 |
ການບັນຍາຍໃນຄັ້ງນີ້, ທ່ານນາງ ຫຼູຮຸ້ຍຫຼິງ ໄດ້ຍົກໃຫ້ເຫັນນິຍາມ, ຫຼັກການ ແລະ ຄວາມໝາຍຂອງສື່ສາກົນ, ຮູບແບບການຮ່ວມມືດ້ານສື່ສາກົນລວມເຖິງສື່ສິ່ງພິມ, ສື່ເອເລັກໂຕຣນິກ, ສື່ແບບເກົ່າ, ສື່ແບບໃໝ່ພ້ອມທັງລົງເລິກເຖິງການພັດທະນາການຂອງວຽກງານສື່ມວນຊົນລາວ ແລະ ການກຳເນີດຂອງສື່ມວນຊົນໃນ ສປປ ລາວ.
ທ່ານນາງ ຫຼູຮຸ້ຍຫຼິງ ກ່າວໃຫ້ຮູ້ອີກວ່າ: ສຳລັບປະຫວັດສາດການຮ່ວມມືລາວ-ຈີນໃນສະໄໝປະຕິວັດໃນປີ 1956-1975 ໄດ້ກ່າວເຖິງການຮ່ວມມືລະຫວ່າງແຂວງຢຸນນານ ສປ ຈີນ ກັບປະເທດລາວໃນດ້ານສື່ມວນຊົນ. ໃນໄລຍະດັ່ງກ່າວ, ຝ່າຍຈີນໄດ້ຮ່ວມມືສ້າງສະຖານີວິທະຍຸ 5 ແຫ່ງໃນເຂດພາກເໜືອຂອງລາວພ້ອມທັງສົ່ງບຸກຄະລາກອນວິຊາການ ແລະ ເຕັກນິກດ້ານສື່ສິ່ງພິມເຂົ້າມາຊ່ວຍເຫຼືອ ແລະ ສົ່ງເສີມວຽກງານສື່ມວນຊົນລາວ.
ຈາກພື້ນຖານການຮ່ວມມືໃນໄລຍະຜ່ານມາ, ການຮ່ວມມືດ້ານສື່ສາກົນລະຫວ່າງລາວ-ຈີນ ໄດ້ພັດທະນາເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ເລິກເຊິ່ງຕໍ່ເນື່ອງ.
 |
ການບັນຍາຍໃນຄັ້ງນີ້, ຍັງເປັນເວທີໃຫ້ນັກຂ່າວໜຸ່ມຂອງ ສປປ ລາວ ໄດ້ຮ່ວມຖອດຖອນບົດຮຽນ, ແລກປ່ຽນທັດສະນະ ແລະ ຮຽນຮູ້ປະສົບການຊຶ່ງກັນ ແລະ ກັນ. ທັງນີ້ເພື່ອສືບຕໍ່ເສີມສ້າງການຮ່ວມມືດ້ານສື່ສາກົນລະຫວ່າງລາວ-ຈີນໃຫ້ແໜ້ນແຟ້ນຍິ່ງຂຶ້ນ, ພ້ອມທັງສົ່ງເສີມການແລກປ່ຽນຂໍ້ມູນຂ່າວສານລະຫວ່າງສື່ມວນຊົນຂອງສອງປະເທດໃຫ້ຫຼາຍຂຶ້ນທັງໃນປັດຈຸບັນ ແລະ ໃນອະນາຄົດ. ໃນຕອນບ່າຍຂອງວັນດຽວກັນ, ຍັງໄດ້ຮັບຟັງການບັນຍາຍໃນຫົວຂໍ້: ການວະເຄາະກໍລະນີການຮ່ວມມືລາວ-ຈີນໃນຍຸກສື່ປະສົມປະສານ.
ຂ່າວ: ພູວັນ
ຄໍາເຫັນ