ເມືອງວັງວຽງ ສ້າງຂະບວນການປູກຕົ້ນໄມ້ເພີ່ມພື້ນທີ່ສີຂຽວ ແລະ ຮັກສາສິ່ງແວດລ້ອມ

ທ່ານ ຄຳປຽນ ແສງສະຫວັດ ໄດ້ກ່າວວ່າ: ການປູກຕົ້ນໄມ້ຄັ້ງນີ້, ເພື່ອປະກອບສ່ວນໃນການປົກປັກຮັກສາສິ່ງແວດລ້ອມ ແລະ ເພີ່ມພື້ນທີ່ສີຂຽວໃຫ້ແກ່ເມືອງວັງວຽງ ຊຶ່ງການປູກຕົ້ນໄມ້ໃນຄັ້ງນີ້, ບໍ່ແມ່ນພຽງແຕ່ການນຳເອົາຕົ້ນໄມ້ລົງດິນເທົ່ານັ້ນ ແຕ່ຕ້ອງເນັ້ນໜັກກ່ຽວກັບການບົວລະບັດ, ດູແລ ແລະ ຮັກສາຕົ້ນໄມ້, ຫາກຕົ້ນໄມ້ເຕີບໃຫຍ່ຈະສາມາດສ້າງຄວາມຮົ່ມເຢັນ ແລະ ຊ່ວຍປັບປຸງທັດສະນີຍະພາບຂອງເມືອງໃຫ້ສວຍງາມຍິ່ງຂຶ້ນ.

ພ້ອມກັນນັ້ນ, ການປູກຕົ້ນໄມ້ ຍັງເປັນການສ້າງຈິດສຳນຶກໃຫ້ແກ່ປະຊາຊົນໃນການຮ່ວມກັນອະນຸລັກທຳມະຊາດ, ຮັກສາສິ່ງແວດລ້ອມ ແລະ ສ້າງເມືອງວັງວຽງໃຫ້ເປັນເມືອງສີຂຽວ, ສະອາດ, ສວຍງາມ ແລະ ໜ້ຢູ່ຫຼາຍຂຶ້ນ.

ໃນໂອກາດນີ້, ທ່ານ ນາງ ດາລານີ ພິມມະວົງສາ ຮອງ ໄດ້ກ່າວວ່າ: ໃນໄລຍະຜ່ານມາ, ຄະນະພັກ-ຄະນະນໍາ ກະຊວງວັດທະນະທຳ ແລະ ການທ່ອງທ່ຽວ ໄດ້ເອົາໃຈໃສ່ ແລະ ຊຸກຍູ້ສົ່ງເສີມການປູກຕົ້ນໄມ້ ໃຫ້ກາຍເປັນຂະບວນການທີ່ກວ້າງຂວາງ ຕິດພັນກັບການທ່ອງທ່ຽວສີຂຽວ ແລະ ຍືນຍົງ ຊຶ່ງເມືອງວັງວຽງ ໄດ້ເປັນຈຸດໝາຍປາຍທາງການທ່ອງທ່ຽວລະດັບພາກພື້ນ ແລະ ສາກົນ ທີ່ມີຊື່ສຽງໂດ່ງດັງ ໂດຍສະເພາະການທ່ອງທ່ຽວທາງດ້ານທໍາມະຊາດ, ສາຍນໍ້າ, ພູເຂົາ ແລະ ປ່າໄມ້ທີ່ຂຽວງາມ. ສະນັ້ນ, ການຮັກສາຄວາມສົມດຸນຂອງທຳມະຊາດ ແລະ ສິ່ງແວດລ້ອມ ຈຶ່ງເປັນຫົວໃຈຫຼັກ ແລະ ເປັນພັນທະຂອງພວກເຮົາທຸກໆຄົນ. ເຖິງຢ່າງໃດກໍຕາມ, ໃນສະພາບປັດຈຸບັນ, ຍັງເຫັນໄດ້ວ່າການຂະຫຍາຍຕົວຂອງຕົວເມືອງ ແລະ ການທ່ອງທ່ຽວ ຖ້າຂາດການຄຸ້ມຄອງ ແລະ ວາງແຜນທີ່ຮັດກຸມ ກໍຈະສົ່ງຜົນກະທົບຕໍ່ສະພາບແວດລ້ອມ, ເກີດບັນຫາຂີ້ເຫຍື້ອ, ບັນຫານໍ້າເປື້ອນ ແລະ ການຫຼຸດໜ້ອຍຖອຍລົງຂອງເນື້ອທີ່ສີຂຽວ, ຖ້າພວກເຮົາບໍ່ຮ່ວມມືກັນປົກປັກຮັກສາຕັ້ງແຕ່ມື້ນີ້, ໃນອະນາຄົດລູກຫຼານຂອງພວກເຮົາກໍຈະບໍ່ມີໂອກາດໄດ້ເຫັນ ວັງວຽງທີ່ສວຍງາມ ແລະ ອຸດົມສົມບູນໄປດ້ວຍພື້ນທີ່ສີຂຽວ ຊຶ່ງມີເປົ້າໝາຍຈະປູກຕົ້ນໄມ້ຢູ່ຕົວເມືອງທ່ອງທ່ຽວວັງວຽງນີ້ ໃຫ້ໄດ້ທັງໝົດ 570 ຕົ້ນ. ໂເລກ 570 ຕົ້ນນີ້ບໍ່ສະເພາະແຕ່ເປັນພຽງໂຕເລກຕົ້ນໄມ້ທີ່ຈະຝັ່ງຮາກລົງສູ່ຜືນດິນວັງວຽງເທົ່ານັ້ນ, ແຕ່ມັນຄືຕົວແທນຂອງຄວາມມຸ່ງໝັ້ນ ຄືຄຳສັນຍາຮ່ວມກັນຂອງທຸກພາກສ່ວນ ທີ່ຈະຮ່ວມກັນເພີ່ມເນື້ອທີ່ສີຂຽວ ເພື່ອຫຼຸດຜ່ອນຜົນກະທົບຈາກການປ່ຽນແປງຂອງສະພາບດິນຟ້າອາກາດ ຢ່າງເປັນຮູບປະທຳ, ທັງເປັນການສ້າງຮົ່ມເງົາໃຫ້ປະຊາຊົນທ້ອງຖິ່ນ ແລະ ນັກທ່ອງທ່ຽວ, ສ້າງອາກາດບໍລິສຸດ ແລະ ສ້າງຄວາມຊຸ່ມຊື່ນ ໃຫ້ແກ່ຕົວເມືອງທ່ອງທ່ຽວວັງວຽງ.

ການປູກຕົ້ນໄມ້ຄັ້ງນີ້, ເປັນການຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs) ຂອງ ສປປ ລາວ, ທັງເປັນການປະກອບສ່ວນເຂົ້າໃນການປັບປຸງຕົວເມືອງວັງວຽງ ໃຫ້ສອດຄ່ອງກັບມາດຕະຖານເມືອງທ່ອງທ່ຽວສະອາດອາຊຽນ, ປະກອບສ່ວນເຂົ້າໃນການ ສ້າງເມືອງວັງວຽງ ໃຫ້ກາຍເປັນເມືອງທ່ອງທ່ຽວທີ່ “ສີຂຽວ, ສະອາດ, ສະຫວ່າງ, ສວຍງາມ ແລະ ຍືນຍົງ” ຢ່າງແທ້ຈິງ ເພື່ອໃຫ້ເມືອງວັງວຽງ ເປັນເມືອງມີສະເໜ່ ແລະ ເປັນຄວາມພາກພູມໃຈຂອງຄົນລາວທຸກຄົນ, ພ້ອມທັງສາມາດຕ້ອນຮັບນັກທ່ອງທ່ຽວຈາກທົ່ວທຸກມຸມໂລກ.

ຂ່າວ-ພາບ: ກິດຕາ