ເປັນເຈົ້າພາບ ຈັດຂຶ້ນໃນລະຫວ່າງວັນທີ 17-19 ກັນຍາ ນີ້, ທ່ານ ອິງ ກີມລຽງ ຮອງເຈົ້າແຂວງຊຽມຣຽບ ຣາຊະອານາຈັກກຳປູເຈຍ ພ້ອມຄະນະ ໄດ້ພົບປະກັບ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໃນວັນທີ 17 ກັນຍານີ້ ທີ່ ນວ ສປປ ລາວ.
ການພົບປະໃນຄັ້ງນີ້, ທ່ານ ອາດສະພັງທອງ ສີພັນດອນ ໄດ້ສະແດງການຕ້ອນຮັບ ແລະລາຍງານວ່າ: ສໍາລັບການພັດທະນາເສດຖະກິດ ຂອງ ນວ ໃນ 6 ເດືອນຕົ້ນປີ 2024 ຂະແໜງກະສິກໍາ ຂະຫຍາຍຕົວເພີ່ມຂຶ້ນ 4,2% ກວມເອົາ 13% ຂອງ GDP; ຂະແໜງອຸດສາຫະກຳຂະຫຍາຍຕົວເພີ່ມຂຶ້ນ 7,05% ກວມເອົາ 48% ຂອງ GDP ແລະ ຂະແໜງການບໍລິການຂະຫຍາຍຕົວ ເພີ່ມຂຶ້ນ 3,8% ກວມເອົາ 39% ຂອງ GDP. ໃນນັ້ນ, ການພັດທະນາຕົວເມືອງ ໄດ້ຈັດຕັ້ງປະຕິບັດວຽກງານຮັກສາຄວາມສະອາດຕົວເມືອງ, ອະນາໄມເສັ້ນທາງສາຍຫຼັກ ແລະ ບັນດາແຜນງານຕ່າງໆກ່ຽວກັບການຄຸ້ມຄອງຂີ້ເຫຍື້ອ ໃນ ນວ ຕາມຍຸດທະສາດ ແລະ ແຜນດຳເນີນງານການຄຸ້ມຄອງຂີ້ເຫຍື້ອແບບຢືນຍົງ ປີ 2021-2030; ໄດ້ສ້ອມແປງ, ປະດັບປະດາຕາມເສັ້ນທາງ, ຖະໜົນສາຍຫຼັກ, ບັນດາໂຮງແຮມ, ຮ້ານອາຫານ, ສວນສາທາລະນະຕ່າງໆ ເພື່ອກະກຽມຕ້ອນຮັບກອງປະຊຸມອາຊຽນ ຄັ້ງທີ 44-45 ທີ່ ສປປ ລາວ ຈະເປັນເຈົ້າພາບໃນເດືອນ ຕຸລາ ປີ 2024 ທີ່ຈະມາເຖິງນີ້.
ການພົບປະກັນໃນຄັ້ງນີ້, ເປັນຂີດໝາຍອັນສໍາຄັນໜຶ່ງຂອງການພົວພັນຮ່ວມມື ລະຫວ່າງ ສອງນະຄອນ ແລະ ເພື່ອເປັນການເສີມຂະຫຍາຍການພົວພັນຮ່ວມມື ຂອງສອງນະຄອນ ໃຫ້ກ້າວເຂົ້າສູ່ລວງເລິກ ແລະ ເປັນຮູບປະທຳຕົວຈິງ. ທ່ານ ອາດສະພັງທອງ ສີພັນດອນ ຍັງສະເໜີໃຫ້ມີການແລກປ່ຽນບົດຮຽນການສົ່ງເສີມວຽກງານການທ່ອງທ່ຽວ, ການຄຸ້ມຄອງອະນຸລັກຮັກສາສະຖານທີ່ທ່ອງທ່ຽວທາງປະຫວັດສາດ ແລະ ວັດທະນະທໍາ ຊຶ່ງແຂວງຊຽມຣຽບມີບົດຮຽນຫຼາຍໃນດ້ານນີ້ ແລະ ຮ່ວມມືໃນດ້ານອື່ນໆ ທີ່ສອງຝ່າຍມີຄວາມສົນໃຈຮ່ວມກັນ ຈົນກ້າວໄປສູ່ການສ້າງນະຄອນມິດຕະພາບຮ່ວມກັນໃນອະນາຄົດ.
ທ່ານ ອິງ ກີມລຽງ ໄດ້ສະແດງຄວາມຂອບໃຈ ທີ່ໃຫ້ການຕ້ອນຮັບຢ່າງອົບອຸ່ນພ້ອມຈະສືບຕໍ່ເສີມຂະຫຍາຍການຮ່ວມມືໃນດ້ານອື່ນໆໃນຕໍ່ໜ້າ.
(ຂ່າວ: ວັນເພັງ-ພາບ: ສຸກສະຫວັນ)
ຄໍາເຫັນ