 |
ທ່ານ ຄຳຫຼ້າ ຜິວວັນນາ ໄດ້ຫວນຄືນປະຫວັດຄວາມເປັນມາຂອງວັນທີ 8 ມີນາວ່າ: ວັນແມ່ຍິງສາກົນກຳເນີດເກີດຂຶ້ນໃນທ່າມກາງສະພາບເສດຖະກິດຂອງພວກສັກດິນາ ແລະ ນາຍທຶນຂະຫຍາຍຕົວ ໄດ້ສ້າງຄວາມຮັ່ງມີໃຫ້ພວກນາຍທຶນຊ້ຳພັດຍິ່ງເພີ່ມຄວາມທຸກຍາກລຳບາກ ໃຫ້ແກ່ຊາວຜູ້ອອກແຮງງານ ໂດຍສະເພາະແມ່ນກຳມະກອນເພດຍິງ ຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ້າງແຮງງານລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ. ຕໍ່ໜ້າສະພາບການ ແລະ ຄວາມທຸກທໍລະມານດັ່ງກ່າວ, ກຳມະກອນແມ່ຍິງ ຮູ້ສຶກຄຽດແຄ້ນ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້ທວງໃຫ້ພວກນາຍທຶນ ຕ້ອງແກ້ໄຂຊີວິດການເປັນຢູ່ຂອງເຂົາເຈົ້າ; ມາເຖິງປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນ ແລະ ໄດ້ຈັດກອງປະຊຸມສາກົນກ່ຽວກັບບັນຫາແມ່ຍິງຂຶ້ນເປັນຄັ້ງທຳອິດ ຢູ່ໂກເປນຮາກ ນະຄອນຫຼວງປະເທດເດນມາກ, ມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ. ກອງປະຊຸມດັ່ງກ່າວ, ໄດ້ຕົກລົງຮັບຮອງເອົາ ວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ ຊຶ່ງແມ່ນເຫດການການເມືອງທີ່ສຳຄັນ, ເປັນຂີດໝາຍແຫ່ງໄຊຊະນະ ຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ ແລະ ທວງໃຫ້ມີສິດສະເໜີພາບ ປະຊາທິປະໄຕ ຄືກັບເພດຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ ພາຍໃຕ້ຄຳຂວັນ ຜູ້ໜຶ່ງເຮັດວຽກມື້ລະ 8 ຊົ່ວໂມງ ແມ່ຍິງ ແລະ ເພດຊາຍ ເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ ແລະ ປົກປັກຮັກສາສັນຕິພາບຂອງໂລກ, ນັບແຕ່ນັ້ນມາ ວັນທີ 8 ມີນາ ຈຶ່ງເປັນວັນແມ່ຍິງສາກົນຈົນເຖິງປັດຈຸບັນ.
ການປາຖະກາຖາຄັ້ງນີ້, ກໍເພື່ອເຮັດໃຫ້ເອື້ອຍນ້ອງແມ່ຍິງ ມີຄວາມຮັບຮູ້ເຂົ້າໃຈເລິກເຊິ່ງຕໍ່ກັບການຕໍ່ສູ້ຮຽກຮ້ອງເອົາສິດຜົນປະໂຫຍດອັນເປັນທຳ, ເທົ່າທຽມກັບເພດຊາຍ ແລະ ການເຄື່ອນໄຫວດ້ານຕ່າງໆຂອງແມ່ຍິງສາກົນ. ໃນໂອກາດນີ້, ກໍໄດ້ສ້າງກິດຈະກຳແຂງຂັນກິລາເປັນຕົ້ນແມ່ນ ກິລາໜີບບໝາກປຸມເປົ້າໃຫ້ແຕກ ມີທີມເຂົ້າຮ່ວມແຂ່ງຂັນ 18 ທີມ, ກິລາດູດນົມຈາກເຕົ້າມີທີມເຂົ້າຮ່ວມແຂ່ງຂັນ 16 ທີມ ແລະ ກິລາປິດຕາກິນກ້ວຍມີຜູ້ເຂົ້າຮ່ວມແຂ່ງຂັນ 19 ທີມ.
 |
ຜ່ານການແຂ່ງຂັນ ກິລາໜີບໝາກປຸມເປົ້າໃຫ້ແຕກທີ1 ໄດ້ແກ່ບ້ານຖີ່ນ, ທີ2 ຫ້ອງການຄະນະໂຄສະນາອົບຮົມເມືອງ, ທີ3 ຫ້ອງການສືກສາທິການ ແລະ ກິລາເມືອງ, ກິລາປິດຕາກີນກ້ວຍທີ1 ໄດ້ແກ່ ບ້ານຖີ່ນ, ທີ2 ໂຮງຮຽນ ມໍຕົ້ນມິດຕະພາບ, ທີ3 ຫ້ອງການຄະນະໂຄສະນາອົບຮົມເມືອງ, ກິລາດູດນົມຈາກເຕົ້າ ທີ1 ໄດ້ແກ່ ຫ້ອງການສຶກສາທິການ ແລະ ກິລາເມືອງ, ທີ2 ໂຮງຮຽນ ມສ ເອກະພາບ, ທີ3 ຫ້ອງການຄະນະໂຄສະນາອົບຮົມເມືອງ.
(ຂ່າວ+ພາບ: ສົມພົງ ສີສະຫວັດ)
ຄໍາເຫັນ