 |
ທ່ານ ຈັນທະນົງສິນ ຈັນທະພິມ ປະທານຄະນະກຳມະການປົກຄອງເມືອງ ໃຫ້ຮູ້ວ່າ: ນັກທຸລະກິດຈາກ ເມືອງເສີນເຈີ້ນ ທີ່ໄດ້ເດີນທາງມາທ່ອງທ່ຽວ ແລະ ໄດ້ພັກເຊົາຢູ່ ໂຮງແຮມມ່ວນມ່ວນບູຕີກ 50 ກວ່າທ່ານ, ພາຍຫຼັງທີ່ໄດ້ຮູ້ຂ່າວວ່າທາງອຳນາດການປົກຄອງເມືອງພວກເຮົາມີພິທີໂຮມຊຸມນຸມໃຫຍ່ ກໍໄດ້ຖືເອົາໂອກາດກ່ອນຈະກັບຄືນປະເທດ ມາມອບເງິນທີ່ໄດ້ຈາກການສົມທົບທຶນຂອງນັກທ່ຽວທ່ຽວແຕ່ລະທ່ານ ທີ່ຮ່ວມເດີນທາງຄັ້ງນີ້ ມອບໃຫ້ກັບອຳນາດການປົກຄອງເມືອງພວກເຮົາ. ນອກຈາກເງິນສົດແລ້ວ, ທ່ານຍັງໄດ້ມອບອຸປະກອນການຮຽນທີ່ຈຳເປັນເຊັ່ນ: ປື້ມ, ບິກ ແລະ ສໍ ຈຳນວນໜຶ່ງ ເພື່ອເປັນການອຳນວຍຄວາມສະດວກ ແລະ ຫຼຸດຜ່ອນຄວາມຫຍຸ້ງຍາກໃຫ້ແກ່ນ້ອງນັກຮຽນ.
ໂອກາດນີ້, ການນຳເມືອງໂຂງ ແລະ ພາກສ່ວນທີ່ກ່ຽວຂ້ອງໃນວຽກງານສຶກສາ ກໍໄດ້ກ່າວສະແດງຄວາມຂອບໃຈຢ່າງສູງຕໍ່ນໍ້າໃຈອັນດີງາມຂອງນັກທຸລະກິດຈາກເມືອງເສີນເຈີ້ນໃນຄັ້ງນີ້ ແລະ ໃຫ້ຄຳໝັ້ນສັນຍາວ່າຈະນຳໃຊ້ທຶນຮອນ ແລະ ອຸປະກອນດັ່ງກ່າວ ໃຫ້ເກີດປະໂຫຍດສູງສຸດແກ່ວຽກງານການສຶກສາຢ່າງໂປ່ງໃສ ແລະ ມີປະສິດທິຜົນ. ການປະກອບສ່ວນໃນຄັ້ງນີ້ ຖືເປັນຕົວຢ່າງທີ່ດີຂອງການທ່ອງທ່ຽວທີ່ຄວບຄູ່ໄປກັບການພັດທະນາສັງຄົມ ແລະ ການເສີມສ້າງສາຍພົວພັນມິດຕະພາບທີ່ດີລະຫວ່າງ ສປປ ລາວ ແລະ ສປ ຈີນອີກດ້ວຍ.
(ຂ່າວ-ພາບ: ພຸດທະສິນ ວົງວິໄລທອງ)
ຄໍາເຫັນ