ຫວ່າງມໍ່ໆມານີ້, ນັກວິທະຍາສາດຈາກ World Weather Attribution (WWA) ໄດ້ເປີດເຜີຍການວິເຄາະລ້າສຸດທີ່ລະບຸວ່າ: ປີ 2025 ເປັນໜຶ່ງໃນສາມປີທີ່ຮ້ອນທີ່ສຸດເທົ່າທີ່ເຄີຍມີການບັນທຶກມາ. ໂດຍໄດ້ກ່າວເຖິງພຶດຕິກຳຂອງມະນຸດ, ໂດຍສະເພາະການເຜົາໄໝ້ເຊື້ອໄຟຟອດຊິວ ເປັນສາເຫດທີ່ເຮັດໃຫ້ໂລກຮ້ອນຂຶ້ນຢ່າງຫຼວງຫຼາຍ.
ບົດລາຍງານການວິເຄາະທີ່ເຜີຍແຜ່ໃນເອີຣົບຫວ່າງມໍ່ມານີ້ຊີ້ໃຫ້ເຫັນວ່າ: ນີ້ແມ່ນຄັ້ງທຳອິດທີ່ອຸນຫະພູມໂລກສະເລ່ຍໃນໄລຍະສາມປີໄດ້ເກີນຂອບເຂດ 1.5 ອົງສາ ທີ່ກຳນົດໄວ້ໃນຂໍ້ຕົກລົງປາຣີປີ 2015 ເມື່ອທຽບກັບລະດັບກ່ອນຍຸກອຸດສາຫະກຳ. ໂດຍຜູ້ຊ່ຽວຊານເຕືອນວ່າການຄວບຄຸມອຸນຫະພູມໃຫ້ຕໍ່າກວ່າລະດັບນີ້ແມ່ນສິ່ງສຳຄັນສຳລັບການປົກປ້ອງຊີວິດມະນຸດ ແລະ ຫຼີກລ່ຽງໄພພິບັດດ້ານສິ່ງແວດລ້ອມທົ່ວໂລກ.
ເຖິງແມ່ນວ່າປີ 2025 ຈະຢູ່ໃນໄລຍະລານີຢາ ຊຶ່ງຕາມທຳມະຊາດແລ້ວຈະຊ່ວຍຫຼຸດອຸນຫະພູມໂລກ, ແຕ່ຄວາມຮ້ອນຍັງຄົງຢູ່ໃນລະດັບສູງ. ນັກຄົ້ນຄວ້າຊີ້ໃຫ້ເຫັນເຖິງການເຜົາໄໝ້ນ້ຳມັນ, ອາຍແກ໊ສ ແລະ ຖ່ານຫີນຢ່າງຕໍ່ເນື່ອງ ຊຶ່ງປ່ອຍອາຍແກ໊ສເຮືອນແກ້ວອອກສູ່ຊັ້ນບັນຍາກາດ. ໂດຍເຫດການສະພາບອາກາດທີ່ຮຸນແຮງໄດ້ເອົາຊີວິດຜູ້ຄົນຫຼາຍພັນຄົນ ແລະ ສ້າງຄວາມເສຍຫາຍທາງເສດຖະກິດຫຼາຍພັນລ້ານໂດລາ.
ນັກວິທະຍາສາດເຕືອນວ່າ: ຄວາມຖີ່ ແລະ ຄວາມຮຸນແຮງທີ່ເພີ່ມຂຶ້ນຂອງໄພພິບັດທາງທຳມະຊາດ ກຳລັງທົດສອບຂີດຄວາມສາມາດຂອງມະນຸດໃນການຮັບມື ຫຼື ເອີ້ນກັນວ່າ "ຂີດຈຳກັດຂອງການປັບຕົວ." ຕົວຢ່າງເຊັ່ນ: ພາຍຸເຮີຣິເຄນ Melissa ທີ່ເພີ່ມຄວາມຮຸນແຮງຂຶ້ນຢ່າງໄວວາ ຈົນປະເທດເກາະດອນເຊັ່ນ ຈາໄມກາ, ກູບາ ແລະ ເຮຕີ ບໍ່ສາມາດຮັບມືກັບຄວາມເສຍຫາຍໄດ້ທັນເວລາ.
ຄໍາເຫັນ