ນໍ້າບາກ ເພີ່ມຄວາມເອົາໃຈໃສ່ຄຸ້ມຄອງສັງຄົມດ້ວຍກົດໝາຍ

ໂດຍ:ຕະວິນຍານ
ເພື່ອເຮັດໃຫ້ສັງຄົມມີຄວາມສະຫງົບ,ຄວາມເປັນລະບຽບຮຽບຮ້ອຍ,ມີຄວາມຍຸຕິທໍາ ປະຊາຊົນໄດ້ຮັບການປົກປ້ອງດ້ວຍກົດໝາຍ.ໃນ ປີ 2023 ຜ່ານມາ,ເມືອງນໍ້າບາກ ແຂວງ ຫຼວງພະບາງໄດ້ເພີ່ມຄວາມເອົາໃຈໃສ່ຊຸກຍູ້ສົ່ງເສີມຂົງເຂດຕຸລາການປະຕິບັດພາລະບົດບາດສິດໜ້າທີ່ຂອງຕົນດ້ວຍຄວາມຮັບຜິດຊອບສູງຂຶ້ນເປັນກ້າວໆຊຶ່ງສະແດງອອກໃນການປະຕິບັດວຽກງານຍຸຕິທໍາ ໃນໜຶ່ງປີຜ່ານມາ,ຂະແໜງການກ່ຽວຂ້ອງລົງເຄື່ອນໄຫວໂຄສະນາເຜີຍແຜ່ກົດໝາຍຢູ່ຮາກຖານບ້ານ, ພ້ອມທັງບໍາລຸງພາລະບົດບາດ, ສິດ ແລະໜ້າທີ່ໃຫ້ຄະນະແກ້ໄຂຂໍ້ຂັດແຍ່ງຂັ້ນບ້ານ ໄດ້ 29 ບ້ານ ທຽບໃສ່ແຜນປະຕິບັດໄດ້ລື່ນ 16% ປະກາດຮັບຮອງບ້ານແບບຢ່າງປະຕິບັດກົດໝາຍໄດ້ 2 ບ້ານ, ປະເມີນບ້ານແບບຢ່າງປະຕິບັດກົດໝາຍໄດ້ 29 ບ້ານ ຢັ້ງຢືນຄວາມຖືກຕ້ອງຂອງເອກະສານທັງຫມົດ 241 ຊຸດ, ຈັດຕັ້ງປະຕິບັດຄໍາຕັດສິນຂອງສານທັງໝົດ 58 ເລື່ອງ, ແພ່ງ 29 ເລື່ອງ, ອາຍາ 29 ເລື່ອງ, ປະຕິບັດສໍາເລັດ 22 ເລື່ອງ, ພວມຈັດຕັ້ງປະຕິບັດ 33 ເລື່ອງ, ຄະດີແພ່ງ 9 ເລື່ອງ, ຄະດີອາຍາ 24 ເລື່ອງ, ໃຫ້ຄໍາປຶກສາທາງກົດໝາຍໃຫ້ແກ່ປະຊາຊົນໄດ້ 3 ຄັ້ງ. 
ອົງການໄອຍະການປະຊາຊົນເຂດ IIໄດ້ເອົາໃຈໃສ່ເຄື່ອນໄຫວຕິດຕາມກວດກາການ ປະຕິບັດກົດໝາຍ, ບັນດານິຕິກໍາລຸ່ມກົດໝາຍ ເຫັນວ່າມີດ້ານຕັ້ງໜ້າດີຂຶ້ນ ມີສະຕິການເຄົາລົບລັດຖະທໍາມະນູນ ແລະ ກົດໝາຍ, ກວດກາແກ້ໄຂຄໍາຮ້ອງຈາກປະຊາຊົນສໍາເລັດ 14 ສະບັບ, ມີອາຊະຍາກໍາເກີດຂຶ້ນທັງຫມົດ 139 ເລື່ອງ, ຫຼາຍກວ່າໝູ່ແມ່ນຄະດີກະທໍາຜິດກ່ຽວກັບຄວາມປອດໄພ- ຄວາມເປັນລະບຽບຮຽບຮ້ອຍຂອງສັງຄົມມີ 63 ເລື່ອງ, ຖັດມາແມ່ນຄະດີຢາເສບຕິດໄວ້ໃນຄອບຄອງ 49 ເລື່ອງ, ຄະດີກະທໍາຜິດສະຖານອື່ນໆມີ 22 ເລື່ອງ; ຕິດຕາມກວດກາການປະຕິບັດກົດໝາຍ ຂອງອົງການສືບສວນ-ສອບສວນ ມີຄະດີເຂົ້າທັງໝົດ 17 ເລື່ອງ, ໄດ້ຖະແຫຼງສັ່ງຟ້ອງຂຶ້ນສານ 6 ເລື່ອງ, ສົ່ງຄືນເຈົ້າໜ້າທີ່ສືບສວນ-ສອບສວນ  5 ເລື່ອງ ແລະ ຊັດມ້ຽນ 3 ເລື່ອງ ແລະ ພວມດໍາເນີນ 3 ເລື່ອງ,ຮ່ວມກັບເຈົ້າໜ້າທີ່ກວດກາສັນລະສູດສະຖານທີ່ເກີດເຫດໄດ້ 18 ຄັ້ງ, ຕິດຕາມກວດກາ ການດໍາເນີນຄະດີຢູ່ສານ, ການຈັດຕັ້ງປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ແລະ ສະຖານທີ່ກັກຕົວ, ກັກຂັງ, ຄ້າຍຄຸມຂັງ-ດັດສ້າງ ເປັນປົກກະຕິ. 
  ສໍາລັບສານປະຊາຊົນເຂດ IIໄດ້ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນໃຫ້ ມີຈັນຍາທໍາ, ຈັນຍາບັນໃນການປະຕິບັດໜ້າທີ່ວຽກງານວິຊາສະເພາະຂອງຕົນໃນການຄົ້ນຄວ້າແກ້ໄຂຄະດີ, ໃນ 1 ປີຜ່ານມາໄດ້ອອກໝາຍຮຽກ-ໝາຍເຊີນເອີ້ນໂຈດ, ຈໍາເລີຍເພື່ອມາສະໜອງຂໍ້ມູນຫຼັກຖານຄະດີໄດ້ 477 ສະບັບ ມີຄະດີທັງໝົດ73 ເລື່ອງ, ໃນນັ້ນມີຄະດີຄ້າງມາແຕ່ປີ 2022 ຈໍານວນ 14 ເລື່ອງ, ມີຄະດີເຂົ້າໃໝ່ 59 ເລື່ອງ, ໃນນັ້ນ ຄະດີອາຍາເຂົ້າໃໝ່ 23 ເລື່ອງ, ຄະດີແພ່ງ 21 ເລື່ອງ ແລະ ຄະດີຄອບຄົວ 15 ເລື່ອງ, ສາມາດແກ້ໄຂຄະດີໄດ້ທັງໝົດ 63 ເລື່ອງ ທຽບໃສ່ແຜນປີປະຕິບັດໄດ້ 90,61%, ຄະດີຄ້າງພວມດໍາເນີນ 10 ເລື່ອງ, ໄດ້ລົງອາຍັດຊັບ 23 ຄັ້ງ. 
  ສໍາລັບການປະຕິບັດວຽກງານຂອງຂົງເຂດຕຸລາການ ໃນປີ 2024ນີ້ ເມືອງນໍ້າບາກ ຈະສືບຕໍ່ເຜີຍແຜ່ກົດໝາຍຢູ່ຮາກຖານບ້ານໃຫ້ໄດ້ 30 ບ້ານ ແລະ ໂຄສະນາຜ່ານໂທລະໂຄ່ງໃຫ້ໄດ້ 200 ຄັ້ງ; ຈັດຕັ້ງປະຕິບັດຄໍາຕັດສິນຂອງສານທີ່ໃຊ້ຢ່າງເດັດຂາດໃຫ້ສໍາເລັດ 36 ເລື່ອງຂຶ້ນໄປ; ປະກາດບ້ານແບບຢ່າງປະຕິບັດກົດໝາຍໃຫ້ໄດ້ 2 ບ້ານ, ປະເມີນບ້ານແບບຢ່າງປະຕິບັດກົດໝາຍໃຫ້ໄດ້ 20 ບ້ານ; ສ້າງບຸກຄະລາກອນກົດໝາຍ 45 ວັນ; ບໍາລຸງພາລະບົດບາດສິດ ແລະ ໜ້າທີ່ໜ່ວຍໄກ່ເກ່ຍໃຫ້ໄດ້ 30 ບ້ານ; ຮັບປະກັນການຈົດທະບຽນ ແລະ ຢັ້ງຢືນເອກະສານໃຫ້ຖືກຕ້ອງ, ວ່ອງໄວ ແລະ ສອດຄ່ອງຕາມລະບຽບກົດໝາຍ. ເພີ່ມທະວີຕິດຕາມກວດກາການເຄົາລົບ ແລະ ປະຕິບັດກົດໝາຍກໍຄືການສັ່ງຟ້ອງຜູ້ຖືກຫາໃຫ້ເຂົ້າສູ່ຄຸນນະພາບໃຫ້ບັນລຸໄດ້ 95%, ສືບຕໍ່ແກ້ໄຂວຽກງານວິຊາສະເພາະໃຫ້ໄດ້ 95% ຂອງຄະດີທັງໝົດ ພ້ອມທັງຮັບປະກັນແກ້ໄຂຄະດີໃຫ້ວອງໄວ້ຂຶ້ນ, ຖືກຕ້ອງຕາມລະບຽບກົດໝາຍ, ຮັບປະກັນຄຸນນະພາບ ແລະ ຄວາມຍຸຕິທໍາໃຫ້ແກ່ຄູ່ຄວາມ, ຕິດຕາມການດໍາເນີນຄະດີຢູ່ສານ ແລະ ສະຖານທີ່ກັກຂັງຄ້າຍຂຸມຂັງ-ດັດສ້າງເປັນປົກກະຕິ. 
ສືບຕໍ່ປັບປຸງລະບົບແບບແຜນວິທີເຮັດວຽກໃຫ້ລະອຽດຂຶ້ນກວ່າເກົ່າ ຖືກຕ້ອງຕາມລະບຽບກົດໝາຍ ທັງຮັບປະກັນຄຸນນະພາບ ແລະ  ແກ້ໄຂຄະດີຢ່າງໜ້ອຍໃຫ້ໄດ້ 85% ຂຶ້ນໄປຂອງຄະດີທັງໝົດ.