ແຫຼ່ງຂ່າວຈາກເມືອງພຽງລາຍງານວ່າ: ຊາວກະສິກອນທົ່ວເມືອງພຽງ ແຂວງໄຊຍະບູລີ ເຊິ່ງເປັນໜຶ່ງໃນອູ່ເຂົ້າອູ່ປາທີ່ສໍາຄັນຂອງແຂວງ ພວມສຸມໃສ່ການຜະລິດເຂົ້ານາປີປະຈໍາລະດູການຢ່າງຟົດຟື້ນ, ມາຮອດປັດຈຸບັນການປັກດຳ ແມ່ນສາມາດປະຕິບັດສໍາເລັດແລ້ວ 70 ກວ່າສ່ວນຮ້ອຍ ຂອງເນື້ອທີ່ແຜນການ, ທົ່ວເມືອງມີເນື້ອທີ່ນາປີທັງໝົດ 6,900 ກວ່າເຮັກຕາ, ສິ່ງທີ່ພົ້ນເດັ່ນໃນລະດູການຜະລິດປີນີ້ແມ່ນ ຊາວກະສິກອນເມືອງພຽງ ໄດ້ມີການຫັນປ່ຽນວິທີການເຮັດນາແບບດັ້ງເດີມ ມາຮຽນຮູ້ ແລະ ນຳໃຊ້ເຕັກນິກໃໝ່ເຂົ້າໃນການເພາະປູກຫຼາຍຂຶ້ນ ເພື່ອຫຼຸດຜ່ອນຕົ້ນທຶນ, ປະຢັດແຮງງານ ແລະ ຮັບມືກັບສະພາບການປ່ຽນແປງຂອງດິນຟ້າອາກາດ, ເຕັກນິກທີ່ຖືກນໍາມາໃຊ້ຢ່າງແຜ່ຫຼາຍໃນປີນີ້ ປະກອບມີ ເຕັກນິກນາຢອດ (ຢອດເມັດພັນ/ຍອດແຫ້ງ)ຊ່ວຍປະຢັດເມັດພັນ, ຫຼຸດຜ່ອນຂັ້ນຕອນການຫຼົກກ້າ-ດຳນາໂດຍສະເພາະໃນເຂດທີ່ແຫ້ງແລ້ງ ທີ່ນ້ຳຊົນລະປະທານ ຫຼື ນ້ຳຝົນຍັງບໍ່ພຽງພໍ, ເຕັກນິກການຍອດແຫ້ງຊ່ວຍໃຫ້ຊາວກະສິກອນເລີ່ມປູກໄດ້ທັນລະດູການ ໂດຍບໍ່ຕ້ອງລໍຖ້ານ້ຳຂັງ, ປັດຈຸບັນປະຕິບັດໄດ້ 1 ພັນກວ່າເຮັກຕາ.
ໃນຂະນະທີ່ ເຕັກນິກນາຫວ່ານເປັນວິທີທີ່ສະດວກ ວ່ອງໄວ ແລະ ເໝາະສົມກັບເນື້ອທີ່ນາຂະໜາດໃຫຍ່, ປັດຈຸບັນປະຕິບັດໄດ້1,670 ກວ່າເຮັກຕາ, ການນຳໃຊ້ເຕັກນິກການປູກເຂົ້າແບບໃໝ່ ບໍ່ພຽງແຕ່ຊ່ວຍໃຫ້ຊາວກະສິກອນປະຢັດເວລາ ແລະ ແຮງງານເທົ່ານັ້ນ ແຕ່ຍັງເປັນການເພີ່ມໂອກາດໃນການສ້າງຜົນຜະລິດໃຫ້ໄດ້ມາດຕະຖານ ແລະ ປະລິມານທີ່ສູງຂຶ້ນປັດຈຸບັນ, ທາງພາກສ່ວນກ່ຽວຂ້ອງຂອງເມືອງ ພ້ອມດ້ວຍວິຊາການກະສິກຳ ກໍໄດ້ລົງຕິດຕາມ ແລະ ໃຫ້ຄຳແນະນຳແກ່ປະຊາຊົນຢ່າງໃກ້ຊິດ ເພື່ອຮັບປະກັນໃຫ້ການປັກດຳເຂົ້ານາປີໃນເນື້ອທີ່ຫຼົງເຫຼືອ ສາມາດສຳເລັດຕາມຄາດໝາຍທີ່ວາງໄວ້ໃນໄວໆນີ້.
ນອກຈາກການປູກເຂົ້າແລ້ວຊາວກະສິກອນເມືອງພຽງຍັງໄດ້ປູກພືດສະບຽງອາຫານໃນເນື້ອທີ 480 ກວ່າເຮັກຕາ ແລະ ປູກພືດເປັນສິນຄ້າສົ່ງອອກໃນເນື້ອທີ 18 ພັນກວ່າເຮັກຕາເປັນຕົ້ນ: ມັນຕົ້ນ, ສາລີ, ໝາກເດືອຍ ແລະ ອື່ນໆເພຶ່ອເປັນສິນຄ້າສົ່ງອອກທັງເປັນການຄ້ຳສະບຽງອາຫານ.
ຂ່າວໂດຍ: ວົງສະຫວັນ ສຸທິໂວຫານ
ຄໍາເຫັນ