ພິທີເຊັນສັນຍາ ໄດ້ຈັດຂຶ້ນເມື່ອບໍ່ດົນມານີ້ ທີ່ ເມືອງພຽງໂດຍມີທ່ານ ກອງໄຊ ໄຊຍະລາດ ຮອງປະທານຄະນະກຳມະການປົກຄອງເມືອງພຽງ, ມີຄະນະຮັບຜິດຊອບຊຸກຍູ້ຄຸ້ມຄອງການປູກພືດກະສິກຳຂັ້ນເມືອງ, ມີພາກສ່ວນກ່ຽວຂ້ອງເຂົ້າຮ່ວມ.
ໂຄງການລົງທຶນກ້າແນວພັນຫົວດຸກເດືອໃນຄັ້ງນີ້ ແມ່ນຮູບແບບການລົງທຶນຂອງເອກະຊົນ 100% ໂດຍມີມູນຄ່າທຶນຈົດທະບຽນທັງໝົດ 8 ຕື້ກີບ, ໂຄງການມີກຳນົດອາຍຸການລົງທຶນ 3 ປີ (ນັບແຕ່ເດືອນມີນາ 2026 ຫາ ເດືອນມີນາ 2029) ເຊິ່ງໃນໄລຍະທຳອິດນີ້, ບໍລິສັດໄດ້ເຊົ່າທີ່ດິນນາຂອງປະຊາຊົນໃນເນື້ອທີ່ທັງໝົດ 6.85 ເຮັກຕາ ຢູ່ເຂດບ້ານແສງຈະເລີນ ໃນລາຄາ 24 ລ້ານກີບ/ເຮັກຕາ/ປີ. ສຳລັບແຜນການຜະລິດໃນປີ 2026-2027 ນີ້ ຄາດຄະເນວ່າຈະສາມາດສະໜອງຜົນຜະລິດແນວພັນໄດ້ເຖິງ 1,027,500 ເບ້ຍ/ປີ ເພື່ອຕອບສະໜອງໃຫ້ແກ່ປະຊາຊົນພາຍໃນເມືອງນຳໄປປູກເປັນສິນຄ້າໃນຕໍ່ໜ້າ.
ຈຸດປະສົງຂອງການເຊັນສັນຍາຮ່ວມກັນໃນຄັ້ງນີ້ ກໍເພື່ອເປັນການຊຸກຍູ້ ແລະ ພັດທະນາເສດຖະກິດ-ສັງຄົມຂອງເມືອງພຽງ ເປັນຕົ້ນແມ່ນການສົ່ງເສີມການຜະລິດກະສິກຳເປັນສິນຄ້າເພື່ອສົ່ງອອກ , ທັງເປັນການສ້າງວຽກເຮັດງານທຳ ແລະ ສ້າງລາຍຮັບໃຫ້ແກ່ປະຊາຊົນບັນດາເຜົ່າໃຫ້ມີຊີວິດການເປັນຢູ່ທີ່ດີຂຶ້ນ, ໂດຍຮັບປະກັນໃຫ້ການຄຸ້ມຄອງການລົງທຶນດັ່ງກ່າວຖືກຕ້ອງ ແລະ ສອດຄ່ອງຕາມລະບຽບກົດໝາຍຢ່າງເຂັ້ມງວດ. ໃນຂໍ້ຜູກພັນຂອງສັນຍາ, ຝ່າຍບໍລິສັດ (ຝ່າຍ ຂ) ຈະຕ້ອງໄດ້ເອົາໃຈໃສ່ປະກອບພັນທະອາກອນຕ່າງໆ ໃຫ້ຖືກຕ້ອງຕາມກຳນົດເວລາ, ເປັນຕົ້ນແມ່ນ ອາກອນລາຍໄດ້ຈາກຄ່າເຊົ່າດິນ, ຄ່າຊົມໃຊ້ນ້ຳຊົນລະປະທານ, ເງິນຄັງພັດທະນາທ້ອງຖິ່ນ-ສັງຄົມ, ອາກອນເງິນເດືອນ ແລະ ເງິນກອງທຶນພັດທະນາສີມືແຮງງານ, ພ້ອມທັງວາງເງິນຄ້ຳປະກັນສັນຍາຈຳນວນ 100 ໂດລາ/ເຮັກຕາ/ປີ ເຂົ້າຄັງເງິນແຫ່ງຊາດປະຈຳເມືອງ.
ນອກຈາກນີ້, ບໍລິສັດຕ້ອງໄດ້ນຳໃຊ້ແຮງງານທ້ອງຖິ່ນເປັນຫຼັກ, ປະຕິບັດຕາມແຜນຄຸ້ມຄອງສິ່ງແວດລ້ອມ ແລະ ເມື່ອເກັບກູ້ຜົນຜະລິດແລ້ວ ຕ້ອງໄດ້ຟື້ນຟູ ແລະ ເກັບມ້ຽນສິ່ງເສດເຫຼືອອອກຈາກພື້ນທີ່ນາ ເພື່ອໃຫ້ປະຊາຊົນສາມາດທຳການຜະລິດໄດ້ຕາມປົກກະຕິ.
ຂ່າວ: ແສງສຸດາ ກິ່ງສະຫວັດ.
ຄໍາເຫັນ