ໃນວັນທີ 5 ມັງກອນ 2024 ທີ່ເດີ່ນກອງເຂົ້າໃຫຍ່ ບ້ານສົມສະຫວັນ ເມືອງພຽງ ແຂວງ ໄຊຍະບູລີ ໄດ້ຈັດຝຶກຊ້ອມຂະບວນກ້ອນກໍາລັງບ້ານຕ່າງໆຄັ້ງສຸດທ້າຍ ເພື່ອກຽມຄວາມພ້ອມໃນການເປີດງານເທດສະການບຸນກອງເຂົ້າໃຫຍ່ ປະຈໍາປີ 2024 ນີ້ ເຂົ້າຮ່ວມໃນງານຄັ້ງນີ້ມີ ທ່ານ ເສີດ ແສງສຸລິນ ເຈົ້າເມືອງໆພຽງ, ມີບັນດາທ່ານຄະນະຮັບຜິດຊອບກ້ອນກໍາລັງຕ່າງໆເຂົ້າຮ່ວມ.
ພິທີແມ່ນເລີ່ມຕົ້ນດ້ວຍກ້ອນກໍາລັງກອງເຍົາວະຊົນ ແລະ ກອງດຸລິຍາງ ຈາກນັ້ນ ກ້ອນແຫ່ຜະລິດຕະພັນເຫຼົ້າຂາວ ແລະ ເຄື່ອງຕໍ່າ, ຈັກສານ ຟ້ອນລາຍລື້ ໃຊ້ຄົນປະມານ 100 ຄົນ ພາຍໃຕ້ຄໍາຂວັນ ບ້ານດົງເງິນ ບ້ານພັດທະນາ ສ້າງເປັນຕົວແບບດ້ານວັດທະນະທໍາເຜົ່າລື້ ສົ່ງເສີມຫັດຖະກໍາຕໍ່າຫູກ ປຸງແຕ່ງ ແລະ ລ້ຽງສັດເປັນສິນຄ້າ, ຕໍ່ດ້ວຍບ້ານກິ່ວແຄ່ມແຫ່ຜົນຜະລິດພືດຜັກ ໃຊ້ຄົນ 100 ຄົນ ພາຍໃຕ້ຄໍາຂວັນ ສ້າງບ້ານກິ່ວແຄ່ມໃຫ້ເປັນບ້ານພັດທະນາ ສົ່ງເສີມການປູກພືດເປັນສິນຄ້າຕິດພັນກັບການຕະຫຼາດ, ຕໍ່ມາບ້ານໂພນໄຊ ແຫ່ຮວງເຂົ້າໃຫຍ່ ແລະ ພືດຜັກ ໃຊ້ຄົນ 100 ຄົນພາຍໃຕ້ຄໍາຂວັນ ບ້ານໂພນໄຊ ບ້ານພັດທະນາສືບຕໍ່ສ້າງຕົວແບບ ການເຮັດກະເສດສຸມປູກເຂົ້າ ແລະ ສົ່ງເສີມການປູກພືດຜັກເປັນສິນຄ້າ ຕິດພັນກັບການຕະຫຼາດ, ບ້ານໜອງງົວ ແຫ່ພາຂວັນ ແລະ ຜະລິດຕະພັນເສັ້ນໝີ່ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານໜອງງົວ ບ້ານພັດທະນາສົ່ງເສີມການບໍລິການປຸງແຕ່ງເຂົ້າເປັນສິນຄ້າ ແລະ ອະນຸລັກວັດທະນະທໍາເຜົ່າລາວ, ບ້ານນາຊິງ ແຫ່ໂຮງສີເຂົ້າ ແລະ ຜະລິດລູກປາ-ກົບ ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານນາຊິງ ບ້ານພັດທະນາ ສຸມໃສ່ການປຸງແຕ່ງເຂົ້າ ແລະ ບໍລິການເປັນສິນຄ້າ ຕິດພັນກັບການຕະຫຼາດ ແລະ ການບໍລິການທາງຜ່ານ, ບ້ານຫົວນາ ແຫ່ເຄື່ອງຫັດຖະກໍາຈັກສານ ສາດລາຍອ່ອນ ໝ້ຽງ ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານຫົວນາ ບ້ານພັດທະນາສຸມໃສ່ການຜະລິດເຂົ້າ, ໝ້ຽງ ແລະ ຫັດຖະກໍາຈັກສານເປັນສິນຄ້າ ຕິດພັນກັບການຕະຫຼາດ, ບ້ານນາແຄມແຫ່ຢາສູບ ພືດຜັກ ແລະ ເຂົ້າເປັນສິນຄ້າ ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານນາແຄມບ້ານພັດທະນາ ສຸມໃສ່ການຜະລິດເຂົ້າ ພືດຜັກ ຢາສູບ ຕິດພັນກັບການບໍລິການ, ບ້ານນາບວມ ແຫ່ພາບວັດພະເຈົ້າໂອ້ຍ ໝາກແຕງ ພືດຜັກ ໃຊ້ຄົນ 150 ຄົນ ພາຍໃຕ້ຄໍາຂວັນ ບ້ານນາບວມບ້ານພັດທະນາສຶບຕໍ່ສ້າງບ້ານໃຫ້ເປັນບ້ານພັດທະນາຮອບດ້ານ ມີຕົວແບບໃນການປູກເຂົ້າ ພືດຜັກເປັນສິນຄ້າ ຕິດພັນກັບການຕະຫຼາດ, ບ້ານວຽງຈະເລີນ ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານວຽງຈະເລີນ ບ້ານພັດທະນາສືບຕໍ່ຮັກສາວັດທະນະທໍາເຜົ່າກຶມມຸ ສົ່ງເສີມການປູກພືດອຸດສາຫະກໍາ ບໍລິການເຫຼົ້າໄຫ ທີ່ເປັນເອກະລັກ ຕິດພັນກັບການທ່ອງທ່ຽວ, ບ້ານນໍ້າປຸຍ ແຫ່ເຮືອຊາວງ ເປົ່າແຄນ ເຜົ່າມົ້ງ ໃຊ້ຄົນ 100 ຄົນ ພາຍໃຕ້ຄໍາຂວັນ ບ້ານນໍ້າປຸຍບ້ານພັດທະນາ ສ້າງບ້ານນໍ້າປຸຍເປັນຕົວເມືອງສະອາດ ສີຂຽວ ສວຍງາມ ບໍລິການທາງຜ່ານ ແລະ ການທ່ອງທ່ຽວ; ສະເພາະບັນດາກ້ອນແຫ່ຂອງແຕ່ລະບ້ານທີ່ເຂົ້າຮ່ວມໃນງານເທດສະການບຸນກອງເຂົ້າໃຫຍ່ ປີ 2024 ແມ່ນໄດ້ກໍານົດເອົາ 10 ກ້ອນ ແລະ ກ້ອນຢືນ 10 ກ້ອນ ແລະ ການຊ້ອມໃຫຍ່ໃນຄັ້ງນີ້ໂດຍລວມແມ່ນໄດ້ຕາມແຜນທີ່ວາງໄວ້ ແຕ່ມີບາງກ້ອນບາງບ້ານໃນການຟ້ອນ, ການຍ່າງ ບໍ່ທັນໄດ້ດີເທົ່າທີ່ຄວນ ຕ້ອງໄດ້ເຝິກຊ້ອມໃໝ່ ຫວັງວ່າໃນມື້ວັນທີ 9 ມັງກອນ 2024 ເຊິ່ງເປັນມື້ເປີດງານເທດສະການບຸນກອງເຂົ້າໃຫຍ່ເປັນທາງການ ບັນດາແຕ່ລະກ້ອນຄົງຈະໄດ້ດີ ແລະ ໄດ້ຮັບຄວາມຍ້ອງຍໍຊົມເຊີຍຈາກຜູ້ມາຊົມ ແລະ ມາຮ່ວມງານອີກດ້ວຍ. ຂ່າວ: ບຸນທີ
ຄໍາເຫັນ