 |
ທ່ານ ສະເຫວີຍ ສີລາວັນ ປະທານຄະນະກຳມະການປົກຄອງ ນະຄອນ ຫຼວງພະບາງ ໄດ້ລາຍງານສະພາບການກະກຽມ ແລະ ສ້າງຕັ້ງຕາແສງພາຍໃນນະຄອນ ຫຼວງພະບາງ ວ່າ: ນະຄອນ ຫຼວງພະບາງ ໄດ້ກຳນົດໃຫ້ມີທັງໝົດ 05 ຕາແສງ ແລະ ໄດ້ປະກາດສໍາເລັດແລ້ວ 01 ຕາແສງຄື: ຕາແສງຊຽງທອງ, ສ່ວນ 04 ຕາແສງ ທີ່ປະກາດຄັ້ງນີ້ ປະກອບມີ ຕາແສງ ສັງຄະໂລກ ມີ 27 ບ້ານ, ພົນລະເມືອງ 26,526 ຄົນ, ຍິງ 13,331 ຄົນ ມີສໍານັກງານຕັ້ງຢູ່ ໂຮງຮຽນປະຖົມບ້ານສັງຄະໂລກ, ຕາແສງເມືອງງາ ມີ 21 ບ້ານ, ພົນລະເມືອງ 31,275 ຄົນ, ຍິງ 15,746 ຄົນ, ມີສໍານັກງານຕັ້ງຢູ່ ຫ້ອງການບ້ານເມືອງງາ, ຕາແສງ ເມືອງຂາຍ ມີ 19 ບ້ານ, ພົນລະເມືອງ 10,928 ຄົນ, ຍິງ 4,593 ຄົນ, ມີສໍານັກງານ ແມ່ນຕັ້ງຢູ່ ຫ້ອງການບ້ານເມືອງຂາຍ ແລະ ຕາແສງປາກເຊືອງ ມີ 18 ບ້ານ, ພົນລະເມືອງ 9,412 ຄົນ, ຍິງ 4,593 ຄົນ, ມີສໍານັກງານຕັ້ງຢູ່ ຫ້ອງການບ້ານ ກອກຫວານ.
 |
ຜ່ານການເກັບກຳ ແລະ ສັງລວມດ້ານຂໍ້ມູນທັງ 04 ຕາແສງ ເຫັນວ່າຄົບຖ້ວນຕາມມາດຖານ ແລະ ເງື່ອນໄຂທີ່ໄດ້ກຳນົດໄວ້ ຕາມຄໍາແນນະນໍາ ຂອງຄະນະຈັດຕັ້ງສູນກາງພັກ ເປັນຕົ້ນ ມີທີ່ຕັ້ງພູມສາດທີ່ເໝາະສົມແກ່ການປົກຄອງ ແລະ ການສະໜອງການບໍລິການຂອງລັດໃຫ້ແກ່ປະຊາຊົນ; ມີຈຳນວນພົນລະເມືອງ ຖືກຕ້ອງຕາມເງື່ອນໄຂ ທີ່ໄດ້ກໍານົດໄວ້ຕາມລະບຽບການ, ມີຢ່າງໜ້ອຍສາມບ້ານຂຶ້ນໄປ, ແຕ່ບໍ່ເກີນ 35 ບ້ານ; ມີໂຄງລ່າງພື້ນຖານ ແລະ ມີເງື່ອນໄຂໃນການພັດທະນາເສດຖະກິດ-ສັງຄົມ; ພ້ອມນັ້ນໄດ້ປະກອບກົງຈັກຂອງຕາແສງ ຕາມລະບຽບ.
ໃນພິທີ ໄດ້ມີການຜ່ານຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການອະນຸມັດ ສ້າງຕັ້ງອົງຄະນະພັກຮາກຖານ 4 ຕາແສງ, ຜ່ານຂໍ້ຕົກລົງຂອງປະທານຄະນະກຳມະການປົກຄອງແຂວງວ່າດ້ວຍການ ອານຸມັດສ້າງຕັ້ງ 4 ຕາແສງ, ຜ່ານມະຕິຕົກລົງຂອງຄະນະປະຈຳພັກນະຄອນ ວ່າດ້ວຍການອະນຸມັດ ແຕ່ງຕັ້ງຄະນະບໍລິຫານງານພັກຮາກຖານ 4 ຕາແສງ ແລະ ຜ່ານຂໍ້ຕົກຂອງປະທານຄະນະກຳມະການປົກຄອງນະຄອນ ວ່າດ້ວຍການ ແຕ່ງຕັ້ງປະທານ-ຮອງປະທານຄະນະກຳມະການປົກຄອງ 4 ຕາແສງ ໃນນັ້ນ ໄດ້ແຕ່ງຕັ້ງ ທ່ານ ນາງ ສຸດາວອນ ອ່ອນແກ້ວ ເປັນເລຂາຄະນະບໍລິຫານງານພັກ-ປະທານຄະນະກຳມະການປົກຄອງຕາແສງເມືອງງາ, ທ່ານ ສອນເພັດ ທຳມຸງຄຸນ ເປັນເລຂາຄະນະບໍລິຫານງານພັກ-ປະທານ ຄະນະກຳມະການປົກຄອງຕາແສງສັງຄະໂລກ, ທ່ານ ສົມສັກ ອີນທະມາໄລ ເປັນເລຂາຄະນະບໍລິຫານງານພັກ-ປະທານຄະນະກຳມະການປົກຄອງຕາແສງປາກເຊືອງ ແລະ ທ່ານ ບຸນທັນ ອີນສະຫວ່າງ ເປັນເລຂາຄະນະບໍລິຫານງານພັກ-ປະທານຄະນະກຳມະການປົກຄອງຕາແສງເມືອງຂາຍ, ພ້ອມນັ້ນໄດ້ມີການແຕ່ງຕັ້ງ ຫົວໜ້າໜ່ວຍງານ, ພະນັກງານຊ່ວຍວຽກໃນ 4 ຕາແສງ ຕື່ມອີກ.
 |
ໂອກາດນີ້ ທ່ານ ບຸນເຫຼືອ ສີນໄຊວໍຣະວົງ ໄດ້ມີຄຳເຫັນເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງໜ້າທີ່ ປະຈຳຢູ່ແຕ່ລະຕາແສງ ພ້ອມກັນສຸມໃສ່ປະຕິບັດວຽກງານໃຫ້ມີຜົນສຳເລັດ ຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນກວ່າເກົ່າ. ຕອນທ້າຍ ທ່ານໄດ້ຕາງໜ້າການນຳຂອງແຂວງ ມອບເງິນຊຸກຍູ້ບໍລິຫານວຽກງານໃຫ້ທັງ 4 ຕາແສງຈຳນວນ 120 ລ້ານກີບ, ທັງໄດ້ຮ່ວມເປີດປ້າຍ ແລະ ລັ່ນຄ້ອງ 9 ບາດເພື່ອປະກາດສ້າງຕັ້ງ 4 ຕາແສງຢ່າງເປັນທາງການ.
ຂ່າວ: ຫຼວງພະບາງ
ຄໍາເຫັນ