ເມືອງທ່າພະບາດສາມາດປະກາດລຶບລ້າງຄອບຄົວທຸກຍາກ ເປັນເມືອງທຳອິດຂອງແຂວງບໍລິຄຳໄຊ

ທ່ານ ພັນໂທ ສົມສົດ ແສງອາພອນ ເຈົ້າເມືອງທ່າພະບາດ ໄດ້ໃຫ້ສຳພາດຕໍ່ສື່ມວນຊົນໃນວັນທີ 3 ມີນານີ້ ທີ່ຫ້ອງວ່າການປົກຄອງເມືອງທ່າພະບາດ ແຂວງບໍລິຄຳໄຊ ທ່ານກ່າວວ່າ:ອົງຄະນະພັກເມືອງແຕ່ລະຍຸກແຕ່ລະສະໄໝໄດ້ສຸມໃສ່ແກ້ໄຂຄວາມທຸກຍາກໃຫ້ແກ່ປະຊາຊົນບັນດາເຜົ່າຊາວເມືອງທ່າພະບາດຂອງພວກເຮົາ. ຜ່ານການເກັບກຳສະຖິຕິໃນປີ 2021-2023 ເຫັນວ່າທົ່ວເມືອງມີຄອບຄົວທຸກຍາກ 22 ຄອບຄົວ, ໃນນັ້ນສຸມໃສ່ແກ້ໄຂໂດຍເນັ້ນໃສ່ສ້າງເຮືອນໃຫ້ແກ່ເຂົາເຈົ້າເພື່ອໃຫ້ມີທີ່ຢູ່ອາໄສຖາວອນ. ຜ່ານການຈັດຕັ້ງປະຕິບັດທາງຄະນະພັກເມືອງໄດ້ມີການຄົ້ນຄວ້າປຶກສາຫາລື ຊຶ່ງໄດ້ມີການແຕ່ງຕັ້ງຄະນະພັກເມືອງ, ຄະນະປະຈຳພັກເມືອງໂດຍແບ່ງອອກເປັນ 7 ຄະນະປະສານສົມທົບກັບພະນັກງານ, ນາຍບ້ານໄດ້ພ້ອມກັນແກ້ໄຂ.
ສຳລັບບາດກ້າວທີ່ສອງໄດ້ແຕ່ງຕັ້ງຄະນະເຫຼົ່ານີ້ເພື່ອປຸກລະດົມທຸກພາກສ່ວນຂອງສັງຄົມ ພາກທຸລະກິດ, ອົງການພຸດທະສາສະໜາປະຈຳລາວຂອງເມືອງທ່າພະບາດໄດ້ລະດົມທຶນຮອນ, ວັດຖຸຈຳນວນໜຶ່ງເພື່ອເຂົ້າມາແກ້ໄຂຄວາມທຸກຍາກໃຫ້ປະຊາຊົນຊຶ່ງໃນໄລຍະ 1 ປີຜ່ານມາຖືວ່າພວກເຮົາບັນລຸຕາມແຜນການທີ່ວາງໄວ້ ການປະກອບສ່ວນຂອງທຸກພາກສ່ວນໃນສັງຄົມຊຶ່ງເປັນມູນຄ່າຫຼາຍຮ້ອຍລ້ານກີບ. ສະນັ້ນ, ສາມາດຢືນຢັນໄດ້ວ່າມາຮອດປັດຈຸບັນເມືອງທ່າພະບາດສາມາດລຶບລ້າງຄອບຄົວທຸກຍາກໄດ້ 100% ທາງດ້ານທີ່ຢູ່ອາໄສ ຊຶ່ງໄດ້ປະກາດລຶບລ້າງໃນປີ 2023. ເຫັນວ່າຜົນສຳເລັດດັ່ງກ່າວຍ້ອນການປະກອບສ່ວນຂອງສັງຄົມກໍຄືການຊີ້ນຳໆພາຂອງຄະນະພັກຂັ້ນເທິງບວກກັບອົງຄະນະພັກຕະຫຼອດຮອດປະຊາຊົນບັນດາເຜົ່າຊາວເມືອງທ່າພະບາດເຮັດໃຫ້ເມືອງພວກເຮົາຫຼຸດພົ້ນອອກຈາກເມືອງທຸກຍາກ. ເວົ້າລວມ, ເວົ້າສະເພາະແມ່ນການແກ້ໄຂຄວາມທຸກຍາກໄດ້ຈຳນວນ 10 ກວ່າຄອບຄົວໃນປີ 2023 ມາຮອດປັດຈຸບັນສຳເລັດ 100% ສາມາດເວົ້າໄດ້ວ່າເປັນເມືອງທຳອິດຂອງແຂວງບໍລິຄຳໄຊ.
ຂ່າວ: ພູວັນ, ພາບ: ແສງຈັນ