ໃນພິທີທ່ານ ຄຳພັນ ຄຳພູບົວ ໄດ້ປາຖະກະຖາເລົ່າຄືນມູນເຊື້ອຂອງ 6 ວັນປະຫວັດສາດສໍາຄັນຂອງຊາດ ຂອງພັກ ຄື: ວັນເກີດຂອງປະທານສຸພານຸວົງ ຄົບຮອບ 115 ປີ, ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ, ວັນເຊັນສົນທິສັນຍາມິດຕະພາບການຮ່ວມມືລາວ-ຫວຽດນາມ ຄົບຮອບ 47 ປີ, ວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ, ວັນກໍາເນີດກິລາ-ກາຍຍະກໍາແຫ່ງຊາດ ຄົບຮອບ 58 ປີ ແລະ ວັນອານຸລັກສັດນໍ້າ ແລະ ສັດປ່າແຫ່ງຊາດ.
ຈຸດປະສົງກໍເພື່ອລະນຶກເຖິງຜົນງານ, ຄຸນງາມຄວາມດີ ຂອງປະທານ ສຸພານຸວົງ ຜູ້ນໍາທີ່ແສນຮັກ ຂອງຊາດລາວ ໃນພາລະກິດຕໍ່ສູ້, ປົດປ່ອຍປະເທດຊາດ, ກໍຄືການປະຕິບັດ 2 ຫນ້າທີ່ຍຸດທະສາດ ການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ເພື່ອໂຄສະນາສຶກສາອົບຮົມ ບັນດາຊັ້ນຄົນຕ່າງໆ ໃຫ້ເຂົ້າໃຈຢ່າງເລີກເຊີ່ງຕໍ່ກັບ ມູນເຊື້ອອັນດີງາມ ຂອງປະທານ ສຸພານຸວົງ ເພື່ອຍົກສູງສະຕິ, ຕື່ນຕົວເປັນເຈົ້າການເສີມຂະຫຍາຍມູນເຊື້ອ ຄວາມສາມັກຄີບັນດາເຜົ່າ, ຮັກຊາດ, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີປອງດອງ, ມີສະຕິລະວັງຕົວຕໍ່ກົນອຸບາຍທໍາລາຍມ້າງເພ ຂອງອິດທິກໍາລັງປໍລະປັກ; ສະແດງເຖິງຄວາມກະຕັນຍູຮູ້ບຸນຄຸນຕໍ່ຜູ້ນໍາ, ບັນດາວິລະຊົນ ແລະ ຜູ້ມີຜົນງານອັນ ໃຫຍ່ຫຼວງຕໍ່ປະເທດຊາດ ແລະ ປະຊາຊົນບັນດາເຜົ່າ ແລະ ຖືເອົາໂອກາດນີ້ ໂຄສະນາປຸກລະດົມໃຫ້ພະນັກງານ, ສະມາຊິກພັກ, ຕະຫຼອດຮອດ ປະຊາຊົນຊັ້ນຄົນຕ່າງໆ ພ້ອມກັນຮ່ໍາຮຽນເອົາຄຸນສົມບັດສິນທໍາປະຕິວັດອັນສູງສົ່ງ ໂດຍສະເພາະ ແມ່ນຈິດໃຈຮັກຊາດ ຍອມເສຍສະຫຼະ ທຸກຢ່າງເພື່ອປະທດຊາດ ແລະ ປະຊາຊົນ ຂອງ ປະທານ ສຸພານຸວົງ; ທັງພ້ອມກັນເປັນເຈົ້າການເຂົ້າຮ່ວມໃນການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ, ບົນພື້ນຖານການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່.
ໃນພິທີດັ່ງກ່າວ ໄດ້ປະກາດ ທ່ານ ນາງ ດາລາວັນ ຄຳອ່ອນ ແລະ ທ່ານ ນາງ ພູມມາ ປັນຍາວົງ ພະນັກງານຫ້ອງການກະສິກຳ ແລະ ປ່າໄມ້ເມືອງ ອອກພັກຜ່ອນຮັບອຸດໜູນບຳນານ.
ໃນໂອກາດພິທີໃນຄັ້ງນີ້ບັນດາຄະນະປະທານພິທີພ້ອມດ້ວຍບັນດາຜູ້ເຂົ້າຮ່ວມຍັງໄດ້ທ່ຽວຊົມຊື້-ຂາຍ ເຄື່ອງບໍລິໂພກທີ່ເປັນສີມືຂອງເອື້ອຍນ້ອງແມ່ຍິງພາຍໃນເມືອງທີ່ນຳມາວາງຂາຍໃນພິທີດັ່ງກ່າວ, ພ້ອມທັງໄດ້ເຂົ້າຮ່ວມພິທີປ່ອຍປາລົງສູ່ແມ່ນ້ຳປູຍ ເພື່ອເປັນການອານຸລັກຮັກສາສັດນ້ຳ-ສັດປ່າ ເນື່ອງໃນໂອກາດ ການສະເຫຼີມສະຫຼອງວັນສ້າງຕັ້ງແມ່ຍິງລາວ ຄົບຮອບ 69 ປີ, ວັນປ່ອຍປາ ແລະ ສັດນ້ຳແຫ່ງຊາດ ຢ່າງມີບັນຍາກາດຟົດຟື້ນເບີກບານມ່ວນຊື່ນ.
ຂ່າວໂດຍ: ແສງສຸດາ ກິ່ງສະຫວັດ
ຄໍາເຫັນ