ເມືອງຊຽງຮ່ອນປະກາດຮັບຮອງກາໝາຍສິນຄ້າໜຶ່ງເມືອງໜຶ່ງຜະລະລິດແຫ່ງຊາດ

ໃນວັນທີ 27 ພະຈິກ ຜ່ານມາ ຢູ່ເມືອງຊຽງຮ່ອນ ແຂວງໄຊຍະບູລີ ໄດ້ຈັດພິທີປະກາດ ແລະ ຮັບຮອງເອົາ ຜະລິດຕະພັນຊາຂອງບໍລິສັດ ນິພົນຊັບການຄ້າ ຂາອອກ-ຂາເຂົ້າ ຈຳກັດຜູ້ດຽວ ບ້ານດອນຕັນ ເມືອງຊຽງຮ່ອນ ຮັບຮອງເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼື ODOP ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ຈັນເພັງ ພັນທຸອາມາດ ຫົວໜ້າພະແນກ ອຸດສາຫະກຳ ແລະ ການຄ້າ ແຂວງໄຊຍະບູລີ ເປັນກຽດເຂົ້າຮ່ວມ ຂອງທ່ານ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງໄຊຍະບູລີ, ມີທ່ານ ກົງທອງ ສິດທິໄຊ ເຈົ້າເມືອງໆຊຽງຮ່ອນ ມີບັນດາອຳນາດການປົກຄອງເມືອງ ແຂກຖືກເຊີນ ແລະ ຫົວໜ່ວຍທຸລະກິດ ພ້ອມດ້ວຍມວນຊົນພາຍໃນເມືອງເຂົ້າຮ່ວມ. 
         ໃນພິທີ, ທ່ານ ສີເມືອງ ອິນທະວົງ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງຊຽງຮ່ອນໄດ້ກ່າວວ່າ: ການຊຸກຍູ້ສົ່ງເສີມ, ປະເມີນຫົວໜ່ວຍດັ່ງກ່າວເຫັນວ່າຄົບຕາມມາດຖານ ແລະ ເງື່ອນໄຂຂອງກະຊວງອຸດສາຫະກຳ ແລະ ການຄ້າວາງອອກຈຶ່ງໄດ້ສະເໜີແຕ່ລະພາກສ່ວນທີ່ກ່ຽວຂ້ອງພິຈາລະນາ, ຈາກນັ້ນກະຊວງອຸດສາຫະກຳ ແລະ ການຄ້າ ຈຶ່ງໄດ້ອອກໃບອະນຸຍາດໃຫ້ ຜະລິດຕະພັນຊາຂອງບໍລິສັດ ນິພົນຊັບການຄ້າ ຂາອອກ-ຂາເຂົ້າ ຈຳກັດຜູ້ດຽວ ຕັ້ງຢູ່ບ້ານດອນຕັນ ເມືອງຊຽງຮ່ອນ ນຳໃຊ້ກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼື ODOP ຈຸດເດັ່ນຂອງຜະລິດຕະພັນເປັນຊາໝ້ຽງທໍາມະຊາດ ເປັນພູມປັນຍາຊາວບ້ານທີ່ໄດ້ມີການເຮັດໝ້ຽງສົ້ມ ຍັດໃສ່ບັ້ງ, ຍັດໃສ່ໄຫຂອງຄົນແຕ່ກ່ອນ ແລະຜະລິດຕະພັນຊາໝ້ຽງເປັນພູມປັນຍາທີ່ຄົ້ນຄິດຂອງປະຊາຊົນທີ່ສືບທອດກັນມາຕັ້ງແຕ່ສະໄໝກ່ອນ ໂດຍສະເພາະແມ່ນເຜົ່າລື້, ເຜົ່າຍວນ ໄດ້ລິເລີ່ມການຮຽນຮູ້ ແລະການສືບທອດນຳຜູ້ເຖົ້າຜູ້ແກ່ເປັນຜູ້ສິດສອນໃຫ້ ການສິດສອນນັ້ນແມ່ນການສື່ສານໂດຍປາກເປົ່າ ແລະການລົງມືປະຕິບັດຕົວຈິງໄປນຳອາໄສຄວາມຈື່ຈຳ ໂດຍບໍ່ມີຕຳລາໃດໆ ການຜະລິດໃນແຕ່ກ່ອນແມ່ນຜະລິດເພື່ອເກັບໄວ້ກິນພາຍໃນຄອບຄົວ.ເລີ່ມແຕ່ປີ 2005 ເປັນຕົ້ນມາບໍລິສັດ ນິພົນຊັບ ໄດ້ມາຕັ້ງ ໂຮງງານປຸງແຕ່ງຊາໝ້ຽງຢູ່ບ້ານດອນຕັນເມືອງຊຽງຮ່ອນ ແມ່ນໄດ້ມີການປຸງແຕ່ງເປັນຜະລິດຕະພັນໂດຍຜ່ານຂັ້ນຕອນການຄັດ, ການຕາກ, ການອົບ, ການຂົ້ວ ແລະການຫຸ້ມຫໍ່ເປັນຜະລິດຕະພັນ ເພື່ອຕອບສະໜອງຄວາມຕ້ອງການຂອງຕະຫຼາດພາຍໃນ ແລະ ສົ່ງອອກໄປຕ່າງປະເທດ. ສ້າງມູນຄ່າເພີ່ມ ແລະ ໄດ້ສ້າງລາຍຮັບໃຫ້ປະຊາຊົນມີວຽກເຮັດງານທຳທີ່ໝັ້ນຄົງ. ຜະລິດຕະພັນຊາແດງ ເປັນຍອດໃບຊາອ່ອນໂດຍຜ່ານການຕາກແຫ້ງ ການອົບ ການຂົ້ວ ການຫຸ້ມຫໍ່ ຈະມີລົດຊາດຂົມອ່ອນ ມີນໍ້າເປັນສີແດງໃນເວລາຊົງໃສ່ນໍ້າຮ້ອນ, ຊາຂຽວເປັນຍອດໃບຊາອ່ອນໂດຍຜ່ານການຕາກແຫ້ງ ການອົບ ການຂົ້ວ ການຫຸ້ມຫໍ່ ຈະມີລົດຊາດຂົມອ່ອນໆ ມີນໍ້າເປັນສີຂຽວອ່ອນໃນເວລາຊົງໃສ່ນໍ້າຮ້ອນ, ຈຸດເດັ່ນຂອງຜະລິດຕະພັນເປັນຜະລິດຕະພັນທີ່ເຮັດດ້ວຍຊາທຳມະຊາດທີ່ມີອາຍຸເກົ່າແກ່ຫຼາຍກວ່າ 10 ປີ ການຜະລິດແມ່ນຜະລິດຕາມຄວາມຕ້ອງການຂອງລູກຄ້າໂດຍສະເພາະແມ່ນຜະລິດຕະພັນຊາແດງ ແລະ ຊາຂຽວ ຊຶ່ງເປັນທີ່ຍອມຮັບຂອງຕະຫຼາດພາຍໃນ ແລະ ຕ່າງປະເພດ ຈຸດເດັ່ນອີກຢ່າງໜຶ່ງ ວັດຖຸດິບທີ່ເອົາມາຜະລິດລ້ວນແລ້ວແຕ່ເປັນວັດຖຸດິບພາຍໃນທັງໝົດເຊັ່ນ: ຍອດໃບຊາອ່ອນທີ່ປະຊາຊົນພາຍໃນບ້ານດອນຕັນ, ບ້ານປ່າຫວ້ານ, ບ້ານດອນໄຈ ແລະ ບ້ານອ້ອມຂ້າງເກັບມາຂາຍໃຫ້ ສຳລັບການປຸງແຕ່ງແມ່ນນຳໃຊ້ວັດຖຸດິບຈາກທ້ອງຖິ່ນ 100% ຊັບພະຄຸນຂອງຊາ ແກ້ຮ້ອນໃນ ລົດນໍ້າຕານໃນເລືອດ ຊ່ວຍການໄຫຼວຽນຂອງລະບົບເລືອດໃນຮ່າງກາຍ ຊ່ວຍສະຫຼາຍໄຂມັນ ຊ່ວຍຫຼຸດຄວາມດັນ ແກ້ເມົາຄ້າງໄດ້ດີ ດື່ມແລ້ວຊຸ່ມຄໍ ແລະ ເຮັດໃຫ້ອາຍຸຍືນ ໂດຍໄດ້ຮັບອະນຸຍາດຈາກ ກົມອາຫານແລະຢາ ກະຊວງສາທາລະນະສຸກ ກອຍ/ຜນ ເລກທີ 2021933 ສະເລ່ຍໃນປີໜຶ່ງສ້າງລາຍຮັບຈາກຂາຍຜະລິດຕະພັນໄດ້ 250.000.000 ກີບຕໍ່ປີ.
        ໂອກາດດັ່ງກ່າວ, ທ່ານ ຈັນເພັງ ພັນທຸອາມາດ ໄດ້ມອບໃບຢັ້ງຍືນ ກາໝາຍໜຶ່ງເມືອງໜຶ່ງຜະລິດຕະພັນແຫ່ງຊາດຢ່າງເປັນທາງການ ພ້ອມກັນນັ້ນ ທ່ານຍັງໄດ້ເນັ້ນໜັກໃຫ້ຄະນະຮັບຜິດຊອບແຕ່ລະຂັ້ນເປັນເຈົ້າການຊຸກຍູ້ສົ່ງເສີມ ສ້າງທຸກເງື່ອນໄຂອຳນວຍຄວາມສະດວກໃຫ້ຫົວໜ່ວຍດັ່ງກ່າວໄດ້ຮັບການພັດທະນາໃຫ້ແຂງແຮງຂຶ້ນກວ່າເກົ່າ ພ້ອມທັງສືບຕໍ່ຕິດຕາມສົ່ງເສີມຫົວໜ່ວຍທຸລະກິດທີ່ຢູ່ພາຍໃນເມືອງ ເພື່ອສ້າງໃຫ້ແຕ່ລະຫົວໜ່ວຍໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນໃຫ້ເພື່ມຂື້ນ. 
ຂ່າວ-ພາບ: ດອນ ຂຽວພະນາ