ເມືອງໄຊຍະບູລີ ຈັດພິທີປາຖະກະຖາ 2ວັນປະຫວັດຊາດສຳຄັນຂອງຊາດ

ເມືອງໄຊຍະບູລີ ແຂວງໄຊຍະບູລີ ຈັດພິທີປາຖະກະຖາ 2ວັນປະຫວັດຊາດສໍາຄັນຂອງຊາດຄື: ວັນຊາດທີ 2 ທັນວາ ຄົບຮອບ 48 ປີ ແລະ ວັນເກີດຂອງປະທານ ໄກສອນ ພົມວິຫານ ຄົບຮອບ 103 ປີ ພິທີໄດ້ຈັດຂຶ້ນໃນວັນທີ 5 ທັນວານີ້ ໂດຍການເປັນກຽດປາຖະກະຖາຂອງທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ພະນັກງານອາວຸດໂສບຳນານ, ຫົວໜ້າຫ້ອງການ-ຮອງຫ້ອງການ ພະນັກງານຫຼັກແຫຼ່ງອ້ອມຂ້າງເມືອງ ອົງການປົກຄອງບ້ານເທດສະບານເຂົ້າຮ່ວມ.
ໃນພິທີ, ທ່ານ ບຸນແທນ ທີແກ້ວ ໄດ້ໃຫ້ກຽດປາຖະກະຖາມູນເຊື້ອ ແລະ ຄວາມສໍາຄັນຂອງວັນຊາດທີ 2ທັນວາ ຄົບຮອບ 48 ປີ(2/12/1975-2/12/2023)ເປັນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດຂອງຊາດລາວເປັນວັນທີ່ປະຊາຊົນບັນດາເຜົ່າໄດ້ມີອິດສະຫຼະພາບ ເປັນເຈົ້າຂອງປະເທດຊາດຢ່າງແທ້ຈິງ, ມີຖານະເທົ່າທຽມກັບປະເທດອື່ນໆ ໃນເວທີສາກົນໂດຍສືບທອດມູນເຊື້ອອັນອົງອາດຂອງບັນທະບູລຸດ ປະຊາຊົນລາວບັນດາເຜົ່າ ພາຍໃຕ້ການນຳພາ ຂອງພັກປະຊາຊົນປະຕິວັດລາວໄດ້ສາມັກຄີກັນຕໍ່ສູ້ຢ່າງພິລະອາດຫານ ຕ້ານພວກຮຸກຮານ ແລະ ການຄອບຄອງຂອງພວກຈັກກະພັດລ່າເມືອງຂື້ນ ທັງແບບເກົ່າ ແລະ ແບບໃໝ່ ສາມາດປົດປ່ອຍປະເທດຢ່າງມີໄຊ ສ້າງຕັ້ງສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ ພ້ອມນີ້ທ່ານເຈົ້າເມືອງໄຊຍະບູລີຍັງໄດ້ປາຖະກະຖາວັນເກີດຂອງປະທານ ໄກສອນ ພົມວິຫານ ໂດຍໄດ້ຍົກໃຫ້ເຫັນຊີວິດ, ການເຄື່ອນໄຫວ, ຜົນງານ, ຄຸນງາມຄວາມດີຂອງປະທານໄກສອນ ພົມວິຫານໃນພາລະກິດປົກປັກຮັກສາປະເທດຊາດ ແລະ ເປັນຜູ້ນໍາທີ່ຮັກຊາດ, ເປັນນັກຮົບທີ່ຍິ່ງໃຫຍ່ຂອງຊາດ, ເປັນວິລະບູລຸດ ແລະ ຜູ້ນໍາທີ່ປີຊາສາມາດ ສະຫຼາດສ່ອງໃສ ແລະ ສະດຸ້ງໄວ, ມີທັດສະນະມະຫາຊົນກວ້າງຂວາງ, ຈຸດປະສົງໃນການຈັດພິທີປະຖະກະຖາໃນຄັ້ງນີ້ ເພື່ອເຮັດໃຫ້ສະມາຊິກພັກ, ພະນັກງານຫຼັກແຫຼ່ງຂອງເມືອງ, ໄດ້ຮັບຮູ້ ເຊື່ອມຊຶມ ແລະ ເສີມຂະຫຍາຍມູນເຊື້ອອັນດີງາມດັ່ງກ່າວພວກເຮົາຄວນຕັ້ງໜ້າປະຕິບັດ 2 ໜ້າທີ່ຍຸດທະສາດຄື ປົກປັກຮັກສາປະເທດຊາດ ແລະ ສ້າງສາປະເທດຊາດ, ມີຄວາມຈົ່ງຮັກພັກດີ, ເດັດດ່ຽວໜຽວແໜ້ນ ພ້ອມກັນພັດທະນາປະເທດຊາດໃຫ້ຈະເລີນຮຸ່ງເຮືອງຂຶ້ນເລື້ອຍໆ. 
(ຂ່າວ-ພາບ: ສົມພົງ ສີສະຫວັດ)