 |
ໃນພິທີ ທ່ານ ສະຫງວນ ເຍ່ຍກົ່ວນໍ່ເຮີວ່າງ ຮອງຫົວໜ້າ ອົງການໄອຍະການປະຊາຊົນແຂວງ ໄດ້ຂຶ້ນ ຜ່ານບົດສະຫຼຸບຕີລາຄາ ກ່ຽວກັບສະພາບການຈັດຕັ້ງປະຕິບັດ ວຽກງານ ອະໄພຍະໂທດ ປະຈຳປີ 2025 ແລະທິດທາງວຽກງານຈຸດສຸມປີ 2026 ແລະ ຜ່ານລັດຖະດໍາລັດ ຂອງປະທານປະເທດ ວ່າດ້ວຍການໃຫ້ອະໄພຍະໂທດ, ທັງຜ່ານລາຍຊື່ຂອງນັກໂທດ ທີ່ໄດ້ຮັບການອະໄພຍະໂທດຫຼຸດຜ່ອນໂທດ ແລະ ປ່ອຍຕົວນັກໂທດ ໃນປີ 2025. ສຳລັບແຂວງຫຼວງພະບາງ ມີຜູ້ທີ່ໄດ້ຮັບອະໄພຍະໂທດ 37 ຄົນ ຍິງ 3 ຄົນ. ໃນນັ້ນ, ອະໄພຍະໂທດປ່ອຍຕົວ 4 ຄົນ ແລະ ຫຼຸດຜ່ອນໂທດ 33 ຄົນ ຍິງ 3 ຄົນ, ຊຶ່ງແມ່ນບຸກຄົນທີ່ມີຄວາມຕື່ນຕົວເຄົາລົບ, ປະຕິບັດລະບຽບກົດໝາຍ, ວິໄນຂອງຄ້າຍຄຸມຂັງໄດ້ດີ, ເປັນຜູ້ທີ່ມີຄວາມບຸກບືນຫ້າວຫັນ ໃນການປະຕິບັດໜ້າທີ່ວຽກງານຂອງຄ້າຍຄຸມຂັງ, ມີແນວຄິດ ພຶດຕິກໍາປ່ຽນແປງ ແລະ ກິນແໜງແຄງໃຈ ຕໍ່ການກະທໍາຜິດຂອງຕົນໃນໄລຍະຜ່ານມາ, ໂດຍໄດ້ຜ່ານຂັ້ນຕອນ ໃນການດໍາເນີນການຄັດເລືອກນັກໂທດ ຜູ້ທີ່ມີເງື່ອນໄຂ, ມີການຄັດເລືອກຈັດປະເພດປະຈຳອາທິດ, 3 ເດືອນ, 6 ເດືອນ ແລະ 1 ປີ ທັງມີການເຂົ້າຮ່ວມຕິດຕາມ ຂອງເຈົ້າໜ້າທີ່ຢ່າງເຂັ້ມງວດ.
ໂອກາດນີ້, ທ່ານ ບຸນເລື່ອມ ມະນີວົງ ໄດ້ເນັ້ນໃຫ້ຜູ້ທີ່ໄດ້ຮັບການອະໄພຍະໂທດ, ຫຼຸດຜ່ອນໂທດທຸກຄົນ ເອົາໃຈໃສ່ເຄົາລົບ, ປະຕິບັດລະບຽບ-ກົດໝາຍ ແລະ ວິໄນຂອງຄ້າຍຄຸມຂັງໃຫ້ໄດ້ດີ, ກາຍເປັນບຸກຄົນທີ່ມີຄວາມຕື່ນຕົວ ບຸກບືນຫ້າວຫັນປະຕິບັດລະບຽບກົດໝາຍ, ປັບປຸງປ່ຽນແປງ ແລະ ພັດທະນາຕົນເອງ ເພື່ອໃຫ້ໄດ້ຮັບນະໂຍບາຍປອຍຕົວກ່ອນກຳນົດໃນຕໍ່ໜ້າ.
(ຂ່າວ: ຮອ ນາງ ມະໄລວັນ ລັດສະໝີ, ພາບ: ຮຕ ບັນສິດທິ ພັນທະວົງ)
ຄໍາເຫັນ