 |
ສື່ມວນຊົນແອັດສະປາຍເຫັນວ່າ: ຜົນງານເຫຼົ່ານີ້ໄດ້ເພີ່ມຄວາມໄວ້ເນື້ອເຊື່ອໃຈກັນທາງຍຸດທະສາດລະຫວ່າງສອງປະເທດ ແລະ ຊຸກຍູ້ “ການສົນທະນາທີ່ມີລັກສະນະສ້າງສັນ ແລະ ການຮ່ວມມືຕົວຈິງ” ລະຫວ່າງສອງຝ່າຍຢ່າງແຂງແຮງ.
ເປັນເວລາດົນນານມາແລ້ວ, ຈີນ ແລະ ແອັດສະປາຍ ມີຄວາມເຫັນທີ່ເປັນເອກະພາບກັນຢ່າງກວ້າງຂວາງໃນການປົກປັກຮັກສາສັນຕິພາບ ແລະ ການພັດທະນາຂອງໂລກ, ທັງມີແຮງຂັບເຄື່ອນການຮ່ວມມືລະຫວ່າງສອງຝ່າຍ. ວັນທີ 14 ເມສາ ຜ່ານມານີ້ ຢູ່ນະຄອນຫຼວງປັກກິ່ງ, ໃນເວລາທ່ານ ສີຈິ້ນຜິງ ພົບປະກັບທ່ານ ເປໂດຣ ຊານເຊັສ, ຜູ້ນຳສອງທ່ານລ້ວນແຕ່ໄດ້ເນັ້ນໜັກເຖິງຄຳສັບໜຶ່ງ ຄື: “ຈິດໃຈໝັ້ນຄົງດ້ານຍຸດທະສາດ”. ທ່ານ ສີຈິ້ນຜິງ ກ່າວວ່າ: ຈີນ ແລະ ແອັດສະປາຍລ້ວນແຕ່ເປັນປະເທດທີ່ມີຫຼັກການ ແລະ ມີສິນທຳ, ຄັດຄ້ານບໍ່ໃຫ້ໂລກກັບຄືນໄປສູ່ກົດແຫ່ງປ່າ ຫຼື ຜູ້ໃດແຂງແຮງກວ່າຜູ້ນັ້ນເປັນຝ່າຍຊະນະ, ຮ່ວມກັນປົກປ້ອງລັດທິຫຼາຍຝ່າຍທີ່ແທ້ຈິງ, ປົກປ້ອງລະບົບສາກົນທີ່ຖືອົງການສະຫະປະຊາຊາດເປັນແກນກາງ ແລະ ລະບຽບສາກົນທີ່ຖືກົດໝາຍສາກົນເປັນພື້ນຖານ. ທ່ານ ເປໂດຣ ຊານເຊັສ ກ່າວວ່າ: ແອັດສະປາຍສະໜັບສະໜູນ 4 ຂໍ້ລິເລີ່ມທົ່ວໂລກຂອງຈີນຢ່າງຕັ້ງໜ້າ, ຍິນດີແລກປ່ຽນ ແລະ ປະສານງານກັບຈີນຢ່າງແໜ້ນແຟ້ນ, ຮ່ວມກັນຮັບມືກັບສິ່ງທ້າທາຍໃນດ້ານຕ່າງໆ ເຊັ່ນ: ການເມືອງພູມີພາກສາກົນ, ລັດທິປົກປ້ອງການຄ້າ ແລະ ການປ່ຽນແປງຂອງດິນຟ້າອາກາດ, ຮ່ວມກັນປົກປ້ອງກົດໝາຍສາກົນ ແລະ ລັດທິຫຼາຍຝ່າຍ. ນັກວິເຄາະເຫັນວ່າ: ຄວາມພະຍາຍາມຂອງຈີນ ແລະ ແອັດສະປາຍ ໃນການຮ່ວມກັນປົກປ້ອງລະບົບລັດທິຫຼາຍຝ່າຍ ຈະສ້າງສະຖຽນລະພາບຫຼາຍກວ່າເກົ່າໃຫ້ແກ່ໂລກ ທີ່ເຕັມໄປດ້ວຍການປ່ຽນແປງ ແລະ ຄວາມປັ່ນປ່ວນທີ່ສັບສົນ.
ໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ, ຈີນບໍ່ພຽງແຕ່ມີຄວາມຕັດສິນໃຈທີ່ເດັດດ່ຽວໃນການຊຸກຍູ້ຄວາມທັນສະໄໝແບບຈີນເທົ່ານັ້ນ, ຍັງມີວິໄສທັດທີ່ຈະແບ່ງປັນໂອກາດການພັດທະນາໃຫ້ແກ່ໂລກ ດ້ວຍການເປີດປະຕູສູ່ພາຍນອກໃນລະດັບສູງ. ໃນໂລກທີ່ປັ່ນປ່ວນວຸ່ນວາຍ, ຈີນ ແລະ ແອັດສະປາຍສືບຕໍ່ຮັກສາຈິດໃຈໝັ້ນຄົງດ້ານຍຸດທະສາດ ແລະ ລົງເລິກການຮ່ວມມືຕົວຈິງ, ບໍ່ພຽງແຕ່ຈະສ້າງຄວາມຜາສຸກໃຫ້ແກ່ປະຊາຊົນສອງຊາດເທົ່ານັ້ນ, ຍັງຈະຊ່ວຍສ້າງແຮງຂັບເຄື່ອນທີ່ເຂັ້ມແຂງກວ່າເກົ່າໃຫ້ແກ່ການຮ່ວມມືຈີນ-ເອີຣົບ ກໍຄືສັນຕິພາບ ແລະ ການພັດທະນາຂອງໂລກອີກດ້ວຍ.
ຄໍາເຫັນ