ທ່ານ ພູວົງ ບຸນຊູ ຮອງເຈົ້າແຂວງວຽງຈັນ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ແຂວງວຽງຈັນ ຕໍ່ກອງປະຊຸມສະພາປະຊາຊົນແຂວງວຽງຈັນ ສະໄໝສາມັນ ເທື່ອທີ 6 ຊຸດທີ II ຄັ້ງວັນທີ 26-29 ທັນວາ 2023 ຊຶ່ງບາງຕອນທ່ານໄດ້ຍົກໃຫ້ເຫັນວ່າ: ໃນໄລຍະ 1 ປີ ຜ່ານມາ ໂດຍພາຍໃຕ້ການຊີ້ນໍາ-ນໍາພາຂອງຄະນະບໍລິຫານງານພັກແຂວງ ແລະ ການຈັດຕັ້ງປະຕິບັດໜ້າທີ່ວຽກງານຂອງພະແນກ ການຕ່າງໆຂອງແຂວງ ເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ. ລວມຍອດຜະລິດຕະພັນພາຍໃນ (GDP) ຂະຫຍາຍຕົວ 4,7%, ຄິດເປັນມູນຄ່າໃນປັດຈຸບັນ 9.704 ຕື້ກີບ, ສະເລ່ຍຕໍ່ຫົວຄົນໄດ້ 19,93 ລ້ານກີບ ຫຼື 1.308 ໂດລາ, ເທົ່າກັບ 97,46% ແລະ ມີການຂະຫຍາຍຕົວຕາມໂຄງປະກອບເສດຖະກິດ ຄື: ຂະແໜງກະສິກໍາ ມີມູນຄ່າທັງໝົດ 3.135 ຕື້ກີບ, ມີອັດຕາການຂະຫຍາຍຕົວເພີ່ມຂຶ້ນ 2,64%, ກວມເອົາ 34,87% ຂອງ GDP, ຜະລິດເຂົ້າທຽບໃສ່ປີຜ່ານມາ ເພີ່ມຂຶ້ນ 2%, ຜົນຜະລິດເຂົ້າທັງໝົດ 281.194 ໂຕນ, ສະເລ່ຍເຂົ້າເປືອກ 683 ກິໂລຕໍ່ຄົນຕໍ່ປີ, ອັນພົ້ນເດັ່ນແມ່ນ ການຜະລິດພືດປະຕິບັດໄດ້ 54.017 ເຮັກຕາ, ລື່ນແຜນການ 22%, ຜົນຜະລິດໄດ້ 665.456 ໂຕນ, ລື່ນແຜນການ 44% ການຜະລິດຊີ້ນ, ປາ ແລະ ໄຂ່ ໄດ້ 35.023 ໂຕນ, ເທົ່າກັບ 100,10% ຂອງແຜນການ, ສະເລ່ຍບໍລິໂພກຊີ້ນ 66 ກິໂລ/ຄົນ/ປີ. ພ້ອມນີ້ການຜະລິດເປັນສິນຄ້າ ກໍມີບາດກ້າວຂະຫຍາຍ ຕົວດີຂຶ້ນ ປູກພືດເປັນສິນຄ້າໄດ້ 423.174 ໂຕນ, ມູນຄ່າ 1.768,22 ຕື້ກີບ, ໃນນີ້: ປ້ອນເຂົ້າໂຮງງານ 79.665 ໂຕນ, ມູນຄ່າ 299,94 ຕື້ກີບ, ຈໍາໜ່າຍພາຍໃນ 190.094 ໂຕນ, ມູນຄ່າ 570,28 ຕື້ກີບ ແລະ ສົ່ງອອກ 153.758 ໂຕນ, ມູນຄ່າ 898,00 ຕື້ກີບ. ການລ້ຽງສັດແບບເປັນຟາມມີທັງໝົດ 128 ຟາມ, ທຽບໃສ່ປີຜ່ານມາເພີ່ມຂຶ້ນ 3 ຟາມ, ສາມາດຂາຍເປັນສິນຄ້າໄດ້ 234,87 ຕື້ກີບ. ຂະແໜງອຸດສາຫະກໍາ: ມີມູນຄ່າ 3.575 ຕື້ກີບ, ມີອັດຕາການຂະຫຍາຍຕົວພຽງ 5,53%, ກວມເອົາ 33,33% ຂອງ GDP, ໃນນັ້ນ: ລວມຍອດຜະລິດຕະພັນອຸດສາຫະກໍາ ແລະ ຫັດຖະກໍາໄດ້ 2.127,71 ຕື້ກີບ, ເທົ່າກັບ 100,4% ຂອງແຜນການ; ລວມຍອດການຜະລິດພະລັງງານໄຟຟ້າໄດ້ 1.995,21 ກິກາວັດໂມງ, ເທົ່າກັບ 97,56% ຂອງແຜນການ, ມູນຄ່າ 1.064,49 ຕື້ກີບ, ເທົ່າກັບ 96,60%; ທຽບໃສ່ປີຜ່ານມາຫຼຸດລົງ 3,60%, ການຈໍາໜ່າຍໄດ້ 1.966,47 ກິກາວັດໂມງ, ມູນຄ່າ 1.471,20 ຕື້ກີບ, ເທົ່າກັບ 97,27% ຂອງແຜນການ ແລະ ການຜະລິດແຮ່ທາດໄດ້ 735,60 ຕື້ກີບ, ລື່ນແຜນ 3,16% ທຽບໃສ່ປີຜ່ານມາເພີ່ມຂຶ້ນເກືອບເທົ່າຕົວ ແລະ ການຈໍາໜ່າຍໄດ້ 1.419,63 ຕື້ກີບ, ເທົ່າກັບ 92,56% ຂອງແຜນການ ລວມເຖິງການຂຸດຄົ້ນແຮ່ທາດຕ່າງໆ ເພີ່ມຂຶ້ນເຊັ່ນດ່ຽວກັນ. ຂະແໜງການບໍລິການ: ມີມູນຄ່າ 2.787 ຕື້ກີບ, ມີອັດຕາການຂະຫຍາຍຕົວເພີ່ມຂຶ້ນ 5,13%, ກວມເອົາ 28.85% ຂອງ GDP, ການຈໍລະຈອນສິນຄ້າຂາຍຍົກ-ຂາຍຍ່ອຍ ມູນຄ່າ 3.777,07 ຕື້ກີບ, ລື່ນແຜນການ 10,55%; ການນໍາເຂົ້າ-ສົ່ງອອກສິນຄ້າໄດ້ທັງໝົດ 20,51 ລ້ານໂດລາ, ເທົ່າກັບ 32,68% ຂອງແຜນການ ແລະ ມີມູນຄ່ານໍາເຂົ້າສິນຄ້າໄດ້ 0,83 ລ້ານໂດລາ, ເທົ່າກັບ 2% ຂອງແຜນການ. ມີການບໍລິການຂົນສົ່ງສິນຄ້າທາງບົກ-ທາງນໍ້າ ໄດ້ 1.025 ພັນໂຕນ, ລື່ນແຜນການ 4,6%. ລົງຊຸກຍູ້ຫົວໜ່ວຍທຸລະກິດດ້ານບໍລິການການທ່ອງທ່ຽວ ແລະ ດຶງດູດນັກທ່ອງທຽ່ວເຂົ້າມາທ່ຽວແຂວງວຽງຈັນ ໄດ້ 817.369 ເທື່ອຄົນ, ລື່ນແຜນການ 77%, ສ້າງລາຍຮັບທົ່ວສັງຄົມໄດ້ 553,66 ຕື້ກີບ, ລື່ນແຜນການ 4 ເທົ່າ. ຊຸກຍູ້ບັນດາ ເມືອງຜະລິດສິນຄ້າໜຶ່ງເມືອງໜຶ່ງຜະລິດຕະພັນໄດ້ເພີ່ມຂຶ້ນ 3 ຫົວໜ່ວຍ, ມີສິນຄ້າທັງໝົດ 26 ຫົວໜ່ວຍ ແລະ 124 ລາຍການ. ຂະແໜງອາກອນ: ມີມູນຄ່າ 287 ຕື້ກີບ, ມີອັດຕາການຂະຫຍາຍຕົວ 0,59%, ກວມເອົາ 2,95% ຂອງ GDP.
ປັດໄຈທີ່ຊຸກຍູ້ໃຫ້ເສດຖະກິດຂະຫຍາຍຕົວໄດ້ແມ່ນ: ຂະແໜງກະສິກໍາການປູກຝັງ-ລ້ຽງສັດ ທີ່ສົ່ງອອກ, ຮອງລົງມາແມ່ນການບໍລິການ-ການທ່ອງທ່ຽວທີ່ມີທ່າອ່ຽງຂະຫຍາຍຕົວດີຂຶ້ນ ແລະ ການຂຸດຄົ້ນແຮ່ທາດ, ສ່ວນຂະແໜງອຸດສາຫະກໍາປຸງແຕ່ງ, ຫັດຖະກໍາ ແລະ ຂະແໜງການກໍ່ສ້າງກໍຂະຫຍາຍຕົວພໍສົມຄວນ.
(ຂ່າວ-ພາບ: ແກ້ວອຸດົມ)
ປັດໄຈທີ່ຊຸກຍູ້ໃຫ້ເສດຖະກິດຂະຫຍາຍຕົວໄດ້ແມ່ນ: ຂະແໜງກະສິກໍາການປູກຝັງ-ລ້ຽງສັດ ທີ່ສົ່ງອອກ, ຮອງລົງມາແມ່ນການບໍລິການ-ການທ່ອງທ່ຽວທີ່ມີທ່າອ່ຽງຂະຫຍາຍຕົວດີຂຶ້ນ ແລະ ການຂຸດຄົ້ນແຮ່ທາດ, ສ່ວນຂະແໜງອຸດສາຫະກໍາປຸງແຕ່ງ, ຫັດຖະກໍາ ແລະ ຂະແໜງການກໍ່ສ້າງກໍຂະຫຍາຍຕົວພໍສົມຄວນ.
(ຂ່າວ-ພາບ: ແກ້ວອຸດົມ)
ຄໍາເຫັນ