແມ່ນບໍ່ສາມາດອອກຄໍາສັ່ງໄດ້ແຕ່ພຽງຝ່າຍດຽວຕ້ອງມີການປຶກສາຫາລືໂດຍອີງໃສ່ນິຕິກໍາຂອງສາຍຕັ້ງ ແລະ ສາຍຂວາງ, ພ້ອມນັ້ນພາຍໃນຫ້ອງການແມ່ນມີພະນັກງານຈໍານວນໜ້ອຍແຕ່ວຽກຂ້ອນຂ້າງຫຼາຍ.