ເມືອງພຽງ ແຂວງໄຊຍະບູລີປາຖະກະຖາ 6 ວັນສຳຄັນປະຫວັດສາດຂອງຊາດ

ເມືອງພຽງ ແຂວງໄຊຍະບູລີ ໄດ້ຈັດພິທີປາຖະກະຖາ 6 ວັນສຳຄັນທາງດ້ານປະຫວັດສາດຂອງຊາດຄື: ວັນປະກາດເອກະລາດ ຄົບຮອບ 78 ປີ, ວັນສ້າງຕັ້ງການທູດລາວ ຄົບຮອບ 78 ປີ, ວັນວິທະຍາສາດແຫ່ງຊາດ ຄົບຮອບ 36 ປີ, ວັນຄູແຫ່ງຊາດ ຄົບຮອບ 29 ປີ, ລະນຶກວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຂອງ ສປປ ລາວ ຄົບຮອບ 36 ປີ ແລະ ວັນຊາດ ສປ ຈີນ ຄົບຮອບ 74 ຊຶ່ງຈັດຂຶ້ນໃນວັນທີ 27 ຕຸລາ ຜ່ານມາທີ່ຫ້ອງປະຊຸມຂອງເມືອງ ໂດຍການເປັນກຽດເຂົ້າຮ່ວມແລະໃຫ້ກຽດປາຖະກະຖາເລົ່າຄືນມູນເຊື້ອຂອງທ່ານ ເສີດ ແສງສຸລິນ ກຳມະການພັກແຂວງ ເລຂາພັກເມືອງ ເຈົ້າເມືອງໆພຽງ,ມີບັນດາຄະນະປະຈຳພັກເມືອງ,ກຳມະການພັກເມືອງ,ຫົວໜ້າ-ຮອງຫົວໜ້າຫ້ອງການ, ອົງການ, ກົມກອງ,ພະນັກງານທະຫານ-ຕໍາຫຼວດ, ພະນັກງານ-ລັດຖະກອນ,ຄູ-ອາຈານພາຍໃນເມືອງເຂົ້າຮ່ວມຮັບຟັງ. 
ໃນພິທີທ່ານ ເສີດ ແສງສຸລິນໄດ້ໃຫ້ກຽດປາຖະກະຖາເລົ່າຄືນມູນເຊື້ອ 6 ວັນສຳຄັນປະຫວັດສາດຂອງຊາດໃນຄັ້ງນີ້ໂດຍໄດ້ຍົກໃຫ້ເຫັນເຖິງປະຫວັດການຕໍ່ສູ້ເພື່ອຍາດເອົາເອກະລາດຂອງຊາດລາວໃນແຕ່ລະຍຸກ, ແຕ່ລະສະໄໝ ເປັນຕົ້ນແມ່ນຂະບວນການຕໍ່ສູ້ຕ້ານພວກຈັກກະພັດລ່າເມືອງຂຶ້ນໃນແຕ່ລະໄລຍະ, ຂະບວນການຕໍ່ສູ້ຂອງນາຍຄູຄໍາ ແລະ ຂະບວນການຕໍ່ສູ້ຂອງບັນພະບູລຸດລາວ ທີ່ມີຈິດໃຈຮັກຊາດໃນທົ່ວປະເທດ. ເພື່ອຍາດເອົາເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວແລະໄດ້ສືບຕໍ່ປົກປັກຮັກສາແລະສ້າງສາພັດທະນາປະເທດຊາດຈົນເຖິງປັດຈຸບັນລວມເຖິງມູນເຊື່ອຂອງວັນສຳຄັນຕ່າງໆໃນຄັ້ງນີ້ ເພື່ອແນໃສ່ເຮັດໃຫ້ພະນັກງານຫຼັກແຫຼ່ງຂອງເມືອງໄດ້ຮັບຮູ້, ເຂົ້າໃຈຢ່າງເລິກເຊິ່ງເຫັນໄດ້ຄວາມໝາຍຄວາມສຳຄັນຂອງວັນສຳຄັນທາງດ້ານປະຫວັດສາດທັງເປັນການສຶກສາອົບຮົມການເມືອງ-ແນວຄິດໃຫ້ກັບບັນດາສະມາຊິກພັກ, ພະນັກງານ, ທະຫານ-ຕຳຫຼວດ ແລະ ປະຊາຊົນບັນດາເຜົ່າ ໃຫ້ມີຄວາມຮັບຮູ້ເຂົ້າໃຈ ແລະເອກອ້າງທະນົງໃຈ, ເຂົ້າໃຈເຖິງທາດແທ້, ຜົນງານແຫ່ງໄຊຊະນະໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເຊີດຊູຄວາມເຊື່ອໝັ້ນຕໍ່ການນຳພາຂອງພັກ,ຂອງຊາດສືບທອດຕໍ່ໄປແລະໃຫ້ໄດ້ຮັບການພັດທະນາກ້າວຂຶ້ນຢ່າງບໍ່ຢຸດຢັ້ງ. 
(ຂ່າວ-ພາບ: ແສງສຸດາ ກິ່ງສະຫວັດ)